ގޯލްޑަން ފުޓްސަލް ޗެލެންޖު 2025 ގައި ރޭ ގދ. ވާދޫން 11-1 އިން ފިޔޯރީ ބަލިކޮށް، މި ފަހަރުގެ މުބާރާތުގައި މިހާތަނަށް އެންމެ ބޮޑު މޮޅާ އެކު ވަރުގަދަކޮށް ފަށައިފި އެވެ.
ގޯލްޑަން ފުޓްސަލް ޗެލެންޖުގެ 2023 ވަަނަ އަހަރުގެ ރަނަރަޕް، ވާދޫން މި ފަހަރު ކުޅެނީ، އަތޮޅުގެ ގްރޫޕް ބީގަ އެވެ. ގދ. އަތޮޅުގެ އެންމެ ފަހުގެ ޗެމްޕިއަން، ވާދޫން ފުރަތަމަ މެޗުގައި ވެސް މި ވަނީ ތަފާތު ދައްކައި، ރެކޯޑް މޮޅެއް ހޯދައިފަ އެވެ.
އަހުމަދު ވިސާލް (އަންދު)ގެ ކޯޗުކަމުގައި ކުޅޭ ވާދޫން ރޭ ޖެހި ގޯލުތަކަށް ބަލާއިރު، ނަޝާހު އަހުމަދު (ނައްޓު) ވަނީ ހެޓްރިކެއް ހެދިއިރު، މުސައްނިފު މުހައްމަދު (މުއްސެ) ދެ ގޯލު ޖެހި އެވެ. އަނެއް ގޯލުތައް ޖެހީ، ކެޕްޓަން، އަޔާޒް އަހުމަދު (އަޔާ)، މުހައްމަދު އިޔާދު އަލީ، އިބްރާހީމް ޝައުފް މުހައްމަދު، ޔަޒްދާން އިބްރާހީމް، އަބްދުﷲ އާހިލް އަލީ އަދި ޒައިން މުހައްމަދު އެވެ. މި މެޗުގައި، ފިޔޯރީން ކާމިޔާބުކުރި ގޯލަކީ، ވާދޫގެ އަޔާ ފައިގައި ޖެހި ބައިކޮޅަށް ވަން ލަނޑެކެވެ.
ގދ. އަތޮޅުގެ ގްރޫޕް އޭގައި ރޭ ކުޅުނު މެޗުން ފޯރިގަދަ ކުރިމަތިލުމަކަށް ފަހު، މަޑަވެލިން ވަނީ 3-2 އިން ތިނަދޫގެ މައްޗަށް ކުރިހޯދައިފަ އެވެ. މި މެޗުގައި، މަޑަވެލީގެ ލަނޑުތައް ޖަހައިދިނީ މުހައްމަދު މުއާދު އާއި އަހުމަދު ސިނޫ މަހުމޫދު އަދި އިބްރާހީމް އާލު އަހުމަދު އެވެ. މި މެޗުގައި، ތިނަދޫގެ ލަނޑުތައް ކާމިޔާބުކުރީ އިބްރާހީމް އަހުމަދު އާއި އަހުމަދު ޒައިދު މުހައްމަދު ނައީމް އެވެ.
ގޯލްޑަން ފުޓްސަލް ޗެލެންޖުގައި މިރޭ ކުޅޭ މެޗުތައް:
20:00: ލ. މާވަށް - ލ. ގަން
20:00: ލ. މުންޑޫ - ލ. ކަލައިދޫ
21:00: މ. މުލައް - މ. ވޭވަށް
21:00: މ. މަޑުއްވަރީ - މ. ދިއްގަރު
22:00: ގއ. ދާންދޫ - ގ. ކަނޑުހުޅުދޫ
22:00: ގއ. ގެމަނަފުށި - ގއ. ނިލަންދޫ
23:00: ގއ. ދެއްވަދޫ - ގއ. ކޮލަމާފުށި
23:00: ގއ. މާމެންދޫ - ގއ. ވިލިނގިލި
