ގޯލްޑަން ފުޓްސަލް ޗެލެންޖުގައި އއ އަތޮޅުގެ ރަށްތަކުގެ މެދުގައި އޮންނަ ވާދަވެރިކަން ބޮޑުވެ، އެ އަތޮޅުގެ ފުޓްސަލް ފޯރި ވެސް ގަދަވަމުން އަންނަ ކަމަށް އއ. މަތިވެރި ޓީމުގެ ތަރި، އަލީ އަލްސަން ބުނެފި އެވެ.
މިދިޔަ އަހަރުގެ ގޯލްޑަން ފުޓްސަލް ޗެލެންޖުގެ ކުއާޓާ ފައިނަލަށް ދަތުުރުކޮށް، ރާއްޖޭގެ ފުޓްސަލްގެ ގަދަ އަށް ޓީމުގެ ތެރޭގައި މަތިވެރި ވަނީ ހިމެނިފަ އެވެ. އެއީ، ގޯލްޑަން ފުޓްސަލް ޗެލެންޖުގައި މިހާތަނަށް އެ ޓީމުގެ އެންމެ ރަނގަޅު ނަތީޖާ އެވެ.
މަތިވެރިން މިދިޔަ އަހަރު އަތޮޅު ޗެމްޕިއަންކަން ހޯދީ ފައިނަލުގައި ބޮޑޮފޮޅުދޫ ބަލިކޮށްފަ އެވެ. އެއީ، މަތިވެރިން އަތޮޅު ތަށި ހޯދި ދެ ވަނަ ފަހަރެވެ. މަތިވެރިން ވަނީ، މާމިގިލި ބަލިކުރުމަށް ފަހު، ހަތަރެއްގެ ޗެމްޕިއަންކަން ހޯދައިފަ އެވެ.
މިދިޔަ އަހަރު އއ. އަތޮޅުގެ މޮޅު ކުޅުންތެރިޔާގެ މަގާމު ހޯދި އަލްސަން މި ފަހަރުގެ މުބާރާތުގެ ފުރަތަމަ މެޗުގައި، ތޮއްޑޫ އަތުން މަތިވެރި މޮޅުވި މެޗުގައި ދެ ގޯލު ޖެހި އެެވެ.
"ފުރަތަަމަ މެޗު ފުދޭވަރަކަށް އުނދަގޫކޮށް ދިޔައީ. ވަރަށް ތައްޔާރުވެފައި އިނީމަ މި ވަރު މިވީ. އަލްހަމްދުލިއްލާހި ފުރަތަމަ މެޗު ވެސް ރަނގަޅަށް މިދިޔައީ،" ފުރަތަމަ މެޗަށް ފަހު، "އަދަދު ސްޕޯޓްސް" އަށް ދިން އިންޓަވިއުއެއްގައި އަލްސަން ބުންޏެވެ.
އަލްސަން ދެކޭ ގޮތުގައި އއ އަތޮޅުގައި ފުޓްސަލް އަށް އޮތް ފޯރި ގޯލްޑަން ފުޓްސަލް ޗެލެންޖުން ވަރަށް ރަނގަޅަށް ފެންނަމުން އަންނަ ކަަމަށެވެ. އަދި ރަނގަޅަށް ތައްޔާރުނުވެއްޖެނަމަ، މަތިވެރިން އެ ހޯދަމުން އަންނަ ކާމިޔާބީ ތަކުރާރުކުރަން ފަސޭހަނުވާނެ ކަމަށް ވެސް އޭނާ ވަނީ ފާހަގަކޮށްފަ އެވެ.
"އަތޮޅުގަ އޮންނަ ވާދަވެރިކަން އެބަފެނޭ، މިދިޔަ އަހަރު ބައިވެރިވީ ހަތަރު ޓީމު، އެކަމަކު މި ފަހަރު ބައިވެރިވެއްޖެ އަށް ރަށުން (އަތޮޅުގެ). އަތޮޅު އެއްކޮށް ބައިވެރިވެއްޖެ، އޭގެ އިން ވެސް އެނގެނީ އަތޮޅުގައި އޮންނަ ފޯރިގަދަކަން. ވަރަށް އެއްވަރެއްގެ ރަށްތަކެއް މި ހުންނަނީ. ވަރަށް ބޮޑަށް ތައްޔާރުވެގެން މި ވަނީ މި ވީ،" ފުރަތަމަ މެޗުގެ މޮޅު ކުޅުންތެރިއާގެ މަގާމު ހޯދި އަލްސަން ބުންޏެވެ.
ގޯލްޑަން ފުޓްސަލް ޗެލެންޖުގައި މިއަދާއި މިރޭ ޖުމްލަ އެކު، 11 މެޗެއް ކުޅޭއިރު، ހަވީރުގެ މެޗުތައް 16:00 ގައި ފަށާނީ، އުުކުޅަސް އާއި މަތިވެރި ބައްދަލުކުރާ މެޗާއި ތޮއްޑޫ އާއި ހިމަންދޫ ކުޅޭ މެޗުންނެވެ.
