އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ އާއި އެތަނުގެ ކުރީގެ ދިފާއީ ވަޒީރު ހައްޔަރުކުރަން އިންޓަނޭޝަނަލް ކްރިމިނަލް ކޯޓުން އަމަރު ނެރެފައިވާތީ އެކޯޓަށް ދަތިކުރުމުގެ ފިޔަވަޅުއަޅަން، އެމެރިމާ ޕާލަމެންޓުގެ ތިރިގެ، ހައުސް އޮފް ރެޕްރެޒެންޓޭޓިވްސް އިން އިއްޔެ ފާސްކޮށްފި އެވެ.
އައިސީސީ އާއި އެ ކޯޓަށް ވާގިވެރިވާ ކޮންމެ މީހަކަށް ދަތިކުރުމުގެ ފިޔަވަޅު އަޅާ ގޮތަށް "އިލެޖިޓިމޭޓް ކޯޓް ކައުންޓަރެެކްޝަން އެކްޓް" ގެ ނަމުގައި އެކުލަވައިލި ބިލު ހައުސް އޮފް ރެޕްރެޒެންޓިޓިވްސް އިން ފާސްކުރީ ގިނަ އަދަދެއްގެ ވޯޓުންނެވެ. އެބިލު ފާސްކުރަން 243 މެންބަރުން ވޯޓުދިން އިރު ބިލު ފާސްކުރުމާ ދެކޮޅަށް ވޯޓު ދިނީ 140 މެންބަރެކެވެ.
ބިލު ފާސްކުރަން ވޯޓު ދިން މެންބަރުންގެ ތެރެއިން 45 މެންބަރުންނަކީ އެމެރިކާގައި މިހާރު ވެރިކަންކުރާ ޑިމޮކްރެެޓިކް ޕާޓީގެ މެންބަރުންނެވެ. އަނެއް 198 މެންބަރުންނަކީ ވެރިކަމަށް މިހާރު އިންތިހާބުވެފައިވާ ޑޮނަލްޑް ޓްރަމްޕް ނިސްބަތްވާ ރިޕަބްލިކަން ޕާޓީގެ މެންބަރުންނެވެ.
އެބިލު ގާނޫނަކަށް ވާނީ އެމެރިކާ ޕާލަމެންޓްގެ މަތިގެ، ސެނެޓުން ވެސް ފާސްކޮށް ރައީސް ތަސްދީގު ކުރުމުންނެވެ. އެ ބިލު ގާނޫނަކަށް ވެއްޖެ ނަމަ، އެމެރިކާ ރައްޔިތަކާ ނުވަތަ އެމެރިކާގެ ބައިވެރިންގެ ތެރެއިން އައިސީސީ ބަލައިނުގަންނަ ގައުމެއްގެ ރައްޔިތަކާ ދެކޮޅަށް ތަހުގީގެއް ހިންގަން ނުވަތަ ދައުވާކޮށް ހައްޔަރުކުރަން އައިސީސީއަށް އެހީވާ ކޮންމެ މީހަކާ ދެކޮޅަށް ދަތިކުރުމުގެ ފިޔަވަޅު އެޅޭނެ އެވެ.
އިޒްރޭލާ އެމެރިކާ އިން އައީސީސީ އުފެއްދި ރޯމް ސްޓެޓިއުޓް މުއާހަދާ ގައި ބައިވެރިއެއް ނުވެ އެވެ.
އިޒްރޭލުގެ ނަތަންޔާހޫއާއި ގަލާންޓް ހައްޔަރުކުރަން އައިސީސީން އަމުރެެއް ނެރުނީ ގާޒާގައި ނަސްލުހޭދު ކުރިއަށް ގެންދާތީ އެވެ. އޮކްޓޯބަރު، 2023، އިން ފެށިގެން މިހައިތަނަށް، އިޒްރޭލުން ގާޒާގައި މަރައިލި މީހުންގެ އަދަދު ވަނީ 46،000 ފަހަނައަޅައި ގޮސްފަ އެވެ.
