ގޯލްޑަން ފުޓްސަލް ޗެެލެންޖު 2025 ގައި ތ. ތިމަރަފުށިން އަތޮޅު ބުރުގައި ކުޅުނު ފުރަތަަމަ މެޗުން ކިނބިދޫ އަތުން 2-1 އިން މޮޅުވިއިރު، އެ މެޗުގައި ތިމަރަފުށިން އުންމީދުކުރި ވަރަށް ނުކުޅެވުނު ކަމަށާއި ކުރިއަށް އޮތްތަނުގައި ކަންކަން ރަނގަޅުކުރާނެ ކަމަށް ޓީމުގެ ތަރި، އިބްރާހިމް އަސްވަދު (ގަބޭ) ބުނެފި އެވެ.
މި ފަހަރުގެ ގޯލްޑަން ފުޓްސަލް ޗެލެންޖުގައި މުބާރާތުގެ ޗެމްޕިއަންކަން، ތިން ފަހަރު (2016، 2019 އަދި 2022) ހޯދާފައިވާ ތިމަރަފުށިން ކުޅުނު ފުރަތަމަ މެޗުގައި ކިނބިދޫ އަތުން ހޯދީ އުނދަގޫ މޮޅެކެވެ. ތިމަރަފުށީގެ ކެޕްޓަން، އިބްރާހިމް ސިނާހު (ސިނާ) އަށް ދެ ރީނދޫ ކާޑާ އެކު ރަތް ކާޑު ދެއްކި މި މެޗުގައި، ކިނބިދޫން ވަނީ މުހިންމު ކުޅުންތެރިން ނުލައި ފަހު ވަގުތާ ހަމައަށް ޖެހެންދެން ނަތީޖާ ހަމަހަަމަކުރަން ޕްރެޝަރު ކޮށްފަ އެވެ.
އެ މެޗުގެ މޮޅު ކުޅުންތެރިއަކަށް ހޮވުނު ގަބޭ މެޗަށް ފަހު ބުނީ، ފުރަތަމަ މެޗުގައި ކަންކަން ދިޔައީ އެންމެ ބޭނުންވި ގޮތަށް ނޫން ކަމަށެވެ.
"އަސްލު ފުރަތަަމަ މެޗުގައި އުންމީދުކުރި ވަރަށް ވުރެ ސަކަރާތްކޮށް މިދިޔައީ ދޯ. ބޮޑަށް ލަފާކުރަނީ ފުރަތަމަ މެޗު ވީމަ، މެޗެއް ނަގާލަން މުހިންމުވީމަ ކަންނޭނގެ މިހެން މި ވީ. އެކަމަކު އުންމީދުކުރި ވަރަށް ވުރެ ސަކަރާތްކޮށް ކުޅެވުނީ، އިރާދަކުރެއްވިއްޔާ ކުރިއަށް އޮތްތާގައި އަޅުގަނޑުމެން ދާނީ ރަނގަޅުކުރަމުން، ހަމަ ކުރެވެން ހުރި ހުރިހާ މަސައްކަތެއް ކުރަމުންދާނީ. އުންމީދުކުރި ގޮތެއް ނުން މިއީ،" ގޯލްޑަން ފުޓްސަލް ޗެލެންޖުގެ ކިންގް އޮފް ފުޓްސަލްގެ މަގާމު ދެ ފަހަރު ހޯދި ހަމައެކަނި ކުޅުންތެރިޔާ، ގަބޭ ބުންޏެވެ.
މި ފަހަރު ގޯލްޑަން ފުޓްސަލް ޗެލެންޖުގައި ތ. އަތޮޅުން 10 ރަށް ވާދަކުރެ އެވެ. ގަބޭ ދެކޭގޮތުގައި މިއީ އަތޮޅު ތަށި ހޯދަން ވެސް އެންމެ ޗެެލެންޖު ބޮޑުވާނެ އަހަރެވެ.
"މިހާރު އަސްލު ވާ އެއްޗަކީ އަތޮޅުގެ ހުރިހާ ރަށެއް ވެސް ވަރަށް ރަނގަޅަށް މި އޮތީ، އެ މީހުން ވެސް، ވަރަށް ރަނގަޅަށް ކުޅެ، ޕްރެކްޓިސްތަކެއް ކޮށް، ހުރިހާ އެންމެންނަށް ވެސް މީތި (ފުޓްސަލް) އެނގި، ކުޅޭ މީހުން ގިނަ ވެފައި މި އިންނަނީ، އެހެންވީމަ ވަރަށް އުނދަގޫވާނެ ކަމަށް މި ބަލަނީ، މިއީ އެންމެ އުނދަގޫ ފަހަރަށް ވާނެ ކަމަށް މި ބެލެވެނީ،" ގަބޭ ބުންޏެވެ.
ތިމަރަފުށްޓާ އެއް ގްރޫޕެއްގައި އޮތީ ކިނބިދޫގެ އިތުރުން، ވިލުފުށި، އޮމަދޫ އަދި ދިޔަމިގިލި އެވެ. ތިމަރަފުށިން ދެން ކުޅޭ މެޗުގައި، މި މަހު 14 ވަނަ ދުވަހު ކުޅޭނީ ދިޔަމިގިލިއާ އެވެ.
