އަންނަ ރޯދަ މަހުގެ ކުރިން އެއްވެސް ރަށެއް ބާކީ ނުކޮށް ރާއްޖޭގެ ހުރިހާ ރަށަކަށް ދިމާވެފައި އޮތް ކަރަންޓުގެ މައްސަލަ ހައްލު ކުރާނެ ކަމަށް ރައީސް ޑރ. މުހައްމަދު މުއިއްޒު މިރޭ ވިދާޅުވެއްޖެ އެވެ.
ހުވަދުއަތޮޅުގެ ރަށްތަކަށް ކުރައްވާ ދަތުރުފުޅުގެ ތެރެއިން ގދ. ފިޔޯރީއަށް ވަޑައިގެން އެ ރަަށުގެ ރައްޔިތުންނާ ބައްދަލު ކުރައްވައި ރައީސް މުއިއްޒު ވިދާޅުވީ ފިނޭންސް މިނިސްޓްރީގެ އިތުރުން ސަރުކާރުގެ ކުންފުނިތައް ގުޅިގެން ރާއްޖޭގައި ކަރަންޓު މައްސަލަ ދިމާވެފައިވާ ހުރިހާ ރަށަކަށް ބޭނުންވާ ޖަނަރޭޓަރުތަކުގެ މައްސަލަ ހައްލު ކުރުމަށް އާ ޖަނަރޭޓަރުތައް ގެނައުމުގެ މަސައްކަތް ފަށާފައިވާ ކަމަށެވެ.
"ފިނޭންސް މިނިސްޓްރީ އާއި ފެނަކަ އާއި އެސްޓީއޯ އާއި އެމްޓީސީސީ ކުންފުނިތައް ގުޅި ކުރިއަށް އޮތް ރޯދަ މަސް އަންނަންވާއިރަށް އަޅުގަނޑުމެން މި އަމާޒު ކުރަނީ މުޅި ރާއްޖޭގައި ހަމަ އެންމެ ރަށެއް ވެސް، މައްސަލައެއް އޮތް ރަށެއްވިއްޔާ ހިމެނޭ ގޮތަށް އެންމެ ރަށެއް ވެސް ދޫކޮށް ނުލައި ހުރިހާ ރަށެއްގައި ޖަނަރޭޓަރުތަކުގެ މައްސަލަ ހައްލު ކުރުމަށް ގެންނަން ޖެހޭ ޖަނަރޭޓަރުތައް ގެނެސްދީ އިންސްޓޯލްކޮށް ނިންމަން،" ރައީސް ވިދާޅުވި އެވެ.
ރޯދައިގެ ކުރިން ޖަނަރޭޓަރުތައް އިންސްޓޯލް ކުރުމަކީ ބޮޑު ގޮންޖެހުމަކަށްވީ ނަމަވެސް، ރައްޔިތުން ކަންބޮޑުނުވެ ހިތްހަމަޖެހޭ ފެންވަރަށް ކުރިއަށް އޮތް ދެ މަސް ތެރޭގައި އެ އަމާޒު ހާސިލުކޮށްދޭނެ ކަމުގެ ޔަގީންކަން ރައީސް މުއިއްޒު ވަނީ އަރުވާފަ އެވެ.
"މިއީ ވެސް ބޮޑު ޗެލެންޖަކަށް ވާނެ ކަމެއް. އެހެންނަމަވެސް އެ މަސައްކަތް މިފެށީ. އިރާދަކުރެއްވިއްޔާ މި ދެ މަސް ތެރޭގައި ރާއްޖޭގެ ހުރިހާ ރަށެއްގައި ރަމަޟާން މަހު ތިބޭފުޅުން ކަންބޮޑުވެ ވަޑައިގަންނަވަން ޖެހިވަޑައިނުގަންނަވާ ފެންވަރަށް މި ކަރަންޓުގެ މައްސަލަ ހައްލު ކުރުމަކީ އަޅުގަނޑު މި އަމާޒު ހިފި ކަންތައް. އިރާދަކުރެއްވިއްޔާ އަޅުގަނޑު ބަލާނަން ތިބޭފުޅުން ހިތްހަމަޖެހިވަޑައިގަންނަވާ ގޮތަށް މިކަން ކޮށްދެވޭތޯ،" އެމަނިކުފާނު ވިދާޅުވި އެވެ.
ރައީސް މުއިއްޒު ވިދާޅުވީ ކަރަންޓުގެ މައްސަލައަށް ޖުމްލަ ހައްލެއް ގެނައުމަކީ އެމަނިކުފާނުގެ އަމާޒެއް ކަމަށާއި ކަރަންޓުގެ މައްސަލަ ވަރަށް ގިނަ ރަށްރަށަށް ދިމާވެފައިވާ ކަމަށެވެ.
އެގޮތުން ފެނަކައިގެ އިންޖީނުގެތަކުގައި ހުރި ޖަނަރޭޓަރުތަކަކީ އެމަނިކުފާނު ވެރިކަމަށް ވަޑައިގެންނެވުމުގެ ކުރިން ވެސް ބަދަލުތަކެއް ގެންނަން ޖެހޭ ޖަނަރޭޓަރުތަކެއްކަން ރައީސް މުއިއްޒު ފާހަގަކުރެއްވި އެވެ.
"ވަރަށް އިސްކަމެއް އަޅުގަނޑުމެން ދެން ހާއްސަކޮށް ރޯދަ މަސް އަންނާތީއާ އެކީގައި ކަރަންޓުގެ މައްސަލައަށް ހައްލު ގެނެސްދިނުމަށް. މިއީ މިރަށެކޭ އެއްގޮތަށް ހަމަ ވަރަށް ގިނަ ރަށްރަށުގައި ވަރަށް ބޮޑުވެފައި އޮތް މައްސަލައެއް. ފެނަކައިގެ އިންޖީނުގެތަކުގެ ޖަނަރޭޓަރުތައް ހަލާކުވުން، ނޫނިއްޔާ ބަދަލު ކުރަން ޖެހި، އިތުރު ކުރަން ޖެހި، ސައިޒު ބޮޑުކުރަން ޖެހިފައި މިހިރީ،" ރައީސް ވިދާޅުވި އެވެ.
މިދިޔަ އަހަރު ކަރަންޓުގެ މައްސަލަ ހައްލު ކުރުމަށް ވަރަށް ބޮޑު ހޭދައެއް ކުރަން ޖެހުނުކަން ފާހަގަކުރައްވާ ރައީސް ވިދާޅުވީ އެ ހޭދަ ކުރަން ޖެހުނީ ކުރިން އެ ޖަނަރޭޓަރުތައް ބެލެހެއްޓިފައި ނުވާތީ ކަމަށެވެ.
ރާއްޖޭގެ ރަށްތަކަށް ދިމާވެފައިވާ ކަރަންޓުގެ މައްސަލަ ރޯދައިގެ ކުރިން ހައްލު ކޮށްދެއްވާނެ ކަމުގެ ޔަގީންކަން ރައީސް މުއިއްޒު ދެއްވާފައިވާއިރު، މާލޭގެ އިތުރުން ރަށްރަށުގައި ކަރަންޓު ބިލު ބޮޑުވާ މައްސަލައަކީ ފަހަކަށް އައިސް ރައްޔިތުން ވަރަށް ބޮޑަށް ކުރަމުން އަންނަ ޝަކުވާއެކެވެ.
ނަމަވެސް ކަރަންޓު ބިލު ބޮޑުވާ މައްސަލައާ ބެހޭ ގޮތުން ރައީސް މުއިއްޒު އެއްވެސް އެއްޗެކޭ ވިދާޅުނުވެ، ދެއްކި ކަރަންޓުގެ މައްސަލަ ހައްލުކޮށްދެއްވާނެ ވާހަކަ އެކަންޏެވެ.
