ނިމިދިޔަ އަހަރު އެއްވެސް ކަމެއް ނުވެ އޮތީ ކުރީ ސަރުކާރުން ބަޖެޓު ހެދި ގޮތުގެ ސަބަބުން ކަމަށް ރައީސް މުހައްމަދު މުއިއްޒު މިއަދު ވިދާޅުވެއްޖެ އެވެ.
ރައީސުލްޖުމްހޫރިއްޔާ ގދ. ހޯނޑެއްދޫ ރައްޔިތުންނާ ބައްދަލުކުރައްވައި މިއަދު ދެއްކެވި ވާހަކަފުޅުގައި ވިދާޅުވީ މިއަހަރުގެ ބަޖެޓު ހަދާފައި އޮތީ ތަރައްގީއަށް އިސްކަން ދެއްވައިގެން ކަމަށެވެ. ތަރައްގީގައި އިސްކަންދޭ ތަރުތީބުގައި އެންމެ ބޮޑު އިސްކަމެއް ދީފައިވާނީ ގެދޮރުވެރިކަމުގެ މަޝްރޫއުތައް ހިންގުމަށް ކަމަށް ވެސް ރައީސުލްޖުމްހޫރިއްޔާ ވިދާޅުވި އެވެ.
ރިޔާސީ ކެމްޕޭނުގެ ތެރޭގައި ހޯނޑެއްދޫގައި އެމަނިކުފާނު ވެވަޑައިގެންނެވި ވައުދުތައް ތަކުރާރު ކުރެއްވުމާއެކު އެމަނިކުފާނު ވިދާޅުވީ ވެވަޑައިގެންނެވި އެއްވެސް ވައުދެއް ހަނދުމަފުޅުނެތީ ނޫން ކަމަށާއި ޕްރޮޖެކްޓުތައް ހުއްޓިފައި އޮތުމުގެ އެންމެ ބޮޑު ސަބަބަކީ ބަޖެޓު ކަމަށެވެ.
"އަޅުގަނޑުމެން ފާސްކުރި ބަޖެޓެއް ނޫން ވީމަ... ކުރީ ސަރުކާރުން ނިމިގެން ދަމުން ގަސްތުގަ އެއްވެސް ކަމެއް ނުކުރެވޭ ގޮތަށް ބަޖެޓެއް ހައްދަވާފަ ދެއްވާފަ ވަޑައިގަތީ. އެހެންވީމަ އެއްވެސް ކަމެއް ނުވެ އޮތީ. ބޭނުންވާ ގޮތަށް،" ރައީސް ވިދާޅުވި އެވެ.
ރައީސް ވިދާޅުވީ ބަޖެޓުގެ ތާށިކަމާއެކު ވެސް މި ދިޔައަހަރު ނިންމާލީ ފައިސާ ޗާޕުނުކޮށް، ދައުލަތް ދަރަނިވެރިވިޔަ ވެސް ނުދެއްވައި ކަމަށެވެ. އެއީ ވަރަށް ބޮޑު ކާމިޔާބީއެއްގެ ގޮތުގައި ރައީސް ފާހަގަކުރެއްވި އެވެ. ކުރީ އަހަރުގެ ބަޖެޓުން އެތެރެއާއި ބޭރުގެ ދަރަނިތައް ވެސް ދައްކަމުން ގެންގޮސްފައިވާ ކަމަށް ވެސް އެމަނިކުފާނު ވިދާޅުވި އެވެ.
ނިމިދިޔަ އަހަރަށް ދައުލަތުގެ ބަޖެޓް ގޮތުގައި ފާސް ކޮށްފައި ވަނީ 49.8 ބިލިއަން ރުފިޔާ އެވެ. އޭގެ އިތުރުން 5.5 ބިލިއަން ރުފިޔާގެ ސަޕްލިމެންޓަރީ ބަޖެޓެއް ވެސް ފާސްކުރި އެވެ. އަހަރު ނިންމާލީ 15 ބިލިއަންގެ ޑެފިޒިޓަކާއެކު އެވެ. މިއަހަރުގެ ބަޖެޓުގެ ޖުމުލަ އަދަދަކީ 56 ބިލިއަން ރުފިޔާ އެވެ. މިއަހަރު އާމްދަނީގެ ގޮތުގައި ލިބޭނެ ކަމަށް އަންދާޒާކޮށްފައި ވަނީ 41.2 ބިލިއަން ރުފިޔާ އެވެ.
