ސަރުކާރުން ދަރާފައި ހުރި ދިވެހި ކުންފުނިތަކަށް މި ހަފްތާ ތެރޭގައި 500 މިލިއަނަށް ވުރެ ގިނަ ރުފިޔާ ދޫކުރާނެ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.
ހުވަދޫ އަތޮޅަށް ކުރައްވާ ދަތުރުގައި ގދ. ހޯނޑެއްދޫއަށް ވަޑައިގެން އެ ރަށުގެ ރައްޔިތުންނާ ބައްދަލުކުރައްވާ ރައީސް މުއިއްޒު ވިދާލުވީ އެތެރޭގެ ދަރަނިތައް ދެއްކުމުގެ ގޮތުން މި ހަފްތާ ތެރޭގައި ފިނޭންސް މިނިސްޓްރީން ދިވެހި ވިޔަފާރިތަކަށް 500 އަށް ވުރެ ގިނަ މިލިއަން ރުފިޔާ ދޫކުރާނެ ކަމަށެވެ.
"ލޯކަލް އެކި ދަރަނިތައް ވެސް ދައްކަމުން މިއައީ. މި ހަފްތާ، މި ހިނގާ ހަފްތާ ތެރޭގައި ވެސް ހަމަ މިގޮތުން ސަރުކާރުން ފިނޭންސް މިނިސްޓްރީން އެކި ފަރާތްތަކަށް، ސަރުކާރުން ކޮށްފައި ހުރި މަސައްކަތްތަކަށް 500 އަށްވުރެ ގިނަ މިލިއަން ރުފިޔާ ހަމަ ދިވެހި އެކިއެކި ކުންފުނިތަކަށް އެބަ ދޫކުރަން،" ރައީސް ވިދާޅުވި އެވެ.
ސަރުކާރުން އެ ފައިސާ ދޫކުރާނީ ކުދި އަދި މެދު ލައްވައި ކުރުވާފައި ހުރި މަސައްކަތްތަކަށް ކަމަށާއި މިދިޔަ ދުވަސްތަކުގައި އެ ދަރަނި ދިޔައީ ދައްކަމުން ކަމަށް އެމަނިކުފާނު ވިދާޅުވި އެވެ.
ރައީސް މުއިއްޒު ވިދާޅުވީ ކުރީގެ ސަރުކާރުން، ސަރުކާރުގެ އެކި ކުންފުނިތައް މެދުވެރިކޮށް ރަށްރަށުގައި ހުންނަ ކުދި ކުންފުނިތައް ލައްވައި ކުރުވާފައި ހުރި މަސައްކަތުގެ ބޮޑު ބައެއް ރޯދަ މަހުގެ ކުރިން ދައްކައި ނިންމޭތޯ މަސައްކަތް ކުރަމުންދާ ކަމަށެވެ.
"ޖެނުއަރީ އަދި ފެބްރުއަރީ މަސް ތެރޭގައި ކުރީ ސަރުކާރުގެ ދުވަސްވަރު ފެނަކަ، އާރްޑީސީ، އެމްޓީސީސީ، ވެމްކޯ މިހެން ކިޔާނެ ކަމެއް ނެތް، މިކަހަލަ ކުންފުނިތައް، އާދައިގެ ކުދި ކުދި ކުންފުނިތައް ލައްވައި، ރަށްރަށުގައި ހުންނަ ކުންފުނިތައް ލައްވައި މަސައްކަތް ކުރުވާފައި ނުދީ ހުރި ފައިސާގެ ބޮޑު އަދަދެއް ނުދެވި އެހެރީ އެ ކުންފުނިތައް މިސް މެނޭޖް ކޮށްފައި އޮތްލެއް ބޮޑުކަމުން،" ރައީސް މުއިއްޒު ވިދާޅުވި އެވެ.
އެ ފައިސާތައް ކުރީ ސަރުކާރުގައި ނުދެވި ހުރީ ސަރުކާރު ކުންފުނިތައް ހިންގަން ނޭގުމުގެ ސަބަބުން ކަމަށް ވެސް އެމަނިކުފާނު ވިދާޅުވި އެވެ.
"އޭގެ ވެސް ބޮޑު އިންސައްތައެއް މި ބަލަނީ މި ދެ މަސް ތެރޭގައި، ރޯދަ މަސް އަންނަންވާއިރަށް، ޖެނުއަރީ ފެބްރުއަރީ މަސް ތެރޭގައި ދީ ނިންމޭތޯ. އެހެންވީމަ އަޅުގަނޑުމެން މިކުރާ މަސައްކަތް މިކުރަނީ މި ވިސްނުމުގައި. ގައުމު ދަރަނިވެރިވިޔަ ނުދީ އެއްވެސް ވަރަކަށް ފައިސާ ޗާޕު ނުކޮށް، ފައިސާގެ އަގު ހިފަހައްޓައިގެން ރައްޔިތުންނަށް ދޭން ހުރި ފައިސާ ދެމުން ރާއްޖެއިން ބޭރަށް ދޭން ހުރި ފައިސާ ވެސް ދައްކަމުން، ތަރައްގީގެ ކަންކަން ގެނެސްދިނުމަށް."
މިދިޔަ ޑިސެމްބަރު 7، ގައި ފިނޭންސް މިނިސްޓަރު މޫސާ ޒަަމީރު ވިދާޅުވީ މި ސަރުކާރު ވެރިކަމާ ހަވާލުވިއިރު، 124 ބިލިއަން ރުފިޔާގެ ދަރަންޏެއް ދައުލަތުގެ އޮތް ކަމަށެވެ. އޭގެތެރެއިން ދެބައިކޮށްފައި އެއްބަޔަކީ މިދިޔަ ސަރުކާރުގެ ދަރަނި ކަމަށާއި އަނެއް ބަޔަކީ އޭގެ ކުރީގެ ސަރުކާރުތަކުގެ ދަރަނި ކަމަށެވެ.
މިދިޔަ އަހަރު އާމްދަނީގެ ގޮތުގައި 33.6 ބިލިއަން ރުފިޔާ ލިބިފައިވެ އެވެ. އޭގެ ބޮޑު ބައެއް ހިއްސާކުރަނީ ޓެކްސް އާމްދަނީގެ ގޮތުގައި ލިބުނު 25.5 ބިލިއަން ރުފިޔާ އެވެ. އޭގެ އިތުރުން ޓެކްސް ނޫން އާމްދަނީގެ ގޮތުގައި 7.5 ބިލިއަން ރުފިޔާ އަދި ހިލޭ އެހީގެ ގޮތުގައި 658 މިލިއަން ރުފިޔާ ލިބިފައިވެ އެވެ.
