ރައީސް ޑރ. މުހައްމަދު މުއިއްޒުގެ ސަރުކާރުން ހިންގާ ގެދޮރުވެރިކަމުގެ އެންމެ ބޮޑު މަޝްރޫއު ކުރިއަށް ގެންދަން ހިއްކާ ރަސްމާލެ މަޝްރޫއު ހިއްކުމުގެ މަސައްކަތް އަވަސް ކުރުމަށް އިތުރު ކުންފުނިތަކުން ޑްރެޖަރު ގެނެސްގެން މަސައްކަތް ކުރިއަށް ގެންދާނެ ކަމަށް އެމަނިކުފާނު މިއަދު ވިދާޅުވެއްޖެ އެވެ.
ކ. ގުޅިއަށް ކުރައްވާ ދަތުރުގެ ތެރެއިން އެ ރަށުގެ ރައްޔިތުންނާ ބައްދަލުކުރައްވާ ރައީސް މުއިއްޒު ވިދާޅުވީ ރަސްމާލެ ހިއްކުމުގެ މަސައްކަތުގެ ދުވެލި އަވަސް ކުރުމަށް އިތުރު ކުންފުނިތަކުން ޑްރެޖަރު ގެނެސްގެން މޮބިލައިޒް ކުރުމަށްފަހު އެއްފަހަރާ މަޝްރޫއުތަކެއް ކުރިއަށް ގެންދާނެ ކަމަށެވެ.
އެގޮތުން އެއްފަހަރާ ގިނަ މަޝްރޫއުތަކެއް ހިންގުމުގެ ސަބަބުން މުޅި މަޝްރޫއުގެ ސްޕީޑު ދެތިން ގުނަ އިތުރުވެގެންދާނެ ކަމަށް ވެސް އެމަނިކުފާނު ވިދާޅުވި އެވެ.
"މިހާރު އަމަލީ ގޮތުން ބިން ހިއްކުން އެ ހިނގަނީ. އިރާދަކުރެއްވިއްޔާ އަދި އިތުރު ބައެއް ފަރާތްތަކުން، އިތުރު ބައެއް ކޮމްޕެނީތަކުން އަޅުގަނޑުމެން އެތަނަށް ޑްރެޖަރު މޮބިލައިޒް ކުރުވައިގެން އެއްފަހަރާ އެތައް މަޝްރޫއުތަކެއް، އެތައް ފަރާތްތަކެއްގެ މަސައްކަތްތަކެއް އެތާ ފެށުމަށް މަސައްކަތް މިކުރަނީ. އެހެންވީމަ ސްޕީޑު ދެގުނަ އަދި ތިންގުނައަށް ބާރުވާނެ އިރާދަކުރެއްވިއްޔާ،" ރައީސް ވިދާޅުވި އެވެ.
މިދިޔަ އަހަރު ބޭނުންވި ސްޕީޑުގައި ރަސްމާލެ މަޝްރޫއު ކުރިއަށް ނުގެންދެވުނީ ބައިވަރު މައްސަލަތައް ދިމާވެގެންކަން ފާހަގަކުރައްވާ ރައީސް މުއިއްޒު ވިދާޅުވީ އެ ހުރިހާ ދަތިތަކުން އަރައިގަނެ މިހާރު އެ މަސައްކަތް ފެށޭ ހިސާބަށް ގޮސްފައިވާ ކަމަށެވެ.
"މިދިޔަ އަހަރުގައި އަޅުގަނޑުމެން ބޭނުންވި ސްޕީޑުގައި އެކަމެއް ނުއެއްދޭ. ބައިވަރު މައްސަލަތައް. އަޅުގަނޑުމެންނާ ވާރުތަވި އިގްތިސޯދުގެ ތެރެއިން ހައްލު ކުރަން ޖެހިފައި ހުރި ބައިވަރު ކަންތައްތައް ހައްލު ކުރުމުގެ ތެރެއިން ކުރިމަތިވި ދަތިތައް ހަމަ ކުރިމަތިވީ. އެހެންނަމަވެސް އިރާދަކުރެއްވިއްޔާ އޭގެ ތެރެއިން އަޅުގަނޑުމެން ކުރިއަރައިގެން އައިސް މިހާރު މަސައްކަތްތައް ފެށިގެންދާ ހިސާބަށް މިއޮތީ އައިސްފައި،" ރައީސް ވިދާޅުވި އެވެ.
އރައީސް މުއިއްޒު ވިދާޅުވީ ރަސްމާލެ މަޝްރޫއަކީ ރާއްޖޭގެ ގެދޮރުވެރިކަމުގެ މައްސަލައަށް އެއް ސަރަހައްދަކުން އެންމެ ބޮޑު ހައްލެއް އަންނާނެ މަޝްރޫއު ކަމަށާއި އެ މަޝްރޫއުއިން އެއް ފަސްގަނޑެއްގައި ގިނަ ބަޔަކު އާބާދު ވެގެންދާނެ ކަމަށެވެ.
ރަސްމާލެ ހިއްކުމުގެ މަޝްރޫއު ފުރަތަމަ ހަވާލުކުރީ ދައުލަތުގެ ބަޖެޓުން އެއްވެސް ހަރަދެއް ނުކުރާ ގޮތަށް ބިން ހިއްކުމުގެ މުގާބިލުގައި ރަސްމާލެ އިން 60 ހެކްޓަރުގެ ބިން އަދި ހުޅުމާލެއިން 10 ހެކްޓަރުގެ ބިން ދޫކުރާ ގޮތަށެވެ. އޭރު ބުނީ މަސައްކަތް ފަށާތާ އަށް މަސް ދުވަހުގެ ތެރޭގައި މުޅި މަޝްރޫއަށް ބޭނުންވާ ބިން ހިއްކާ ނިމޭނެ އެވެ.
ނަމަވެސް މިކަން މިގޮތަށް ކުރިއަށް ނުގޮސްގެން ސީއެމްސީއާ އެކީ ހެދި އެއްބަސްވުން ބާތިލުކޮށް، އެ ކުންފުނިން ހިއްކި ތަންކޮޅަށް ވަނީ 77 މިލިއަން ރުފިޔާ ދީފަ އެވެ. މިހާރު މަޝްރޫއު ކުރިއަށް ގެންދަނީ އެޗްޑީސީން ލޯނު ނަގާ ގޮތަށެވެ. މި ލޯނާ ގުޅޭ އެއްވެސް ތަފުސީލެއް ސަރުކާރުން ނުވަތަ އެޗްޑީސީން ވެސް މިހާތަނަށް ހާމައެއް ނުކުރެ އެވެ.
