ގޯލްޑަން ފުޓްސަލް ޗެރިޓީ ޝީލްޑް މެޗުގައި ބ. އޭދަފުށީގެ ފަރާތުން ފެނުނީ މަދު ޕްރެކްޓިސްތަކަކަށް ފަހު ދެއްކުނު ކުޅުން ކަމަށާއި ރަނގަޅަށް ތައްޔާރުވެގެން މުބާރާތުގައި ޓީމު ފެންނާނީ ތަފާތުކޮށް ކަމަށް އޭދަފުށީ ޓީމުގެ ތަރި، އިޝާން އިބްރާހިމް (ސައްޓު) ބުނެފި އެވެ.
ލ. ގަން އަތުން މިދިޔަ އަހަރުގެ ގޯލްޑަން ފުޓްސަލް ޗެލެންޖުގެ ފައިނަލުގައި އޭދަފުށިން ވަނީ 4-2 އިން މޮޅުވެފަ އެވެ. އެކަމަކު، މި ފަހަރުގެ ޗެރިޓީ ޝީލްޑް މެޗުގައި، އޭދަފުށި ވަނީ ގަން އަތުން 1-0 އިން ބަލިވެފަ އެވެ.
ރޭގެ މެޗަށް ފަހު، "އަދަދު ސްޕޯޓްސް" އަށް ދިން އިންޓަވިއުއެއްގައި މިދިޔަ އަހަރުގެ ގޯލްޑަން ފުޓްސަލް ޗެލެންޖުގެ ކިންގް އޮފް ފުޓްސަލް ހޯދި ސައްޓު ބުނެފައިވަނީ، ޝީލްޑް މެޗުން މޮޅުވާން އޭދަފުށްޓަށް ފުރުސަތު ލިބި ބޭނުންނުހިފުމުން ނާކާމިޔާބާ ކުރިމަތިލާން ޖެހުނީ ކަމަށެވެ.
"ޖުމްލަކޮށް ރަނގަޅު އަޅުގަނޑުމެންނަށް ޗާންސް ލިބިފައި، ޗާންސްގެ ބޭނުންނުހިފުނީ، އަނެއްހެން މާ ބައިވަރު ޕްރެކްޓިސްތަކެއް ވެސް ނުކޮށް، އެންމެ ދެ ޕްރެކްޓިސް ޖަހާލާފައި ގޯލްޑް ކަޕް ނިންމި ގޮތަށް ވަގުތެއް ނުލިބުނު، ކޯޗު ވެސް ރާއްޖެ އައީ އިއްޔެ ނޫން ކުރިން ދުވަހު (ބުރާސްފަތި ދުވަހު) ދެން، ދެ ޕްރެކްޓިސް ޖަހާފައި މި މެޗަށް އައީމަ ކުރި ހިތްވަރާ މެދު ހިތްހަމަޖެހޭ. ރަނގަޅަށް ކުޅެ، ސްކޯ ނުކުރެވިގެން ބަލިވެގެން ދިޔައީ،" މެޗު ދިޔަ ގޮތަށް އިޝާރާތްކޮށް ސައްޓު ބުންޏެވެ.
ގިނަ އަހަރުތަކެއްގެ މަސައްކަތަށް ފަހު، އޭދަފުށިން މިދިޔަ އަހަރު ގޯލްޑަން ފުޓްސަލް ޗެލެންޖް ކާމިޔާބުކުރިއިރު، އެ ޓީމުން ވަނީ ބ. އަތޮޅުގެ ފުޓްސަލް މުބާރާތުގެ އިތުރުން، އަތޮޅުތަކަށް ބޭއްވި ފުޓްބޯޅަ މުބާރާތް ގޯލްޑް ކަޕް ވެސް ކާމިޔާބުކޮށްފަ އެވެ. މި ހުރިހާ ކަމަކަށް ބަލާއިރު، މިދިޔަ އަހަރު ފެނުނީ ފުޓްބޯޅަ އާއި ފުޓްސަލްގައި އޭދަފުށީގެ ރަން އަހަރެއްގެ ގޮތުގަ އެވެ.
"އަަސްލު މީގެ ތަށްޓެއް ހޯދުމަށް ވުރެ ތަށި ދިފާއުކުރުން ކަންނޭނގެ މީގެ އެންމެ އުނދަގޫ ކަމަކީ އަބަދުވެސް އަޅުގަނޑުމެން ޓީމު ރަނގަޅަށް އެކުލަވާލައި، މާދަމައިން ފެށިގެން ޕްރެކްޓިސް ފަށާނެ. ސީދާ ކޯޗާ އެކީގައި، މި މެޗަށް އައީ މާ ބައިވަރު ޕްރެކްޓިސްތަކެއް ކޮށްފައެއް ނޫން. މުބާރާުތުގެ ފުރަތަމަ މެޗު އަޅުގަނޑުމެންނަށް މީނީ 17 ގައި، އެ މެޗަށް އަންނައިރު، 15 ވަރަކަށް ޕްރެކްޓިސް ޖަހާލެވޭއިރު، ޓީމު އިންނާނީ ރަނގަޅަށް ކަމަށް މި ބަލަނީ،" މި ފަހަރުގެ ގޯލްޑަން ފުޓްސަލް ޗެލެންޖާ މެދު ކުރެވޭ އުންމީދުތަކާ ބެހޭގޮތުން، ސައްޓު ބުންޏެވެ.
ގޯލްޑަން ފުޓްސަލް ޗެލެންޖުގެ އަތޮޅު ބުރުގައި އޭދަފުށިން މި މަހު 17 ވަނަ ދުވަހު ކުޅޭ މެޗުގައި ބައްދަލުކުރާނީ ތުޅާދޫއާ އެވެ. މި އަތޮޅުން ދެން ބައިވެރިވީ ފެހެންދޫ އެވެ.
