ނޭޕްލްސް، އިޓަލީ (ޖެނުއަރީ 5) - އިޓާލިއަން ލީގުގައި މިރޭ ސްކޮޓް މެކްޓޮމިނޭ އާއި ރޮމެލޫ ލުކާކޫ ގޯލު ޖަހައި، 3-0 އިން ފިއޮރެންޓީނާ ބަލިކޮށް، ނަޕޯލީން ލީގުގެ އެއް ވަނަ އަށް ޖެހިލައިފި އެވެ.
މި ނަތީޖާއާ އެކު، 19 މެޗުން 44 ޕޮއިންޓް ހޯދައި ނަޕޯލީން ވަނީ އެއް ވަނަ އަށް ޖެހިލައިފަ އެވެ. ކުރިން އެއް ވަނައިގައި އޮތް އެޓަލަންޓާ އަށް ވަނީ 18 މެޗުން 41 ޕޮއިންޓް ލިބިފަ އެވެ. އެޓަލަންޓާ އިން މެޗު ހަމަކުރާއިރު، އެއް ވަނަ އަށް ޖެހިލުމުގެ ފުރުސަތު އެބައޮތެވެ.
ރަށުންބޭރުގައި ކުޅުނު ނަޕޯލީ އަށް މެޗުގެ 29 ވަަނަ މިނިޓްގައި ލީޑުނަގައިިދިނީ ލުކާކޫ ދިން ބޯޅައަކުން ޑޭވިޑް ނެރެސް ޖެހި ގޯލުންނެވެ.
ނަޕޯލީން ފުރަތަމަ ހާފު ލީޑުގައި އޮވެގެން ނިންމާލިއިރު، ދެ ވަނަ ހާފުގެ ކުޅުން ފެށިގެން ނުވަ މިނިޓް ތެރޭ ނަޕޯލީން ލީޑުފުޅާކުރީ ޕެނަލްޓީ އަކުން ލުކާކޫ ޖެހި ގޯލުންނެވެ. ލުކާކޫ ވަނީ، އޭނާއާ އެކު މެންޗެސްޓާ ޔުނައިޓެޑަށް ކުޅުނު ގޯލްކީޕަރު، ޑޭވިޑް ޑެހެއާ ހުރި ގޯލަށް ހަމަޖެހިލައިފައި ބޯޅަ ފޮނުވާލައި، ލީގުގައި ހަތް ވަނަ ގޯލު ޖަހައިފަ އެވެ.
ޔުނައިޓެޑަށް ކުރިން ކުޅުނު މެކްޓޮމިނޭ ނަޕޯލީގެ ތިން ވަނަ ގޯލު ޖެހީ 68 ވަނަ މިނިޓްގަ އެވެ.
އެންޓޯނިއޯ ކޮންޓޭގެ ކޯޗުކަމުގައި ކުޅޭ ނަޕޯލީން މި ސީޒަނުގައި ލީގުގެ ރޭހުގައި ވާދަކުރަމުން އަންނައިރު، މީގެ އެއް ސީޒަން ކުރިން ނަޕޯލީން ވަނީ އިޓާލިއަން ލީގު ކާމިޔާބުކޮށްފަ އެވެ. އެއީ، 33 އަހަރު ފަހުން ނަޕޯލީ އަށް ލީގު ކާމިޔާބު ކުރެވުނު ފަހަރެކެެވެ. ނަޕޯލީން އެންމެ ފުރަތަމަ އިޓާލިއަން ލީގުގެ ޗެމްޕިއަންކަން ހޯދީ 1987 ވަނަ އަހަރު އެވެ. އޭގެ ފަހުން، 1990 ވަނަ އަހަރު އެވެ. ދެ ފަހަރު ވެސް ނަޕޯލީން އިޓަލީގެ ލީގު ތަށި އުފުލާލިއިރު، ތަރި އަކީ ޑިއޭގޯ މަރަޑޯނާ އެވެ.
