މި މަހުން ފެށިގެން ރަށްރަށުގައި ކަރަންޓު ބިލުގެ ތެރޭގައި ކުނި އުކާލުމަށް ނަގާ ފީ ހިމަނަން ވޭސްޓް މެނޭޖްމަންޓް ކޯޕަރޭޝަން (ވެމްކޯ) އިން ނިންމި ނިންމުން ބާތިލުކޮށްފި އެވެ.
ވެމްކޯއިން މިރޭ ނެރުނު ބަޔާނެއްގައި ބުނީ އެ ކުންފުނިން މިގޮތަށް ނިންމީ ރައީސް ޑރ. މުހައްމަދު މުއިއްޒުގެ ލަފާގެ މަތިން ކަމަށެވެ. ނަމަވެސް ރައީސް މިފަދައިން ލަފާދެއްވި ސަބަބެއް ބަޔާނުގައި ބުނެފައެއް ނުވެ އެވެ.
"މި ބަދަލާއެލި، ވެމްކޯގެ ހިދުމަތް ފޯރުކޮށްދޭނީ އަދި ހިދުމަތަށް ބިލު ކުރެވޭނީ ވެމްކޯގެ ހިދުމަތައް ރަޖިސްޓްރީ ކޮށްފައިވާ ފަރާތްތަކަށް އެކަނި ކަމުގައި ދަންނަވަން،" ވެމްކޯއިން ބުނެފައިވެ އެވެ.
އެހެންކަމުން ބިލު ކުރުމުގެ މަސައްކަތް ކުރިއަށްދާނީ ކުރިންވެސް އޮތް އުސޫލުން ކަމަށް އެ ކުންފުނީގެ ބަޔާނުގައިވެ އެވެ.
ކުނި ބިލާއި ކަރަންޓު ބިލު އެއްކޮށްލުމުގެ މަސައްކަތް އެންމެ ފުރަތަމަ ފެށީ މިދިޔަ ސަރުކާރުންނެވެ. އެގޮތުން މާލެ ސަރަހައްދުގައި މިހާރުވެސް ސްޓެލްކޯއިން ކޮންމެ މަހަކު ފޮނުވާ ބިލުގައި ކުނި އުކާލުމުގެ ފީ ކޮންމެ ގޭބިސީއަކަށްވެސް ފޮނުވަ އެވެ.
މި ނިންމުމާއެކު އޭރުވެސް ގިނަ ބަޔަކު ވެމްކޯ އަދި ސަރުކާރަށް ފާޑުކިޔެވެ. އެގޮތުން މިހެން ހެދުމުން ކުނި ނުއުފައްދާ ތަންތަނަށްވެސް ކުނީގެ ފީ ބިލު ކުރެވޭނެ ކަމަށް އާންމުންނާއި ވިޔަފާރިތަކުން ބުންޏެވެ.
އެ ފާޑުކިޔުންތަކާއެކު ކުނި ނުއުފައްދާ ތަންތަނުގައި ހުންނަ ކަރަންޓު މީޓަރުގެތަކުގެ މައުލޫމާތު ވެމްކޯއާ ހިއްސާ ކުރުމަށް ސްޓެލްކޯއިން އެދުނެވެ.
ދެ ކުންފުނީގެ ބިލު އެއްކޮށްލައިގެން ބިލު ފޮނުވާއިރު، ކުނީގެ ހިދުމަތް ހޯދުމަށް ވަކިން ރަޖިސްޓަރީ ކުރާކަށް ނުޖެހެ އެވެ. ސްޓެލްކޯގެ ކަރަންޓު މީޓަރެއް ބަހައްޓާފައި ހުންނަ ކޮންމެ ތަނެއްގެ ބިލުގައި ވެސް ވެމްކޯގެ ފީ ހިމެނި ބިލުކުރެވެ އެވެ. ނަމަވެސް 34 ޔުނިޓަށްވުރެ މަދުން ކަރަންޓު ބޭނުންކުރާ ނަމަ އެ ގޭބިސީއަކުން ކުނި ނުއުފައްދާ ކަމަށް ބަލައި، ބިލެއް ނުކުރެ އެވެ.
