އިންޑިއާގެ ޖާސޫސީ ވިންގު، ރޯގެ އެހީގައި ރައީސް ޑރ. މުހައްމަދު މުއިއްޒުގެ ވެރިކަން ވައްޓާލަން އިދިކޮޅު ފަރާތްތަކުން މަޝްވަރާކޮށް މަސައްކަތްކުރި ކަމަށް ބުނެ އެމެރިކާގެ ވޮޝިންޓަން ޕޯސްޓުން ކުރި ތަހުގީގަކަށް ބިނާކޮށް ޝާއިއުކުރި ރިޕޯޓު ދިވެހި ސަރުކާރުން ދޮގުކޮށްފި އެވެ.
މިދިޔަ ހަފުތާ ވޮޝިންޓަން ޕޯސްޓުން އާންމުކުރި ތަހުގީގީ ރިޕޯޓުގައި ބުނެފައިވަނީ ރިޔާސީ އިންތިހާބުން ކުރީގެ ރައީސް އިބްރާހިމް މުހައްމަދު ސޯލިހު ބަލިވުމާ ގުޅިގެން ރައީސް މުއިއްޒުގެ ސަރުކާރު ވައްޓާލަން ރޯއަށް "ޑިމޮކްރެެޓިކް ރިނުވަލް އިނީޝިއޭޓިވް" ގެ ނަމުގައި ކަރުދާހެއް ހުށަހެޅީ އިދިކޮޅު އެމްޑީޕީން ކަމަށެވެ.
އިންޑިއާގެ ސަރުކާރުން ވެސް މި ރިޕޯޓު އިއްޔެ ދޮގުކުރި އިރު މިވަގުތު އިންޑިއާއަށް ރަސްމީ ދަތުރެއް ކުރައްވަމުން ގެންދަވާ ރާއްޖޭގެ ހާރިޖީ ވަޒީރު ޑރ. އަބްދުالله ހަލީލު ވަނީ ސަރުކާރުގެ ފަރާތުން މި ރިޕޯޓާ މެދު ދެކޭ ގޮތާ ގުޅޭގޮތުން ފުރަތަމަ ފަހަރަށް ވާހަކަ ދައްކަވާފަ އެވެ. "ވިއޯން" އަށް ދެއްވި އިންޓަވިއުއެއްގައި ހަލީލު ވަނީ ތަހުގީގުގެ ހޯދުންތައް ދޮގުކުރައްވާފަ އެވެ.
ކޮންމެ ހަފުތާއަކު އެ ގައުމުގެ ހާރިޖިއްޔާއިން ބާއްވާ ނޫސްވެރިންގެ ބައްދަލުވުމުގައި ވާހަކަ ދައްކަވަމުން އެ ވުޒާރާގެ ތަރުޖަމާނު ރަންދީރު ޖައިސްވާލް މި ރިޕޯޓު ސިފަކުރެއްވީ ޒާތީ ހަސަދައެއްގެ ގޮތުގަ އެވެ. ރާއްޖެއާ ގުޅުވައި ޝާއިރުކުރި ރިޕޯޓާ ބެހޭ ގޮތުން އިތުރު ވާހަކައެއް އޭނާ ނުދައްކަވަ އެވެ.
"[މި ރިޕޯޓުގެ ސަބަބުން] އެ ނޫސްވެރިޔާ އަދި ނޫހުންވެސް އިންޑިއާއާ މެދު ގެންގުޅޭ ހަސަދަވެރިކަމާއި ނަފްރަތު ފެނިގެންދޭ. އެ މީހުން މި ކަންކަން ކުރާ ގޮތުން އެކަމުގެ ހާއްސަ ތަރުތީބެއް ފެންނާނެ،" ޖައިސްވާލް ވިދާޅުވި އެވެ.
މިއީ ދިވެހި ސަރުކާރުން މި ރިޕޯޓާ ގުޅޭގޮތުން ރަސްމީކޮށް ވާހަކަ ދެއްކި ފުރަތަމަ ފަހަރު ކަމަށްވާއިރު ތުހުމަތުތައް އަމާޒުވި އެމްޑީޕީ އާއި ވެރިކަން ކުރާ ޕީއެންސީން ވެސް ވަކި އެއްޗެއް ބުނެފައި ނުވެ އެވެ.
ދިވެހި ސިޔާސީ ލީޑަރުންގެ ތެރެއިން ރިޕޯޓާ ގުޅުވާ މިހާތަނަށް ވާހަކަދައްކަވާފައިވަނީ ކުރީގެ ރައީސް މުހައްމަދު ނަޝީދު އެވެ. އިންޑިއާއާއެކު ގާތް ގުޅުމެއް ބާއްވާ ނަޝީދު އެކްސްގައި ކުރެއްވި ޕޯސްޓެއްގައި ވިދާޅުވީ ރާއްޖޭގެ ރައީސަކު މަގާމުން ދުރު ކުރަން އިންޑިއާއިން އެހީތެރި ނުވާނެ ކަމަށެވެ.
"އިންޑިއާއިން އެފަދަ ކަމަކަށް ދުވަހަކުވެސް އެއްބާރުލުމެއް ނުދޭނެ. އެ ގައުމުން އަބަދުވެސް ރާއްޖޭގެ ޑިމޮކްރަސީއަށް ތާއީދު ކުރޭ. ދުވަހަކު ވެސް ޝަރުތުތަކެއް ކަނޑައަޅާ ނޫޅޭ،" ނަޝީދު ވިދާޅުވި އެވެ.
ރައީސް ޑރ. މުހައްމަދު މުއިއްޒުގެ ސަރުކާރު ވައްޓާލަން ރޭވިކަމުގެ އެއްވެސް މައުލޫމާތެއް ލިބިފައި ނުވާ ކަމަށް ވެސް އެމަނިކުފާނު ވިދާޅުވި އެވެ.
