ރެކޯޑު އަދަދަކަށް ވެރި ރަށް މާލެއަށް ވާރޭ ވެހި ފެންބޮޑުވެ، ގިނަ ރަށްރަށަކަށް ވިއްސާރައިގެ ގެއްލުން ލިބުނު އިރު ރައްޔިތުންނަށް މެސެޖެއް ވެސް ނުދެއްވައި ރައީސް ޑރ. މުހައްމަދު މުއިއްޒު ހަނު ހުންނަވައިފި އެވެ.
މޫސުމާ ބެހޭ ގައުމީ އިދާރާ (މެޓް އޮފީސް) ގެ އެސިސްޓެންޓު މީޓިއޮރޮލޮޖިސްޓު ހުސެއިން ވަހީދު "އަދަދު" ނޫހަށް ވިދާޅުވި ގޮތުގައި ރޭ 11:00 އާ ހަމައަށް މާލެ އަށް 162 މިލިމީޓަރު، އަދި ހުޅުމާލެ އަށް 164 މިލިމީޓަރުގެ ވާރޭ ވެހުނެވެ. މިއީ ރެކޯޑު އަދަދެކެވެ.
މި ހާދިސާގައި މާލޭގެ ބޮޑު ބަޔެއް އެތައް ގަޑިއިރެއް ވަންދެން އޮތީ ފެނު އަޑީގަ އެވެ. ފެން ހިންދުމަށް ސިފައިންނާއި ކަމާބެހޭ އިދާރާތަކުން ކުރި މަސައްކަތް ކާމިޔާބުވާ ގޮތްވީ ރޭ މެންދަމުން އަލިވާން ގާތްވެފަ ވަނިކޮށެވެ. ރާއްޖޭގެ ގިނަ ރަށްތަކަކަށް ވެސް އިއްޔެގެ ވިއްސާރައިގެ އަސަރުކޮށް ބޮޑެތި ގެއްލުންތަކެއްވި އެވެ.
ގައުމަށް ދިމާވާ މިފަދަ ހާދިސާތަކުގައި ގައުމުގެ ވެރިން އާންމު އުސޫލުން ސޯޝަލް މީޑިއާ މެދުވެރިކޮށް ނަމަވެސް ރައްޔިތުންނަށް މެސެޖު ފޮނުއްވަ އެވެ. ބައެއްފަހަރު ގަންބޫޓާއި ކޯޓު ތުރުކުރައްވައިގެން އާންމުންގެ ގެތަކަށް ވެސް ވަޑައިގަންނަވަ އެވެ. ނަމަވެސް އިއްޔެގެ ހާދިސާއާ ގުޅިގެން ރައީސް ހިމެނޭހެން ސަރުކާރުގެ ވެރިން ތިއްބެވީ ހަނެވެ.
މި އަހަރު ފެށުނީއްސުރެ ކުރަމުންދާ ވިއްސާރައާ ގުޅިގެން މިހާތަނަށް ރައީސް ޑރ. މުހައްމަދު މުއިއްޒު ޕޯސްޓެއް ނުކުރައްވަ އެވެ. މާލޭގެ ބޮޑު ބަޔެއް ފެނުއަޑީގައި އޮއްވައި އެމަނިކުފާނު ވަނީ އިންޑިއާގެ ހާރިޖީ ވަޒީރުގެ ޕޯސްޓެއް ރިޕޯސްޓު ވެސް ކުރައްވައިފަ އެވެ. އެހެންކަމުން ސޯޝަލް މީޑިއާއާ ދުރުގައި ހުންނެވީ ކަމަކަށް ނުބެލެވެ އެވެ.
ރައީސް އާ ހިލާފަށް ނައިބު ރައީސް ހުސެއިން މުހައްމަދު ލަތީފު އެކްސްގައި ރޭ ޕޯސްޓެއް ކުރެއްވި އެވެ. ނަމަވެސް ކުޑަ ވަގުތުކޮޅެއްގެ ތެރޭގައި އެމަނިކުފާނު ވަނީ ޕޯސްޓު ޑިލީޓު ކުރައްވައިފަ އެވެ. ޑިލީޓު ކުރެއްވި ސަބަބެއް ނޭނގުނަސް ޕޯސްޓުގައި ލިޔުމުގެ ކުށެއްވެސް ނެތެވެ. އަދި ޕޯސްޓުގައި ދީފައިވާ މެސެޖަށް ބަލާއިރުވެސް އެއީ ނާއިބު ރައީސް ކުރެއްވުން ގޯސް ޕޯސްޓެއް ކަމަކަށް ނުފެނެ އެވެ.
ނައިބު ރައީސްގެ ޕޯސްޓުގައި އިލްތިމާސް ކުރައްވާފައިވަނީ ވިއްސާރައާ ގުޅިގެން ލިބެމުންދާ ގެއްލުންތައް ކުޑަކުރުމަށް އާންމުން އިދާރާތަކުގެ އިރުޝާދުތަކަށް ސަމާލުކަންދީ އެެއްބާރުލުން ދިނުމަށެވެ.
އިއްޔެ، މާލޭގައި ފެން ބޮޑުވުމުގެ ސަބަބުން ދިރިއުޅެން އުނދަގޫވި ހާލަތަށް ދިޔަ 36 ގޭބިސީއެއްގެ 226 މީހަކަށް ވަގުތީ ބޯހިޔާވަހިކަމާއި، ކެއިންބުއިން ފޯރުކޮށްދީފައިވާ ކަަމަށް ނެޝަނަލް ޑިޒާސްޓަ މެނޭޖްމެންޓު ސެންޓަރުން ބުނެފައިވެ އެވެ.
އެ ސެންޓަރުން ބުނީ ފެން ބޮޑުވުމުގެ ސަބަބުން އެހީތެރިކަމަށް އެދި 774 ތަނަކުން ރިޕޯޓުކުރި ކަމަށާއި އޭގެ ތެރެއިން 554 ފަރާތުން އެދުނީ ފެން ވަނުން މައިތިރިކުރަން ވެލި ބަސްތާ ޖަހައި ދިނުމަށް ކަމަށެވެ.
މެޓް އޮފީހުން ލަފާކުރާ ގޮތުގައި މިއަދު ވެސް ބޯކޮށް ވާރޭވެހި، ވައި ގަދަވާނެ އެވެ. ހަވީރު 6:00 އާ ހަމައަށް މޫސުން ލަފާކޮށް، މެޓް އޮފީހުން ބުނީ އުތުރާއި މެދުރާއްޖެތެރޭގެ އެކި ހިސާބަށް ވިއްސާރަކޮށް، ބައެއް ރަށްތަކަށް ބޯކޮށް ވާރޭވެހި ގުގުރުން އެކަށީގެންވާ ކަމަށެވެ.
