ލަންޑަން (ޖެނުއަރީ 2) - އިނގިރޭސި ޕްރިމިއާ ލީގުގައި ރޭ ފަހަތުން އަރައި 3-1 އިން ބްރެންޓްފޯޑް ބަލިކޮށް އާސެނަލުން އާ އަހަރު ރަނގަޅު މޮޅަކުން ފަށައިފި އެވެ.
މި ނަތީޖާއާ އެކު، އާސެނަލުން ލީގުގެ ދެ ވަނަ އަށް ޖެހިލައި، އެއް ވަނައިގައި އޮތް ލިވަޕޫލްގެ ލީޑު ވަނީ ހަ ޕޮއިންޓަށް ކުޑަކޮށްފަ އެވެ. ލިވަޕޫލް، މި ވަގުތު އެއް ވަނައިގައި އޮތީ 18 މެޗުން 45 ޕޮއިންޓާ އެކު އެވެ. ދެ ވަނައިގައި އޮތް އާސެނަލަށް 19 މެޗުން ވަނީ 39 ޕޮއިންޓް ލިބިފަ އެވެ. ތިން ވަނައިގައި އޮތް ނޮޓިންހަމް ފޮރެސްޓަށް 19 މެޗުން ލިބިފައިވަނީ 37 ޕޮއިންޓެވެ.
ބްރެންޓްފޯޑް ދަނޑުގައި ރޭ ކުޅުނު މެޗުގައި ލީޑުނެގީ އެ ޓީމުންނެވެ. އާސެނަލުން މެޗު ފަށައިގެން ކުރިއަށް ޖެހިގެން ކުޅެމުން ދަނިކޮށް، ބްރެންޓްފޯޑުން ކައުންޓަ އެޓޭކުގައި ފޮނުވާލި ހަމަލާއަކުން ލީޑުނެގި އެވެ. މި ލަނޑު ޖެހީ ރަނގަޅު ފޯމެއްގައި ހުރި ބްރެންޓްފޯޑްގެ ތަރި، ބްރަޔާން އެމްބުއޭމޯ އެވެ.
ފުރަތަމަ ހާފު ނިމުމުގެ ކުރިން އާސެނަލުން އެއްވަރުކުރީ ގަބްރިއެލް ޖީސޫސް ޖެހި ގޯލުންނެވެ. އާސެނަލްގެ ތޯމަސް ޕާޓޭ ޖެހި ޝޮޓެއް ބްރެންޓްފޯޑް ކީޕަރު، މާކް ފްލެކެން އަތުގައި ޖެހިފައި ނުކުތްތަނާ ޖީސޫސް ވަނީ ބޮލުން ގޯލުގެ ތެރެއަށް ބޯޅަ ފޮނުވާލައިފަ އެވެ.
އާސެނަލުން ވަނީ ދެ ވަނަ ހާފުގެ ކުރީކޮޅުގައި، ތިން މިނިޓް ތެރޭ ދެ ގޯލު ޖަހައިފަ އެވެ. އެ ގޮތުން، އާސެނަލުން ލީޑުނެގި ގޯލު މެޗުގެ 50 ވަނަ މިނިޓްގައި މިކޭލް މެރީނޯ ޖެހީ އޭރިއާތެރެއިން ބްރެންޓްފޯޑް ކުޅުންތެރިންނަށް ސަލާމަތްނުކުރެވިގެން އުޅުނު ބޯޅައެއް ހޯދުމަށް ފަހު އެވެ. އޭގެ ތިން މިނިޓް ފަހުން، ގަބްރިއެލް މާޓިނެލީ ވަނީ އާސެނަލްގެ ތިން ވަނަ ގޯލު ޖަހައިފަ އެވެ.
