މެންޗެސްޓާ (ޑިސެމްބަރު 31) - އިނގިރޭސި ޕްރިމިއާ ލީގުގައި ރޭ 2-0 އިން ނިއުކާސަލް ޔުނައިޓެޑް އަތްދަށުވެ، މެންޗެސްޓާ ޔުނައިޓެޑުން 45 އަހަރު ތެރޭ ފުރަތަމަ ފަހަރަށް އަމިއްލަ ދަނޑުގައި ޖެހިޖެހިގެން ލީގުގެ ތިން މެޗުން ބަލިވިއިރު، އެ ޓީމު ރެލިގޭޓްވެދާނެ ކަމުގެ ބިރު އެބައޮތް ކަމަށް ކޯޗު ރުބެން އަމޮރިމް ބުނެފި އެވެ.
މިއީ، 1979 ވަނަ އަހަރުގެ ފަހުން ޔުނައިޓެޑުން އަމިއްލަ ދަނޑުގައި ލީގުގައި ޖެހިޖެހިގެން ތިން މެޗުން ބަލިވި ފުރަތަމަ ފަހަރެވެ. އަދި 1962 ވަނަ އަހަރުގެ ފަހުން، އެއް މަސް ތެރޭ ލީގުގެ ފަސް މެޗުން ބަލިވި ފުރަތަމަ ފަހަރެވެ. އަދި 1972 ވަނަ އަހަރުގެ ފަހުން، ލީގުގައި ނިއުކާސަލް އަތުން އަމިއްލަ ދަނޑުގައި ބަލިވި ދެ ވަނަ ފަހަރެވެ.
ރޭގެ ނަތީޖާއާ އެކު، ޔުނައިޓެޑް މި ވަގުުތު އޮތީ ލީގުގެ 14 ވަނައިގަ އެވެ. އެއީ 19 މެޗުން ހޯދި 22 ޕޮއިންޓާ އެކު އެވެ. ރެލިގޭޝަން ޒޯނާއި ޔުނައިޓެޑާ ދެމެދު އޮތީ ހަތް ޕޮއިންޓުގެ ފަރަގެކެވެ.
ޔުނައިޓެޑްގެ ކޯޗު އަމޮރިމް ބުނީ، ރެލިގޭޝަނަކީ އެ ޓީމަށް އޮތް ބިރެއް ކަމަށެވެ.
"އަހަރެމެން އެބަޖެހޭ މި ހިނގާ ކަންކަން ސަޕޯޓަރުންނަށް ސާފުކޮށް ބުނެދޭން. އަހަރެންގެ ވެސް މައްސަލަ އެބަހުރި، ޓީމުގެ ހާލަތު އަހަންނަށް ބަދަލެއް ނުކުރެވޭ. ދެން، ބައެއް ކަންކަން ދަނީ އަހަރެން ބޭނުންވިޔަސް އެ ގޮތަކަށް ނޫން ދަނޑުމަތީގައި، މި ޓީމުގެ ގިނަ ބަޔަކު ނޫނީ މި ކްލަބްގެ ގިނަ ބަޔަކު ތިބީ ޝަކުވާ ކުރަން އާދަވެފައި. މި ކްލަބަށް ޝޮކެއް އެބަ ބޭނުންވޭ،" އަމޮރިމް ބުންޏެވެ.
ރޭގެ މެޗުގެ ހަތަރު ވަނަ މިނިޓްގައި ނިއުކާސަލް އިން ލީޑުނެގީ އަލެކްސަންޑަ އިސާކް ޖެހި ގޯލުންނެވެ. އަދި ޖޮއެލިންޓަންގެ ގޯލުން ފުރަތަމަ ހާފުގައި ނިއުކާސަލް އިން ލީޑުފުޅާކުރި އެވެ. ޔުނައިޓެޑުން ގިނަ އެޓޭކްތަކެއް ކުރި މި މެޗުގައި އެ ޓީމަށް ލަނޑު ޖަހައިދޭން އަމަދު ޑިއާލޯ އާއި ކަސެމީރޯ އަށް ރަނގަޅު ފުރުސަތުތަކެއް ލިބި ބޭނުމެއް ނުކުރެވުނެވެ.
ސަސްޕެންޝަންގެ ސަަބަބުން ރޭގެ މެޗުގައި ޔުނައިޓެޑްގެ ކެޕްޓަން، ބްރޫނޯ ފެނާންޑޭސް ނުކުޅެ އެވެ.
މި މޮޅާ އެކު، ނިއުކާސަލް ޔުނައިޓެޑް އޮތީ ލީގުގެ ފަސް ވަނައިގަ އެވެ. އެއީ، 19 މެޗުން 32 ޕޮއިންޓް ހޯދައިގެންނެވެ.
