ދެކުނު ކޮރެއާގެ ޖެޖޫ އެއާގެ ބޯޓެއް އެ ގައުމުގެ މުއާން އިންޓަނޭޝަނަލް އެއާޕޯޓަށް ޖައްސަން އުޅުމުގެ ތެރޭގައި ގޮވައި، 60 އަށް ވުރެ ގިނަ މީހުން މަރުވެއްޖެ އެވެ.
ނިއުސް ރިޕޯޓުތައް ބުނާ ގޮތުން ބެންކޮކުން ދެކުނު ކޮރެއާއަށް ދަތުރުކުރި އެ ބޯޓުން ޖުމުމަ 181 މީހުން ދަތުރު ކުރި އެވެ. ނަމަވެސް މިހާތަނަށް ކަށަވަރު ވެފައި ވަނީ ދެ މީހަކު ސަލާމަތް ކުރެވުނު ކަމަށެވެ.
މުއާން އިންޓަނޭޝަނަލް އެއާޕޯޓުގައި ރެސްކިއު ޓީމުތަކުން ބޮޑު އޮޕަރޭޝަނެއް ދަނީ ކުރިއަށް ގެންދަމުންނެވެ.
ދެކުނު ކޮރެއާގެ ވަގުތީ ރައީސް ޗޯއި ސަންގް-މޮކް ވިދާޅުވީ މިވަގުތު އެންމެ އިސްކަން ދެނީ ރެސްކިއު އޮޕަރޭޝަނަށް ކަމަށާއި އެ ސަރަހައްދުގައި ކަމާބެހޭ ފަރާތްތަކުން ހަރަކާތްތެރިވަމުންދާ ކަމަށެވެ.
ރިޕޯޓްތައް ބުނާ ގޮތުން އެ ބޯޓު ގޮވަން މެދުވެރިވީ ޓެކްނިކަލް މައްސަލައަކާ ގުޅިގެން ލޭންޑިން ގިއާ ފެއިލްވުމުންނެވެ. ނަމަވެސް މިހާތަނަށް ރަސްމީ އެއްވެސް އިދާރާއަކުން ބޯޓު ގޮވަން މެދުވެރިވި ސަބަބެއް ހާމަ ކޮށްފައެއް ނުވެ އެވެ.
މިދިޔަ ހަފްތާގައި އަޒަރުބައިޖާން އެއާލައިންސްގެ މަތިންދާ ބޯޓެއް ކަޒަކްސްތާނަށް ވެއްޓި 37 މީހުން މަރުވި އެވެ. އެ ބޯޓު ވެއްޓެން މެދުވެރިވި ސަބަބު ދަނީ ތަހުގީގު ކުރަމުންނެވެ.
