ލަންޑަން (ޑިސެމްބަރު 28) - އިނގިރޭސި ޕްރިމިއާ ލީގުގައި ރޭ ކުޅުނު މެޗުން އިޕްސްވިޗް ޓައުން 1-0 އިން ބަލިކޮށް އާސެނަލުން ލީގުގެ ދެ ވަނަ އަށް ޖެހިލައިފި އެވެ.
ލީގުގެ އެއް ވަނައިގައި އޮތް ލިވަޕޫލަށް 17 މެޗުން 42 ޕޮއިންޓް ހޯދައިފަ އެވެ. އާސެނަލުން ދެ ވަނަ އަށް އެރީ 18 މެޗުން 36 ޕޮއިންޓް ހޯދައިގެންނެވެ. ތިން ވަނައިގައި އޮތް ޗެލްސީ އަށް ވަނީ 18 މެޗުން 35 ޕޮއިންޓް ލިބިފަ އެވެ.
އާސެނަލްގެ އެމިރޭޓްސް ސްޓޭޑިއަމްގައި ރޭ ކުޅުނު މެޗުގައި އެ ޓީމުން ޖެހި ހަމައެކަނި ލަނޑު ކާމިޔާބުކުރީ ފުރަތަމަ ހާފުގަ އެވެ. އެ ގޮތުން، މި ލަނޑު ޖެހީ ލެއަންޑްރޯ ޓްރޮސާޑް އޭރިއާތެރެއިން ނަގައިދިން ހުރަހަކުން ކައި ހަވާޓްޒް އެވެ.
އިތުރު ގޯލު ޖަހަން ވެސް އާސެނަލުން މި މެޗުގައި ފުރުސަތު ތަނަވަސްކޮށްފައިވެ އެވެ. އެ ގޮތުން، އެ ޓީމުގެ ޑިފެންޑަރު، ގަބްރިއެލް މަގާޅައެސް އަށް ހުސްކޮށް ލިބުނު ފުރުސަތެއްގައި ފޮނުވާލި ބޯޅަ ދިޔައީ ގޯލާ ސީދާނުވެ އެވެ.
މި މެޗަށް ފަހު، އާސެނަލްގެ ކޯޗު މިކޭލް އާޓެޓާ ބުނެފައިވަނީ، އަނިޔާގެ މައްސަލަތަކުގެ ސަބަބުން ޓީމު އުނދަގޫ ހާލަތެއްގައި އޮއްވައި މި ލިބުނީ މުހިންމު މޮޅެއް ކަމަށެވެ. އެކަމަކު، ސީޒަނުގައި ކުރިއަށްދާއިރު، ގޯލު ޖަހަން ލިބޭ ފުރުސަތުތަކުގެ ބޭނުން މި އަށް ވުރެ ރަނގަޅަށް އާސެނަލުން ހިފަން ޖެހޭ ކަމަށް އާޓެޓާ ވަނީ ބުނެފަ އެވެ.
އާސެނަލްގެ ތަރި ބުކާޔޯ ސަކާގެ ފަލަމަސްގަނޑަށް ލިބުނު އަނިޔާ އިން ރަނގަޅުވުމަށް ވަނީ އޮޮޕަރޭޝަނެއްކޮށްފަ އެވެ. އާޓެޓާ ބުނީ، ސަކާ އެނބުރި އަންނަން ދެ މަހަށް ވުރެ ދިގު މުއްދަތެއް ނެގުމުގެ ފުރުސަތު ބޮޑު ކަމަށެވެ.
