ރާއްޖޭގެ އެންމެ ފުރަތަމަ ޕްރައިވެޓު ހޮސްޕިޓަލު، އޭޑީކޭގެ މި އަހަރުގެ އެންމެ ރަނގަޅު މުވައްޒަފަކަށް، ޕްރެކްޓިސިން ނާސް މެނޭޖަރު ފާތިމަތު އާސްތާނާ ހޮވިއްޖެ އެވެ.
އޭޑީކޭ ހޮސްޕިޓަލްގައި ވަޒީފާ އަދާކުރަން ފެށި ފަހުން ވޭތުވެދިޔަ އަހަރުތަކުގައި އެކި ދާއިރާތަކުން ރަން ވަނަތަކާއި މަގާމުތައް ހޯދާފައިވާ އާސްތާނާ، މި އަހަރުގެ ސްޓާފް އޮފް ދަ އިޔާގެ މަގާމު ހޯދުމުން، އިނާމެއްގެ ގޮތުގައި އިނގިރޭސިވިލާތުގެ ލަންޑަންގައި ފަސް ދުވަހުގެ ޗުއްޓީއެއް ދޭން ނިންމައިފަ އެވެ.
ރޭ ބޭއްވި އެވޯޑް ހަފްލާގައި ހައި ޕާފޯމާސް، އެކްސެލެންޓް ޕާފޯމާސް، ސިލްވާ ޕާފޯމާސް، ގޯލްޑް ޕާފޯމާސް އަދި 100 ޕަސަންޓް އެޓެންޑެންސް ހޯދި މުވައްޒަފުންގެ އަގުވަޒަން ކުރި އެވެ.
ސިލްވާ ޕާފޯމަރުންނަށް ހޮވުނު މުވައްޒަފުންނަށް 7،500ރ. ފައިސާގެ އިނާމެއް، އަދި ގޯލްޑް ޕާފޯމަރުންނަށް ހޮވުނު މުވައްޒަފުންނަށް 10،000ރ. އިނާމެއްގެ ގޮތުގައި ދީފައިވެ އެވެ.
ސިލްވާ ޕާފޯމާސް:
- ފާތިމަތު އަމްނާ އަބްދުﷲ
- ނިޝާ ކުމާރު
- ސީމާ މުހައްމަދު
- އަލީ ހުސެއިން
- ތަސާރަތަން ކާންނިއާ
ގޯލްޑް ޕާފޯމާސް:
- ޑރ. ދުސޫމާ އަބްދުލް ރައްޒާގް
- ހަސަން މުހައްމަދު ޝައިހް ދާއޫދު
- އައިޝަތު މާޔާ
- ޑރ. ޕަޝައްނާ އަޗަރްވާ
- ޑރ. ނުޒްހާ މުހައްމަދު
މީގެ އިތުރުން އޭޑީކޭގައި 15 އަހަރު ހިދުމަތްކުރި 35 މުވައްޒަފުންނާއި، 20 އަހަރު ހިދުމަތްކުރި 11 މުވައްޒަފުންނާއި 25 އަހަރު ހިދުމަތްކުރި ތިން މުވައްޒަފުންގެ އިތުރުން 30 އަހަރު ހިދުމަތްކުރި ތިން މުވައްޒަފެއްގެ އަގުވަޒަން ކުރި އެވެ.
އެވޯޑް ހަފްލާގައި އޭޑީކޭ ހޮސްޕިޓަލުގެ މެނޭޖިން ޑިރެކްޓަރު އަހުމަދު އައްފާލް ވިދާޅުވީ އެ ހޮސްޕިޓަލުގެ މުވައްޒަފުން ބަލިމީހުންނަށް ދޭ ހިދުމަތާއި ކުރާ ބުރަ މަސައްކަތް ބަލައިގަންނަ ކަމަށާއި ރެޔާއި ދުވާލު ހަމަ ނިދި ނަގާލާފައި މަސައްކަތް ކުރާ މުވައްޒަފުން ވެސް ތިބޭ ކަމަށެވެ.
އެމްޕްލޯއީ ޕާފޯމަންސް އެވޯޑްސް ފާއިތުވެދިޔަ އަހަރުތަކުގައި ވަރަށް ވާދަވެރި އެވޯޑަކަށް ވެފައިވާކަން ފާހަގަކުރައްވާ އައްފާލް ވިދާޅުވީ ވާދަވެރިކަން ބޮޑުވުމުން މިފަހަރުގެ އެމްޕްލޯއީ އޮފް ދަ އިޔާ ހޮވުމަށް ވެސް އުނދަގޫތަކެއް ކުރިމަތިވި ކަމަށެވެ.
"މި އެވޯޑަށް މުވައްޒަފުން ހޮވުމަށް އޮންނަ ޕްރޮސެސް ފުރިހަމަ ކުރުމަށް އަހަރެއް އެބަ ނަގާ. އެގޮތަށް އެކަން ކުރަނީ އެވޯޑަށް ހޮވާ މުވައްޒަފުންނަކީ ހައްގު މުވައްޒަފުންކަން ކަށަވަރު ކުރުމަށް. އެބަތިބި ވަރަށް ބުރަ މަސައްކަތް ކުރާ މުވައްޒަފުން ރެޔާއި ދުވާލު ރަނގަޅަށް ހަމަ ނިދިވެސް ނުނިދާ،" އައްފާލް ވިދާޅުވި އެވެ.
އެވޯޑު ހަފްލާ ޝަރަފުވެރި ކޮށްދެއްވީ ސިވިލް ސާވިސް ކޮމިޝަންގެ ރައީސް މުހައްމަދު ނާސިހު އެވެ. އެ ހަފްލާގައި އޭޑީކޭ ހޮސްޕިޓަލުގެ އިސްވެރިންނާއި މުވައްޒަފުން ވެސް ވަނީ ބައިވެރިވެފަ އެވެ.
