މިލާން (ޑިސެމްބަރު 27) - އޭސީ މިލާންގެ ޓެކްނިކަލް ޑިރެކްޓަރުގެ މަގާމުން މިދިޔަ އަހަރު ވަކިވި އެ ޓީމުގެ ކުރީގެ ކެޕްޓަން، ޕައޮލޯ މަލްޑިނީ ނެތްތަން އެ ކްލަބަށް ފޫބެއްދިފައިނުވާ ކަމަށް މިލާންގެ ކުރީގެ ކޯޗު ބްރެޒިލްގެ ލިއޮނާޑޯ އަރައުހޯ ބުނެފި އެވެ.
މިލާނުގެ ސްޕޯޓިން ޑިރެކްޓަރަކަށް 2018 ވަނަ އަހަރު ހަމަޖެއްސި މަލްޑިނީ އެއް އަހަރު ފަހުން ޓެކްނިކަލް ޑިރެކްޓަރަކަށް ޕްރޮމޯޓްކުރި އެވެ.
މަލްޑިނީ، 55، މިދިޔަ އަހަރު ޖޫން މަހު އެ މަގާމު ދޫކޮށްލީ އެ ކްލަބް ހިންގަން ހަވާލުވެހުރި އެމެރިކާގެ ވިޔަފާރިވެރިން އެކަށީގެންވާ ވަރަށް ހަރަދުކުރަން ދެކޮޅު ހަދާތީ އާއި ކްލަބް ހިންގަން އުޅޭ ގޮތާ މެދު ހިތްހަމަނުޖެހުންތަކެއް ހުރުމުންނެވެ. އެ ގޮތުން މިލާން ހިންގަން، މީގެ އެއް އަހަރު ކުރިން، ހަވާލުވި އެމެރިކާގެ ރެޑްބާޑް ކެޕިޓަލް ޕާޓްނާސްގެ އެއް ވެރިޔާ، ގެރީ ކާޑިނޭލް، މިލާނުގެ ޓްރާންސްފާ ޕޮލިސީ އާއި އާ ކުޅުންތެރިން ހޯދަން ކުރާ ކަންކަމުގައި ނުފޫޒު ފޯރުވާން އުޅޭތީ، މަލްޑިނީ ހިތްހަމަނުޖެހޭ ކަމަށް މީޑިއާގައި އަޑުފެތުރިފައިވެ އެވެ. މަލްޑިނީ ކޮށްދިން ހިދުމަތުގެ އަގު މިލާނުން ވަނީ ވަޒަންކޮށްފަ އެވެ.
މިލާނުގެ ޓެކްނިކަލް ޑިރެކްޓަރަކަށް 2008 ވަނަ އަހަރު ހަމަޖެއްސި ލިއޮނާޑޯ ވަނީ އޭގެ އެއް އަހަރު ފަހުން، އެއް ސީޒަނުގައި އެ ޓީމުގެ ކޯޗުކަން ވެސް ކޮށްފަ އެވެ. އިންޓަ މިލާނަށް ވެސް ފަހުން ކޯޗުކޮށްދިން ލިއޮނާޑޯ ބުނީ، މިލާނުގެ ލެގަސީ ދަމަހައްޓައި އެ ކްލަބް އަލުން ކޮޅަށް ޖަހަން މަލްޑިނީ ކުރި މަސައްކަތަށް ފަހު، އޭނާ އެ ކްލަބުން ދިއުމުން އެ މަގާމު އަދި ފޫބެއްދިފައިނުވާ ކަމަށެވެ.
"މިލާނުގެ ލެެޖެންޑަރީ ކެޕްޓަނެއް އެއީ. ފަހުން މެނޭޖްމަންޓަށް އައިސް ފަސް އަހަރު އެ ކުރި މަސައްކަތުން މުޅި މިލާންގެ ކަންކަން ބަދަލުވި، އަހަންނަށް 25 އަހަރު ވަންދެން ދެކެފަރިތަ މޫނެއް ޕައޮލޯ (މަލްޑިނީ) އަކީ، އެ ވަރުގެ މީހެއް މެނޭޖްމަންޓުން ދިއުމުން، އެ މަގާމު ފޫބައްދަން މިލާނަށް އަދި އެކަށޭނެ މަސައްކަތް ނުކުރެވޭ،" ލިއޮނާޑޯ ބުންޏެވެ.
މަލްޑިނީ މިލާނުގެ މެނޭޖްމަންޓުގެ ތެރެއަށް ގެނައުމުގައި ވެސް ލިއޮނާޑޯގެ ހިއްސާ އެބައޮތެވެ. އެއީ، މިލާނުގެ ޓެކްނިކަލް ޑިރެކްޓަރަކަށް 2018 އިން 2019 އަށް ލިއޮނާޑޯ މަސައްކަތްކުރުމުގެ ތެރެއިންނެވެ.
