ގެދޮރުވެރިޔާ ސްކީމުގެ ދަށުން ދޫކުރި 4،000 ފްލެޓުގެ ލިސްޓު އެކުލަވާލުމުގައި ކޮރަޕްޝަނާއި އޮޅުވާލުންތަކެއް ހުރި ކަމަށް ބުނެ އެންޓި ކޮރަޕްޝަން ކޮމިޝަން (އޭސީސީ) އިން ބަލަމުންދާ މައްސަލާގައި ބަޔަކަށް ދައުވާ ކުރުމާ މެދު ޕްރޮސެކިއުޓާ ޖެނެރަލްގެ އޮފީހާ އެކު މަޝްވަރާތައް ފަށައިފި އެވެ.
އޭސީސީން މިރޭ ނެރުނު ބަޔާނެއްގައި ބުނީ، މަޝްވަރާ ކުރެވެނީ ފުލެޓު ދޫކުރި މައްސަލާގައި ހިމެނޭ ފަރާތްތަކާމެދު ދައުވާ ކުރުމާމެދު ގޮތެއް ނިންމުމަށް ކަމަށެވެ. ނަމަވެސް އެއީ ކޮން ބައެއް ކަމެއް މި ބަޔާނުގައި ހާމަކޮށްފައެއް ނުވެ އެވެ.
"އާންމު މަސްލަހަތު ބޮޑު މި މައްސަލާގެ ޑިއުޓީ ޕްރޮސެކިއުޝަން ނިންމާ ދައުވާކުރެވޭނެ ފަރާތްތަކުގެ މައްޗަށް ދައުވާ ކޮށްދިނުމަށް އެދެން، ކުރަންޖެހޭ މަސައްކަތްތައް މި ކޮމިޝަނުން ވީ އެންމެ އަވަހަކަށް ކުރަމުން ގެންދާނެ ވާހަކަ މައުލޫމާތަށްޓަކައި ދެންނެވިން،" އޭސީސީގެ ކުރު ބަޔާން ނިންމާލަމުން ބުނެފައިވެ އެވެ.
މިދިޔަ ސަރުކާރުގެ ގެދޮރުވެރިޔާ ސްކީމަށް ފޯމު ހުށަހެޅި މީހުންގެ ތެރެއިން 15،046 މީހުން ޝަރުތު ހަމަވާ ކަމަށް އޭރުގެ ސަރުކާރުން ކަނޑައެޅި އެވެ. އެމްޑީޕީ ސަރުކާރުން ނިންމީ އެ ހުރިހާ އެންމެންނަށް ވެސް ފުލެޓު ދިނުމަށެވެ.
އޭގެ ތެރެއިން އެންމެ ފުރަތަމަ ފުލެޓު ލިބޭ 4،000 މީހުންގެ ލިސްޓު އިއުލާނު ކުރިފަހުން އޭސީސީއަށް ހުށަހަޅުނު މައްސަލައަކާ ގުޅިގެން ފުލެޓުތަކުގެ މަސައްކަތް ވަގުތީ ގޮތުން ހުއްޓައިލަން އެ ކޮމިޝަނުން އެންގި އެވެ.
ތަހުގީގަށް އަހަރެއް ވީއިރު ވެސް މި މައްސަލާގައި ތުހުމަތުކުރަނީ ކޮން ބަޔަކަށް ކަމެއް އޭސީސީން ހާމައެއް ނުކުރެ އެވެ. ނަމަވެސް މި ތަހުގީގަށް ހައުސިން މިނިސްޓްރީގެ ކުރީގެ ބައެއް އިސްވެރިންނާ ސުވާލުކޮށް އެ މީހުން ސާމާނު އަތުލާފައިވެ އެވެ.
އެގޮތުން މި އަހަރު ޖޫން މަހު އޭސީސީން ވަނީ ހައުސިންގެ ކުރީގެ ސްޓޭޓް މިނިސްޓަރު އަކްރަމް ކަމާލުއްދީން ގެއަށް ވެސް ވަދެ އެވެ. އަދި އޭނާގެ ފޯނާއި ބައެއް އިލެކްޓްރޯނިކް ސާމާނު އޭސީސީން އަތުލާފައިވާ ކަން ވެސް އެނގިފައިވެ އެވެ.
ބެލެވޭ ގޮތުގައި މި މައްސަލާގައި ދައުވާ ކުރަނީ ހައުސިން މިނިސްޓްރީގެ ކުރީގެ އިސްވެރިންގެ މައްޗަށެވެ. ފުލެޓަށް ޝަރުތު ހަމަކުރުމަށް އަސްލު ނޫން ލިޔުން ހުށަހެޅި މައްސަލަތަކެއް ވެސް ފެންމަތިވި އެވެ. ވަކިވަކިން އެ މީހުންނާ ދެކޮޅަށް ދައުވާ ކުރާނެކަން އަދި ސާފެއް ނޫނެވެ.
މި ތަހުގީގު ހިނގަނިކޮށް، ފެންމަތިވި ހައުސިން ޑިވެލޮޕްމަންޓު ކޯޕަރޭޝަން (އެޗްޑީސީ) ގެ ހިޔާނާތުގެ މައްސަލަތަކާއެކު ފުލެޓު މަޝްރޫއުގެ އިތުރުން މާލޭގެ ރައްޔިތުންނަށް ގޯތި ދޭން އެމްޑީޕީ ސަރުކާރުން ހިންގި "ބިންވެރިޔާ" ސްކީމާއި ގުޅިގެން ޖިނާއި ތަހުގީގެއް ހިންގުމަށް ވެސް ޕީޖީ އޮފީހުން ވަނީ އަންގާފަ އެވެ.
އެ އެންގުމަށްފަހު، އޭސީސީން އެދިގެން ކުރިން ބުނި ހައުސިން މިނިސްޓްރީގެ ކުރީގެ ވެރިންގެ ޕާސްޕޯޓު ވަނީ ހިފަހައްޓާފަ އެވެ.
މި ފުލެޓުތަކުގެ ލިސްޓު ރީ-އިވެލުއޭޓުކޮށް އަލުން އިއުލާނުކުރުމުގެ މަސައްކަތް ވެސް މި ސަރުކާރުން ދަނީ ކުރަމުންނެވެ. އެކި ތާރީހުތައް ދިނުމަށްފަހު އެކަން ކުރުން މިހާރު ވަނީ މުއްދަތެއް ނެތް ގޮތަށް ފަސްކޮށްފަ އެވެ.
އެ މަސައްކަތުގެ ތެރެއިން ފުލެޓު ލިސްޓަށް ބަދަލު ގެނެސް ރިޝްވަތު ނެގި މައްސަލަތަކެއް މި ފަހުން ވަނީ ފެންމަތިވެފަ އެވެ. ނަމަވެސް އެ މައްސަލަތައް އޭސީސީން ބަލާ ކަމެއް އަދި ނޭނގެ އެވެ.
