ޓޫރިޒަމް މިނިސްޓަރު އިބްރާހިމް ފައިސަލް މެދުވެރިވެގެން ޓޫރިޒަމް ދާއިރާގެ ވިޔަފާރިވެރިޔަކު، ނައިފަރު ދާއިރާގެ މެންބަރު ޔާސީން އަބްދުﷲ އަށް 100،000ރ. ދިން މައްސަލައެއް ފެންމަތިވެއްޖެ އެވެ.
މި މައުލޫމާތު އެނގޭ އިތުބާރު ކުރެވޭ މަސްދަރަކުން އަދަދު ނޫހަށް ބުނީ މާފުށީގައި އެންމެ ފުޅާ ދާއިރާއެއްގައި ލޯކަލް ޓޫރިޒަމްގެ ވިޔަފާރި ހިންގާ ކާނި ހޮޓަލްގެ މައި ކުންފުނި، އަސްނާ އިންވެސްޓުމެންޓު ޕްރައިވެޓު ލިމިޓެޑުން، މެންބަރުން ޔާސީންގެ ބީއެމްއެލް އެކައުންޓަށް 100،000ރ. ޖަމާކޮށްފައި ވަނީ މި އަހަރުގެ އޮކްޓޯބަރު 28 ގައި ކަމަށެވެ.
އެ މުއާމަލާތުގެ ބޭންކް ޓްރާންސްފާ ސްލިޕް އަދި ޔާސީން އާއި ފައިސަލްއާ ވަޓްސްއެޕްއިން ދައްކާފައިވާ ވާހަކަތަކުގެ ޗެޓްލޮގުތަކެއް ވެސް އަދަދު ނޫހަށް ލިބިފައިވެ އެވެ.
އެ ޗެޓްލޮގުތަކުން އެނގޭ ގޮތުގައި ޔާސީން ފައިސާ ހޯދީ ދަރަންޏެއް އަދާކުރާށެވެ.
"...ވަރަށް ހާލުުގައި ހުއްޓައި ތިޔަކޮށް ދެެއްވާ ކަންތައް އުމުރަށް ވެސް ހަނދާން ހުންނާނެ،" ކަމަށް ޔާސީން ވިދާޅުވެފައިވެ އެވެ.
ފައިސާގެ މި މުއާމަލާތާ ގުޅިގެން މެންބަރު ޔާސީންއަށް 'އަދަދު' ނޫހުން ސުވާލު ކުރުމުން ފުރަތަމަ ވިދާޅުވީ ދެ ދުވަސް ފަހުން ގުޅުމަށެވެ. އިތުރަށް ސުވާލުކުރުމުން ރޭންޖްގެ މައްސަލަ އުޅޭތީ ފޯނުން ދައްކާ ވާހަކަ ސާފު ނުވާކަމަށް ހަދައި ފޯނު ކަނޑާލީ އެވެ.
މިނިސްޓަރު ފައިސަލް ވިދާޅުވީ އޭނާ މެދުވެރި ވެގެން މެންބަރު ޔާސީން އަށް ފައިސާ ފޮނުވާފައި ނުވާނެ ކަމަށެވެ.
ނަމަވެސް އަސްނާ މޯލްޑިވްސްގެ ބޭންކް ޓްރާންސްފާ ސްލިޕް ޔާސީން އަށް ފޮނުވާފައި ވަނީ ފައިސަލެވެ.
ރައްޔިތުންގެ މަޖިލީހުގެ މެންބަރަކު އެހީއަކަށް އެދުމުން ޓޫރިޒަމްގެ ވިޔަފާރިކުރާ ވިޔަފާރިވެރިޔަކު މެދުވެރިކޮށްގެން އެ ފައިސާ ހަމަޖެއްސެވިއިރު، އެކަމުގެ މުގާބިލުގައި ވިޔަފާރިވެރިޔާއަށް ލިބެނީ ކޮން މަންފާއެއްކަމެއް މި މުއާމަލާތާ ގުޅިގެން ހުރި ލިޔުންތަކުން އެނގޭކަށް ނެތެވެ.
ޓޫރިޒަމް މިނިސްޓަރު އަމިއްލަ ވިޔަފާރިވެރިއެއްގެ އަތުން މެންބަރަކަށް ފައިސާ ދެއްވާފައި ވާއިރު، ގާނޫނުލްއުގޫބާތުގެ 513 ވަނަ މާއްދާގައި ބަޔާންކޮށްފައިވަނީ ދައުލަތުގެ މުވައްޒަފަކު އޭނާގެ މަގާމުގެ ހައިސިއްޔަތު ބޭނުންކޮށްގެން އެއްވެސް މީހަކަށް ނުހައްގު މަންފާއެއް ހޯދުމަކީ ނުވަތަ ހޯދައި ދިނުމަކީ ކުށެއް ކަމުގަ އެވެ.
