ބޮޑު ތަރުހީބަކާ އެކު އުރީދޫ މޯލްޑިވްސްއިން އިންތިޒާމު ކޮށްގެން ބޭއްވި އުރީދޫ ފަން ރަން ހުޅުމާލޭގައި ބާއްވައިފި އެވެ.
ފަން ރަންގައި 5،000 އަށްވުރެ ގިނަ މީހުން ބައިވެރިވިއިރު، އެ ދުވުން ޝަރަފުވެރި ކޮށްދެއްވީ ނައިބުރައީސް ހުސެއިން މުހައްމަދު ލަތީފް އާއި ސްޕޯޓްސް މިނިސްޓަރު އަބްދުﷲ ރާފިއުގެ އިތުރުން އުރީދޫގެ އިސްވެރިންނެވެ.
އުރީދޫގެ ޗީފް ކޮމާޝަލް އޮފިސަރު (ސީ.ސީ.އޯ) ހުސެއިން ނިޔާޒް "އަދަދު" އަށް ވިދާޅުވީ މިފަހަރުގެ ދުވުން އޮތް ގަޑީގައި ވާރޭ ވެހުނު ނަމަވެސް ބޮޑު ތަރުހީބެއް ލިބިގެންދިޔުމަކީ ލިބުނު އުފަލެއް ކަމަށެވެ.
އުރީދޫ ފަން ރަން 2024 ގެ ތެރެއިން -- ފޮޓޯ: އަތޫފް އާތިފް / އަދަދު
ފަސް ކިލޯ މީޓަރު ހިމެނޭ އެ ދުވުމުގެ ކޮންމެ ކިލޯ މީޓަރެއް ނިންމާލުމަށްފަހު، މަޖާ ހަރަކާތްތައް ކުރިއަށް ގެންދިޔަ އެވެ. އަދި ދުވުން ނިންމާލުމަށްފަހު ފޯމް ޕާޓީ އާއި ކުލަ ޖެހުން ފަދަ ހަރަކާތްތައް ވެސް ކުރިއަށް ގެންދިޔަ އެވެ.
މީގެއިތުރުން ފަން ރަންގެ ދުވުން ނިންމި މީހުންނަށް ހާއްސަ މެޑަލްއެއް އުރީދޫއިން ދިނެވެ.
ފަން ރަންއަށް ފަހު އެ ދުވުމަށް އަމާޒުކޮށް އުރީދޫއިން ފަންރަންގައި ރަޖިސްޓްރީވެފައިވާ ފަރާތްތަކުގެ ތެރެއިން ގޯޕްލޭ އެޕް ޑައުންލޯޑުކޮށް، ސައިންއަޕްކުރާ ކަސްޓަމަރުންގެ މެދުގައި ގުުރު ނަގައި ކޮލޮމްބޯ ދެކޮޅު ޓިކެޓު ލިބޭ ދެ ނަސީބުވެރިން ހޮވި އެވެ.
އުރީދޫ ފަން ރަން 2024 ގެ ތެރެއިން -- ފޮޓޯ: އަތޫފް އާތިފް / އަދަދު
އަދި ފަން ރަންގައި ރަޖިސްޓްރީވި މީހުންގެ ތެރެއިން ނެގި ގުރުއަތުލުމުން ފުޓްރެސްޓުގެ ފަރާތުން ދޭ ޕެކޭޖު ލިބޭ ދެ ނަސީބުވެރިން ވެސް ހޮވި އެވެ.
އުރީދޫ ފަން ރަންގެ އަމާޒަކީ، ދުޅަހެޔޮ ދިރިއުޅުމަކަށް، ދުވުމަކީ މަޖާ އަދި އުފާވެރިކަން ގެނުވަދޭނެ ހަރަކާތެއްކަން އަންގައިދިނުމެވެ.
