ލަންޑަން (ޑިސެމްބަރު 20) - ޔުއެފާގެ ތިން ވަނަ ފަންތީގެ ކްލަބް ފުޓްބޯޅަ މުބާރާތުގައި އިނގިރޭސި ކްލަބް ޗެލްސީން ކުޅުނު ހަ ވަނަ މެޗުގައި އަޔަލެންޑްގެ ކްލަބް ޝަމްރޮކް ރޯވާސް އަތުން 5-1 އިން މޮޅުވެއްޖެ އެވެ.
ޗެލްސީ އަކީ މި ފަހަރުގެ މުބާާރާތުގައި މިހާތަނަށް ކުޅުނު ހަ މެޗުން މޮޅުވި ހަަމައެކަނި ޓީމެވެ. އެ ޓީމު މި ވަގުތު ކޮންފަރެންސް ލީގު ތާވަލުގެ އެއް ވަނައިގައި އޮތީ ހަ މެޗުން 18 ޕޮއިންޓާ އެކު އެވެ. ޗެލްސީ ވަނީ ގަދަ އަށް ޓީމަށް ގަދަ 16 އިން ލިބޭ ސީދާ ޖާގައެއް ވެސް ކަށަވަރުކޮށްފަ އެވެ.
ދެ ވަނައިގައި އޮތް، ޕޯޗުގީސް ކްލަބް، ވިޓޯރިއާ ގީމަރޭސް އަށް ވަނީ، ހަ މެޗުން 14 ޕޮއިންޓް ލިބިފަ އެވެ.
ސްޓެމްފޯޑް ބްރިޖުގައި ރޭ ކުޅުނު މެޗުގައި ޗެލްސީގެ ތަރިއަކީ ބާސެލޯނާ ދޫކޮށް މި ފަހަރު ޗެލްސީއާ ގުޅުނު، 18 އަހަރުގެ ފޯވާޑް، މާކް ގުއިއޫ އެވެ. އޭނާ ވަނީ ފުރަތަަމަ ހާފުގައި ހެޓްރިކެއް ހަދައިފަ އެވެ. މި މުބާރާތުގައި ޗެލްސީގެ ކޯޗު އެންޒޯ މަރެސްކާ ފުރުސަތު ދެމުން އަންނަ ގުއިއޫ ވަނީ ގިނަ މެޗުތަކުގައި މޮޅު ކުޅުމެއް ދައްކައިފަ އެވެ. މި މުބާރާތުގައި ހަ ގޯލު ޖަހާފައިވެ އެެވެ.
ގުއިއޫގެ ފުރަތަމަ ގޯލުން ޗެލްސީން ލީޑުނެގި ނަމަވެސް، އަޔަލެންޑްގެ ކްލަބް ޝަމްރޮކުން އެއްވަރުކުރި އެވެ. މި ލަނޑު ޖެހީ، މާކަސް ޕޫމް ޖެހި ގޯލުންނެވެ.
އޭގެ ފަހުން، ގުއިއޫ އަލުން ޗެލްސީ އަށް ލީޑުނަގައިދިންއިރު، ކިއެރަން ޑިއުސްބަރީ ހޯލް ވަނީ ޗެލްސީގެ ތިން ވަނަ ލަނޑު ޖަހައިފަ އެވެ. ގުއިއޫ، ހެޓްރިކް ފުރިހަމަ ކުރީ ފުރަތަަމަ ހާފުގެ އިތުރު ވަގުތުގަ އެވެ. ޗެލްސީގެ ފަހު ގޯލު ދެ ވަނަ ހާފުގައި ޖެހީ، މާކް ކުކުރޭލާ އެވެ.
