ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) ގެ ތެރެއިން ބިންވެރިޔާ ސްކީމުން ގޯތި ނުލިބޭ ބަޔަކަށް އެ ސްކީމުގެ ތެރެއިން ގޯތި ލިބުނު ކަމަށް ބުނެ ވަގަށް ވިއްކި ބިންތަކުގައި އިންފާރު ނުފާނާ ކަމަށް ބުނެ އެ ކޯޕަރޭޝަން އެމްޑީ އިބްރާހިމް ފަޒުލް ރަޝީދު ހެދީ ދޮގުކަން ހާމަވެއްޖެ އެވެ.
އެޗްޑީސީން މިރޭ ބޭއްވި ނޫސްވެރިންގެ ބައްދަލުވުމުގައި ފަޒުލް ވިދާޅުވީ މައްސަލަ ދިމާވެގެން އުޅޭ ބިންތަކަށް ދިން ހުއްދަތައް ކެންސަލްކޮށްފައިވާ ކަމަށާއި، އެ ބިންތަކުގައި އިންފާރު ރާނާފައި ނުވާ ކަމަށެވެ.
"ދެ ބިމުގައި ވެސް ޕާމިޓް ދެވުނު ހިސާބަކީ އަޅގަނޑުމެންނަށް ހައިލައިޓްވެގެން އައި ހިސާބު. އެކަމަކު ފާރު ރާނާފަކާ ނޫން ހުރީކީއެއް. އެނގޭތޯ. ޕާމިޓް ދެވިފައި އޮތީ. ޕާމިޓް ކެންސަލް ކުރީ. ދެ ފަރާތަކަށް އެނގޭތޯ. ކޮންމެ ބިމެއްގެ އެކަކަށް އެނގޭތޯ،" ފަޒުލް ވިދާޅުވި އެވެ.
ނަމަވެސް "އަދަދު" ގެ ނޫސްވެރިން ބިންވެރިޔާ ސްކީމްގެ ދަށުން ދެ މީހަކަށް އެއް ގޯއްޗެއް ދިން ހުޅުމާލޭ ލޮޓް ނަންބަރު 20768 ހޯދައިގެން އެތަނަށް ދިޔައިރު އެތަނުގައި އިންފާރު ހުރީ ރާނާފަ އެވެ. އަދި އެތަނުގައި އިންފާރު ރޭނުމަށް ބޭނުންކުރި ސާމާނު ވެސް ހުއްޓެވެ.
މި މައްސަލައާ ގުޅިގެން "އަދަދު" އަށް ލިބިފައި ހުރި ބައެއް ލިޔެކިޔުންތަކާއި ސޯޝަލް މީޑިއާގައި އާންމުވެފައި ހުރި ލިޔެކިޔުންތަކުން ދައްކާ ގޮތުގައި މި ގޮތަށް އެޗްޑީސީން ދިން ގޯތިތަކެއްގެ ވެރިފަރާތް ސާފުކުރަން ހައުސިން މިނިސްޓްރީއަށް ހުށަހެޅި އެވެ. މިނިސްޓްރީން ދިން ޖަވާބުގައި ބުނީ އެ ގޯތިތަކަކީ އެއްވެސް ބަޔަކާ އެ މިނިސްޓްރީން ހިންގި ސްކީމުގެ ދަށުން ހަވާލުކޮށްފައި ހުރި ގޯތިތަކެއް ނޫން ކަމަށެވެ.
މި ގޮތަށް ދޫކޮށްފައި ހުރި އެއް ގޯތީގެ ވެރިފަރާތަކީ އެޗްޑީސީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދުގެ ބޭބެ، މުހައްމަދު ފަޒީލު ރަޝީދެވެ. އޭނާއަކީ އެމްޑަބްލިޔުއެސްސީގެ ޑެޕިއުޓީ މެނޭޖިން ޑިރެކްޓަރެވެ.
ބިންވެރިޔާ ސްކީމުގެ ލިސްޓު "އަދަދު" އިން ބެލިއިރު، އެ ސްކީމުގެ ދަށުން ގޯއްޗަކަށް އެދި ހުށަހެޅި މީހުންގެ ތެރޭގައި އޭނާ ހިމެނެ އެވެ. އެކަމަކު އުސޫލުގެ ދަށުން އޭނާގެ ޝަރުތުހަމަނުވާ ކަމަށް އޮތީ ކަނޑައަޅާފަ އެވެ. އޭނާއަށް ގޯތި ނުލިބުނީ ސަރުކާރުން ކުރިން ހިންގި ބޯހިޔާވަހިކަމުގެ ސްކީމެއްގެ ދަށުން ބޯހިޔާވަހިކަމެއް ލިބިފައިވާ މީހަކަށް ވާތީ އެވެ.
މިކަމާ ގުޅޭ ގޮތުން މި ނޫހާ ވާހަކަ ދެއްކި މަސްދަރަކުން ބުނީ، ހުޅުމާލެއިން ނުދެވި ހުރި ގޯތިތައް މީހުންނާ ހަވާލުކުރަމުން އަންނަ ކަމަށެވެ. މިކަމުގައި އިސްކޮށް ހަރަކާތްތެރިވާ ކަމަށް އޭނާ ތުހުމަތުކުރީ އެޗްޑީސީގެ އެމްޑީ ފަޒުލްއަށެވެ.
ވަގަށް ގޯތިތައް ދިން މައްސަލައިގައި ފުލުހުން ކޯޓު އަމުރެއްގެ ދަށުން އެޗްޑީސީއަށް އިއްޔެ ވަނެވެ. އަދި އެންޓި ކޮރަޕްޝަން ކޮމިޝަން (އޭސީސީ)ން ވެސް ވަނީ މި މައްސަލަ ތަހުގީގުކުރަމުން އަންނަ ކަމަށް ވެސް ބުނެފައިވެ އެވެ.
