ބިންވެރިޔާ ސްކީމްގެ ދަށުން ގޯތި ނުލިބޭ ބަޔަކަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ގޯތި ދިން މައްސަލައިގައި އެ ކޯޕަރޭޝަންގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދު ދެއްކި ވާހަކަ އާއި ހައުސިން މިނިސްޓްރީގެ ސިޓީގައި އޮތް މައުލޫމާތާ ދިމާ ނުވާކަން ހާމަވެއްޖެ އެވެ.
އެޗްޑީސީން މިރޭ ބޭއްވި ނޫސްވެރިންގެ ބައްދަލުވުމުގައި ފަޒުލް ވިދާޅުވީ ގޯތީގެ ވަށާފާރު ރޭނުމުގެ ހުއްދަ ދިނުމުގެ ޕްރޮސެސް ފަށާފައިވާނީ މިނިސްޓްރީއިން މައުލޫމާތު ހޯދުމަށްފަހުގައި ކަމަށެވެ.
"އެ ދެ ޕްލޮޓްގެ މައުލޫމާތު އަޅުގަނޑުމެން ހައުސިން މިނިސްޓްރީ މެދުވެރިކޮށް ވެރިފައި ކޮށްފައި އަޅުގަނޑުމެން މި ޕްރޮސެސް އިނީޝިއޭޓް ކުރީ. އަޅުގަނޑުމެން އެއްވެސް ހާލަތެއްގައި މިނިސްޓްރީ އޮފް ހައުސިންއިން ނާންގާ ފަރާތަކަށް އަޅުގަނޑުމެން މިތަނުން ބިމެއް ހަވާލު ކޮށްފައެއް ނުވާނެ. އެކަމުގެ ފުރިހަމަ ޔަގީންކަން އަޅުގަނޑު އަރުވަން،" މިރޭ ބޭއްވި ނޫސްވެރިންގެ ބައްދަލުވުމުގައި ފަޒުލް ވިދާޅުވި އެވެ.
މައްސަލަ ޖެހުނު ގޯއްޗަކާ ގުޅިގެން ހައުސިންގ މިނިސްޓްރީއިން އެޗްޑީސީއަށް ފޮނުވި ސިޓީއެއްގެ ކޮޕީއެއް ވަނީ 'އަދަދު' ނޫހަށް ލިބިފަ އެވެ. އެޗްޑީސީއިން ހަވާލާދީފައިވާ ގޯއްޗަކީ ބިންވެރިޔާ ސްކީމުގެ ދަށުން އެއްވެސް ފަރާތަކަށް ދޫކޮށްފައި ނުވާ ގޯއްޗެއްކަމަށް އެ ސިޓީގައި ވަރަށް ސާފުކޮށް ބުނެފައި އެބަ އޮތެވެ.
"ތިޔަ ކޯޕަރޭޝަނުގެ ސިޓީގައި ބަޔާންކޮށްފައިވާ ފަރާތްތަކަކީ މި ސްކީމްއިން ގޯއްޗަށް އެދި އެޕްލިކޭޝަން ހުށަހަޅާފައިވާ ފަރާތްތަކެއް ނޫންކަން މި ސްކީމްގެ ޑޭޓާބޭސްއިން ދައްކައެވެ. އަދި މަތީގައި ހަވާލާދެވުނު ސިޓީތަކުގައި ބަޔާންކޮށްފައިވާ 20821 އާއި 20768 ނަންބަރު ގޯތިތަކަކީ މި މިނިސްޓްރީއިން މިހާތަނަށް އެއްވެސް ފަރާތަކާ ހަވާލުކޮށްފައިނުވާ ދެ ގޯތި ކަމުގައިވެސް ދެންނެވީމެވެ." ހައުސިންގ މިނިސްޓްރީއިން ފޮނުވި ސިޓީގައި ވެއެވެ. މި ސިޓީ އެ މިނިސްޓްރީއިން ފޮނުވީ އޮގަސްޓް 15، 2024 ގަ އެވެ.
އެހެންކަމުން، މި ގޯތީގެ އިންފާރު ރޭނުމަށް ހުއްދަ ދިންއިރު، މިއީ އެއްވެސް ފަރާތަކަށް ދީފައިވާ ބިންތަކެއް ނޫންކަން އެޗްޑީސީއަށް ވަނީ އެންގިފަ އެވެ.
ވަގަށް ގޯތިތަކެއް ދިން މައްސަލައިގައި ޖަވާބުދާރީވާން ބޭއްވި ނޫސްވެރިންގެ ބައްދަލުވުމެއްގައި ފަޒުލް ވަނީ އޭނާއަށް ކުރެވޭ ހުރިހާ ތުހުމަތުތަކެއް ދޮގުކުރައްވާފަ އެވެ. އަދި ވިދާޅުވީ ބިންތައް ހަވާލުކުރުމުގެ އެއްބަސްވުންތަކާއި ރަޖިސްޓްރީތައް ހަދައި ދިނުމަކީ ހައުސިން މިނިސްޓްރީން ކުރާ ކަމެއް ކަމަށާއި އެކަމުގައި އެޗްޑީސީގެ ދައުރެއް ނޯންނާނެ ކަމަށެވެ.
ފަޒުލް ވިދާޅުވި ގޮތުން ނަމަ މިކަން ސަމާލުކަމަަށް އައީ ވެސް އެ ކުންފުނިން މިކަމުގައި އޮންނަ އުސޫލުގެ ތެރެއިން ކަންކަން ކުރީމަ އެވެ. އެއީ އެހެން ބަޔެއްގެ ނަން މަތީގައި ރަޖިސްޓްރީކޮށްފައި އޮތް ގޯތިތަކެއްގައި ވަށާފާރު ރާނަން ހުއްދައަށް އެދި އެ ކުންފުންޏަށް އެދި ހުށަހެޅުމުން އެކަން ސާފުކުރަން ހައުސިންގައި އެދުމުންނެވެ.
ފަޒުލް ވިދާޅުވި ގޮތުގައި މި މައްސަލައިގެ ތެރޭގައި އޭނާގެ ބޭބެ ހިމެނުމަކީ އިއްތިފާގެކެވެ. އަދި "އަމިއްލަ ލޭ ހިނގިޔަސް" ކަން ކުރާނީ އޮންނަ އުސޫލުގެ ތެރެއިން ކަމަށް އޭނާ ތަކުރާރުކޮށް ވިދާޅުވި އެވެ.
ފަޒުލް އިތުރަށް ވިދާޅުވީ، ހައުސިންއިން ނާންގާ އެއްވެސް މީހަކަށް އެޗްޑީސީން ގޯތި ދީފައި ނުވާނެ ކަމުގެ ޔަގީންކަން އަރުވާ ކަމަށެވެ.
ބިންވެރިޔާ ސްކީމްގެ ދަށުން ގޯތި ނުލިބޭ ފަރާތްތަކަށް ގޯތި ދިން މައްސަލަ ފުލުހުންގެ އިތުރުން އެންޓި ކޮރަޕްޝަން ކޮމިޝަން (އޭސީސީ) އިން އަންނަނީ ތަހުގީގު ކުރަމުންނެވެ.
