މެންޗެސްޓާ (ޑިސެމްބަރު 18) - މެންޗެސްޓާ ޔުނައިޓެޑް ދޫކޮށްލާނަމަ އެކަން ކުރާނީ ރީތި ގޮތުގައި ކަމަށާއި މިއީ ކެރިއަރުގައި އާ ޗެލެންޖެއް ނަގަން ބޭނުންވާ ވަގުތެއް ކަމަށް ޔުނައިޓެޑްގެ އިނގިރޭސި ފޯވާޑް، މާކަސް ރެޝްފޯޑް ބުނެފި އެވެ.
އިނގިރޭސި ޕްރިމިއާ ލީގުގައި ޔުނައިޓެޑުން ފަހަތުން އަރައި ސިޓީ ދަނޑުގައި އެ ޓީމު އަތުން 2-1 އިން މޮޅުވި މެޗަށް ޔުނައިޓެޑްގެ ކޯޗު ރުބެން އަމޮރިމް ނެގި ސްކޮޑުން ރެޝްފޯޑާއި އަލެހަންދްރޯ ގާނާޗޯ އަށް ފުރުސަތެއް ނުލިބުނެވެ. އެކަމާ ގުޅޭގޮތުން ކުރި ސުވާލަށް ދިން ޖަވާބުގައި އަމޮރިމް ބުނީ، އޭނާ ބޭނުންވާ ކަންކަން ޓްރެއިނިން އާއި މަސައްކަތުގެ ރޭޓުން ނުފެންނަ ކުޅުންތެރިންނަށް ފުރުސަތު ދޭން އުނދަގޫވާނެ ކަމަށެވެ.
ސިޓީ މެޗަށް ފަހު، ޔުނައިޓެޑްގެ ލެޖެންޑް، ޑޭވިޑް ބެކަމް، ސޯޝަލް މީޑިއާގައި ހިއްސާކުރި ޕޯސްޓެއްގައި ބުނެފައިވަނީ، ޔުނައިޓެޑް އަލުން އާރާސްތު ކުރުމުގެ މަސައްކަތް ރަނގަޅަށް ފަށަން ޖެހޭ ކަމަށާއި ބޮޑު މޮޅެއް މި ހޯދި ޔުނައިޓެޑްގެ ޖޯޒީގައި ކުޅެން އެ ކްލަބަށް ޓަކައި މަސައްކަތްކުރަން ބޭނުންވާ ކުޅުންތެރިންނާ އެކު ކަމަށެވެ. މިއީ، ރެޝްފޯޑާއި ގާނާޗޯ އަށް ރައްދުކޮށް ބެކަމް ބުނި އެއްޗެއް ކަމަށް ގިނަ ބަޔަކު ސޯޝަލް މީޑިއާގައި ހިޔާލުފާޅުކުރި އެވެ.
އެއާ އެކު، މިހާރު އޮތް ހާލަތާ ގުޅޭގޮތުން ރެޝްފޯޑް ވަނީ އިންޓަވިއުއެއް ދީފަ އެވެ.
އުމުރުން ހަތް އަހަރުން ފެށިގެން ޔުނައިޓެޑަށް ކުޅެމުން އަންނަ ރެޝްފޯޑް، 27، ބުނީ މިހާރު ކަންކަން ގޮސްފައި އޮތް ހިސާބަށް ބަލާއިރު އިތުރަށް ކަމެއް ގޯސްވާ ޒާތުގެ އެއްވެސް ކަމެއް ކުރަން އޭނާ ބޭނުންނުވާ ކަމަށެވެ. އަދި މީގެ ކުރިން ވެސް ޔުނައިޓެޑް ދޫކޮށް ކުޅުންތެރިން ގޮސްފައި ހުރި ގޮތް ފެންނަން އެބަހުރި ކަމަށާއި އޭނާ އެދެނީ ވީ އެންމެ ރަނގަޅަށް ކަންތައްތައް ކުރުމަށް ކަމަށް ރެޝްފޯޑް ވަނީ ބުނެފަ އެވެ.
"އަހަރެން (ޔުނައިޓެޑް ދޫކޮށް) ދާއިރު ހުރިހާ ކަމެއް އަންނާނީ އަހަރެންގެ ފަރާތުން، އެއްވެސް ބަރު ހިތެއް ނޯންނާނެ. މެންޗެސްޓާ ޔުނައިޓެޑާ ގުޅޭ ނެގެޓިވް ވާހަކައެއް ވެސް ދައްކަން ނެތް. ދެން، މީގަ އަހަރެން އަމިއްލަ އަށް ދެކޭ ގޮތެއް ހިއްސާކުރާނަމަ، މިއީ އާ ޗެލެންޖެއް ނަގައި އާ މިސްރާބަކަށް ދާންވީ ވަގުތު،" ރެޝްފޯޑް ބުންޏެވެ.
މި ވަގުތު ފޯކަސް ހުރީ ޔުނައިޓެޑުން ދެން އެންމެ އަަަަވަހަށް ކުޅޭ މެޗުގެ ސްކޮޑަށް އަރަން މަސައްކަތް ކުރުން ކަމަށް ރެޝްފޯޑް ވަނީ ބުނެފަ އެވެ.
ޔުނައިޓެޑްގެ ޔޫތު ޓީމުތަކަށް ކުޅެ، ރެޝްފޯޑް އެންމެ ފުރަތަމަ ސީނިއާ ޓީމަށް މެޗެއް ކުޅެދިނީ، 2016 ވަނަ އަހަރު އެވެ. އޭގެ ފަހުން، ސީނިއާ ޓީމުގައި މި ހޭދަވީ އަށް އަހަރު ތެރޭ އޭނާ ވަނީ އެ ޓީމަށް 426 މެޗުން 138 ގޯލު ޖަހައިފަ އެވެ.
އިނގިރޭސި މީޑިއާތަކުން ރިޕޯޓްކުރާގޮތުގައި، ރެޝްފޯޑް ދޫކޮށްލުމާ މެދު ޔުނައިޓެޑުން ވަނީ މަޝްވަރާތައް ފަށައިފަ އެވެ. އެ ގޮތުން، ކުރިއަށް އޮތް ދެ ޓްރާންސްފާ މާކެޓްގެ ތެރޭގައި، ރެޝްފޯޑް ގަންނަން 40-60 މިލިއަން ޑޮލަރުގެ ބިޑެއް ލިބިއްޖެނަމަ، އޭނާ ވިއްކާލަން ޔުނައިޓެޑުން އޮތީ ތައްޔާރަށެެވެ.
