ބެޑްމިންޓަން އެސޯސިއޭޝަން އޮފް މޯލްޑިވްސް (ބީއޭއެމް)ގެ ހިންގުން ކުޅިވަރާ ބެހޭ ގައުމީ މަޖިލީހަށް ހަވާލުކުރަން ކޮމިޝަނާ އޮފް ސްޕޯޓްސް އިން ނިންމި ނިންމުމާ ދެކޮޅަށް ބީއޭއެމް އިން ސިވިލް ކޯޓަށް ހުށަހެޅި މައްސަލަ ނާކާމިޔާބުވިއިރު، އެ މައްސަލަ ހައި ކޯޓަށް ހުށަހަޅައިފި އެވެ.
މިއީ ބެޑްމިންޓަން އެސޯސިއޭޝަނާ ގުޅޭ މައްސަލައެއްގައި، މި އަހަރު ތެރޭގައި، ދައުލަތުގެ ނިންމުމަކާ ދެކޮޅަށް ކޯޓަށް ދިޔަ ތިން ވަނަ ފަހަރެވެ.
މީގެ ކުރިން، ބެޑްމިންޓަން އެސޯސިއޭޝަންގެ ކުރީގެ ރައީސް، މޫސާ ނާޝިދު (މޫސަ) ވަނީ ޕްރޮސެކިއުޓާ ޖެނެރަލް އޮފީހާ ދެކޮޅަށް މައްސަލަ ހުށަހަޅައިގެން ކުރިއަށް ގޮސްފަ އެވެ. ބެޑްމިންޓަން އެސޯސިއޭޝަން ހިންގާ ފަރާތްތަކުގެ މައްޗަށް ކުރެވޭ ތުހުމަތުތަކާ ގުޅިގެން އެ އެސޯސިއޭޝަންގެ އޭރުގެ ރައީސް މޫސަގެ މަސްލަހަތު ހިމެނޭ، ސްޕޯޓްސް ސާމާނު ވިއްކާ ފިހާރަ، އަސްކަނި ސްޕޯޓްސް އާއި އޭނާއާ ގުޅުން ހުރި އެހެން ތަންތަން ކޯޓު އަމުރެއްގެ ދަށުން ބަލައި ފާސްކުރި މައްސަލައާ ގުޅިގެން ދައުލަތާ ދެކޮޅަށް މޫސަ ކޯޓަށް މައްސަލަ ހުށަހެޅި ނަމަވެސް ބޭނުންވި ގޮތަށް ނިންމުންތައް ނާދެ އެވެ.
އޭގެ ފަހުން، ކޮމިޝަނާ އޮފް ސްޕޯޓްސް އިން އޮގަސްޓް 15 ވަނަ ދުވަހު، ބެޑްމިންޓަން އެސޯސިއޭޝަންގެ ކަންކަން ސްޕޯޓްސް ކައުންސިލްގެ ދަށަށް ގެންނަން ނިންމި ނިންމުމާ ދެކޮޅަށް އެ މަހުގެ 29 ވަނަ ދުވަހު، ބެޑްމިންޓަން އެސޯސިއޭޝަނުން ވަނީ ސިވިލް ކޯޓަށް މައްސަލަ ހުށަހަޅައިފަ އެވެ.
ބީއޭއެމް އިން އެ މައްސަލަ ކޯޓަށް ހުށަހެޅިއިރު، ފާހަގަކޮށްފައިވަނީ، ކޮމިޝަނާ އޮފް ސްޕޯޓްސްގެ ނިންމުން ތަންފީޒުކޮށްފިނަމަ، ދުނިޔޭގެ މައި ބެޑްމިންޓަން ޖަމިއްޔާ، ބެޑްމިންޓަން ވޯލްޑް ފެޑެރޭޝަން (ބީޑަބްލިއުއެފް) އިން ރާއްޖެ އަށް ފިޔަވަޅު އަޅާނެކަމުގެ އިންޒާރުދީފައިވާ ކަމެވެ. އަދި ކޮމިޝަނަރުގެ އެ އެންގުން ބާތިލްކުރުމުގެ އަމުރަކަށް އެދި، ބެޑްމިންޓަން އެސޯސިއޭޝަަނުން ސިވިލް ކޯޓަށް މައްސަލަ ހުށަހެޅީ އެވެ.
ސިވިލް ކޯޓުން ނިންމާފައިވަނީ، ބެޑްމިންޓަން އެސޯސިއޭޝަނުން އެދުނު ގޮތަށް އަމުރު ނެރެދެވެން ނެތް ކަމަށެވެ. ސަބަބަކީ، ވަގުތީ ހުށަހެޅުން ހުށަހެޅުމުގެ ހައިސިއްޔަތު ބެޑްމިންޓަން އެސޯސިއޭޝަންގެ މުއްދަތު ހަމަވެފައި އޮތް ހިންގާ ކޮމިޓީ އަށް ލިބިގެން ނުވާތީ، ވަގުތީ އަމުރެއް ނެރެދެވޭނެ ގާނޫނީ ހަމައެއް ނެތުމެވެ.
ބެޑްމިންޓަން އެސޯސިއޭޝަނުން ވަނީ ސިވިލް ކޯޓުގެ އެ ނިންމުމާ ދެކޮޅަށް ހައި ކޯޓުގައި އެޕީލްކޮށްފަ އެވެ.
ބެޑްމިންޓަން އެސޯސިއޭޝަންގެ ރައީސްގެ މަގާމުގައި މޫސަގެ ތިން ވަނަ ދައުރުގެ ރަސްމީ މުއްދަތު ހަަމަވިތާ ހަތަރު މަސް ފަހުން އޭނާ ޖުލައި މަހު ވަނީ މަގާމުން އިސްތިއުފާ ދީފަ އެވެ. މޫސަ އާއި ބެޑްމިންޓަން އެސޯސިއޭޝަނާ ގުޅޭ ކޮރަޕްޝަންގެ މައްސަލައެއް އެންޓި ކޮރަޕްޝަން ކޮމިޝަން (އޭސީސީ) އިން އަންނަނީ ތަހުގީގު ކުރަމުންނެވެ.
ބެޑްމިންޓަންގެ އެންމެ ފަހުން އިންތިހާބުކުރި ހިންގާ ކޮމީޓީގެ ދައުރު، މި އަހަރުގެ މާޗް މަހުގެ 11 އަށް އޮތީ ހަމަވެފަ އެވެ. އެކަމަކު، މި ވަގުތު ވެސް ރަސްމީ ހައިސިއްޔަތުން ބެޑްމިންޓަން އެސޯސިއޭޝަނުން، އެންމެ އިސް ފަރާތެއްގެ ގޮތުގައި މުއާމަލާތު ކުރަމުން އަންނަނީ، އެ ހިންގާ ކޮމިޓީގެ ނައިބު ރައީސް އަހުމަދު ޝާކިރު މޫސާ އެވެ. ބެޑްމިންޓަން ދުނިޔޭގެ ޖަމިއްޔާ، ބީޑަބްލިއުއެފްގެ ވެބްސައިޓް ބުނާގޮތުން، ބެޑްމިންޓަން އެސޯސިއޭޝަންގެ ރައީސަކީ، އެންމެ ފަހުން އޮތް އެ އެސޯސިއޭޝަންގެ ހިންގާ ބޯޑުގެ ނައިބު ރައީސް، ޝާކިރު އެވެ. އަދި ޖެނެރަލް ސެކްރެޓަރީ އަކީ، މުހައްމަދު ނަސީރު އެވެ.
ރިވައިވަލް ސްޕޯޓްސް ކްލަބުން ޒެމްބިއާ އާއި ބޮޓްސްވާނާގައި ކުރިއަށްދިޔަ މުބާރާތްތަކުގައި ހޯދި ކާމިޔާބަށް ފަހު، ސްޕޯޓްސް މިިނިސްޓަރު، އަބްދުﷲ ރާފިއު (ރާއްޕެ) އެ ކާމިޔާބީ ހޯދި ގައުމީ ކުޅުންތެރިންނާ ބައްދަލުކުރެއްވި އެވެ. އެ ބައްދަލުވުމުގައި ވަނީ ބެޑްމިންޓަން އެސޯސިއޭޝަންގެ މައްސަލަތަކަށް ހައްލެއް ހޯދައިދޭނެ ކަމަށް ވިދާޅުވެފަ އެވެ.
އޭގެ ފަހުން، ބެޑްމިންޓަން އެސޯސިއޭޝަނުން މި ވަނީ، މީގެ ތިން މަހެއްހާ ދުވަސް ކުރިން ސިވިލް ކޯޓުން ނިންމާފައި އޮތް ނިންމުމަމާ ދެކޮޅަށް ހައި ކޯޓުގައި މިދިޔަ އާދިއްތަ ދުވަހު މައްސަލަ ހުށަހަޅައިފަ އެވެ. މައްސަލަ ހައި ކޯޓަށް ބަލައިގަތުމާ މެދު އެ ކޯޓުން އަދި ގޮތެއް ނިންމި ކަމުގެ މައުލޫމާތު ލިބިފައިނުވެ އެވެ.
