ބަންގްލަދޭޝްގެ އިންތިހާބު 2025 ގެ ފަހުކޮޅު ނުވަތަ 2026 ގެ ކުރީކޮޅު ބާއްވާނެ ކަމަށް އެ ގައުމުގެ ހިންގުމާ ވަގުތީ ގޮތުން ހަވާލުވެގެން ހުންނެވި މުހައްމަދު ޔޫނުސް އިއްޔެ ވިދާޅުވެއްޖެ އެވެ.
ބަންގްލަދޭޝްގެ 53 ވަނަ މިނިވަން ދުވަހާ ގުޅިގެން އެ ގައުމުގެ ގައުމީ ޓީވީއަށް ދިން އިންޓަވިއުއެއްގައި ޔޫނުސް ވިދާޅުވީ އިންތިހާބުގެ ކުރިން އިސްލާހީ ގިނަ މަސައްކަތްތަކެއް ކުރަން ޖެހޭ ކަމަށެވެ.
އެގޮތުން އިންތިހާބު ބާއްވާ ތާރީހެއް ކަނޑައަޅާނީ އިސްލާހީ މަސައްކަތްތައް ކުރުމަށްފަހު، ސިޔާސީ ޕާޓީތަކާ މަޝްވަރާ ކުރުމަށްފަހު އެއްބަސްވެވޭ ތާރީހެއްގައ ކަމަށް ޔޫނުސް ވިދާޅުވި އެވެ.
"ސިޔާސީ ޕާޓީތަކުން އެއްބަސްވާނަމަ އިސްލާހީ މަސައްކަތުގެ ކުޑަ މިންވަރެއް ފުރިހަމަ ކުރުމަށްފަހު ވެސް އިންތިހާބު ބޭއްވިދާނެ. އެއީ ރަނގަޅު ވޯޓާސް ލިސްޓަކާ އެކީގައި،" އޭނާ ވިދާޅުވި އެވެ.
ބަންގްލަދޭޝް އިންތިހާބުގައި ވީހާ ވެސް ގިނަ ބަޔަކު ވޯޓުލުމަށް ބާރު އަޅައި، ވޯޓުލާ މީހުންގެ ނިސްބަތް 100 އިންސަައްތައަށް ހެދުމަކީ ހުވަފެނެއް ކަމަށް ފާހަގަ ކުރައްވާ ޔޫނުސް ވިދާޅުވީ އޭގެ ސަބަބުން ވޯޓުލުމުގެ ހައްގު އަނބުރާ އަތުލަން އުނދަގޫވާނެ ކަމަށެވެ.
ބަންގްލަދޭޝްގެ ވެރިކަން ވެއްޓުނީ އެ ގައުމުގައި މިދިޔަ ޖުލައި މަހު ކުރި މުޒާހަރާތައް ކޮންޓްރޯލުން ނެއްޓި، ބޮޑުވަޒީރު ޝައިހް ހަސީނާ އޯގަސްޓް 5، ގައި މަގާމުން އިސްތިއުފާ ދެއްވުމަށްފަހު ގައުމު ދޫކުރައްވާ ފިއްލެވުމުންނެވެ.
އެ ގައުމުގައި ހަސީނާއާ ދެކޮޅަށް ކުރި މުޒާހަރާތަކުގައި ގިނަ އަދަދެއްގެ މީހުން މަރުވެފައިވާއިރު، ބަންގްލަދޭޝްގެ ވަގުތީ ސަރުކާރުން ވަނީ އެ މައްސަލަތައް ބަލައި އެކަމުގައި ކުށްވެރިވާ ފަރާތްތަކަށް އަދަބު ދޭނެ ކަމަށް ބުނެފަ އެވެ.
ހަސީނާ ފިއްލަވައިގެން އިންޑިއާއަށް ގޮސްފައިވާއިރު، އެ ކަމަނާ ހައްޔަރު ކުރަން ބަންގްލަދޭޝްގެ އިންޓަނޭޝަނަލް ކްރައިމްސް ޓްރައިބިއުނަލް (އައިސީޓީ) އިން ކޯޓު އަމުރެއް ވަނީ ނެރެފަ އެވެ. އަދި އެ ކަމަނާ ހޯދަން އިންޓަޕޯލް ރެޑް ނޯޓިސްއަކަށް ވެސް ބަންގްލަދޭޝް އިން ވަނީ އެދިފަ އެވެ.
