ކާނިވާ ސަރަހައްދުގައި މިދިޔަ އަންގާރަ ދުވަހު ބޭއްވި ޖަލްސާގައި "ތިއީ ބަހުލޫލެކޭ" އަންބާ ކީ ދުވާފަރު ދާއިރާގެ ކައުންސިލް މެންބަރު މަރިޔަމް ޔަޝްފާ ފުލުހަށް ހާޒިރު ކުރަން އެންގީ ރައީސުލްޖުމްހޫރިއްޔާގެ ފުރާނައަށް ނުރައްކާފަދަ އަމަލެއް ކުރަން ގޮވައިލި ކަމުގެ ތުހުމަތުގައި ކަމަށް އޭނާއަށް ފޮނުވި ޗިޓުގައި ފުލުހުން ބުނެފި އެވެ.
ޔަޝްފާއަށް ފުލުހުން ފޮނުވި ޗިޓުގައި ބުނެފައި އޮތީ ފުލުހުންގެ އިދާރާއަށް އޭނާ ހާޒިރު ކުރަނީ ނޮވެމްބަރު 11، ގައި އެމްޑީޕީ ހަރުގޭގައި ބޭއްވި ކައުންސިލަރުންގެ ޖަލްސާގައި ރައީސުލްޖުމްހޫރިއްޔާގެ ފުރާނައަށް ގެއްލުންވާފަދަ އަމަލެއް ކުރުމަށް ގޮވާލާފައިވާ ކަމަށް ތުހުމަތު ކުރެވޭ މައްސަލައިގައި ބަޔާނެއް ނެގުމަށް ކަމަށެވެ.
ފުލުހުންގެ އިދާރާއަށް ހާޒިރުވާން ޔަޝްފާއަށް އަންގާފައި އޮތީ މާދަމާ ހެނދުނު 10:30 އަށެވެ. ނަމަވެސް މިހާރު ފުލުހުން ވަނީ އެ ޗިޓު ކެންސަލްކޮށް ފުލުހުންގެ އިދާރާއަށް ހާޒިރުވާން ޖެހޭނެ ތާރީހެއް ފަހުން އަންގާނެ ކަމަށް އޭނާއަށް އަންގައިފަ އެވެ.
ޔަޝްފާ މަޝްހޫރު ވީވެސް ނޮވެންބަރު 11، ގައި އެމްޑީޕީގެ ދަނޑިކޮށި ޖަގަހައިގައި ވާހަކަ ދައްކަމުން ކީ ބަންޖަކާއި ރައިވަރަކަށް ފަހު އެވެ.
ދަނޑިކޮށި ޖަގަހައިގައި ޔަޝްފާ ކީ ރައިވަރު
ރައިވަރުން އަހަރެނާ، ފައިނުމާނޭ ހަމަ ހިލާ.
އައި ކަމަކު ނިޔަތުގާ، އަނގަ ބެދޭނޭ ދޮގު ބެޔާ.
ރައިވަރުން ވާދަކޮށްލަން އައި ސޮރާ، ދޮގު ހަދަން މޮޅު ހޮޅިގަނޑާ.
ރައްޔިތުން އިނދަޖައްސާ ކުރަގަނޑާ، ރައްޔިތުން ނިކުމެ ހަވަރަށް ދެމާ.
--
ރައީސްގެ ފުރާނައަށް ގެއްލުންވާފަދަ ކަމެއް ކުރަން ޔަޝްފާ ގޮވައިލިކަމަށް ފުލުހުން ތުހުމަތު ކުރި ނަމަވެސް، އޭނާގެ މައްޗަށް އެ ތުހުމަތު ކުރަނީ ކޮން ސަބަބަކާ ހުރެ ކަމެއް ނުވަތަ ކޮން ކަމެއް ކުރަން ގޮވާލައިގެން ކަމެއް ފުލުހުން ހާމައެއް ނުކުރެ އެވެ.
ޔަޝްފާގެ ވާހަކައިގައި އެފަދަ ގޮވައިލުމެއް އޭނާ ގޮވާލައިފައި ނުވާއިރު، އޭނާ ކީ ރައިވަރުގެ ފަހު ބަހުގައި "ރައްޔިތުން ނުކުމެ ހަވަރަށް ދެމާ،" އޭ ބުނެފައި އޮތީ ކާކަށް ނިސްބަތްކޮށް ކަމެއް އެ ރައިވަރުން ސާފެއް ނުވެ އެވެ.
ރައިވަރުގައި ދައްކާފައި ހުރި ވާހަކަތައް ނިސްބަތް ކޮށްފައި ހުރީ ވަކި މީހަކަށް ނިސްބަތް ނުވާ ވަނަންތަކަކަށެވެ.
އެ ދުވަހު ކީ ރައިވަރަށްފަހު "ގާނޫނުއަސާސީގެ ދިފާއުގައި ރައްޔިތުން" ނަމުގައި ޑިސެމްބަރު 10 ވަނަ ދުވަހުގެ ރޭ ކާނިވާ ސަރަހައްދުގައި އެމްޑީޕީން ބޭއްވި ޖަލްސާގައި ޔަޝްފާ ވަނީ "ތިއީ ބަހުލޫލެކޭ" ކިޔައި އަންބާއެއް ކިޔައިފަ އެވެ.
ރީތި ރާގަކަށް ޔަޝްފާ ހުށަހެޅި "ތިއީ ބަހުލޫލެކޭ، ތިއީ ޝައިތާނެކޭ، މަށާ ކައިރި ނުވާށޭ، މަށާ ކައިރި ނުވާށޭ" އަންބާ ވަރަށް ބޮޑަށް ވައިރަލް ވެގެންދިޔަ އެވެ.
