މީޑިއާ ކައުންސިލުގެ އައު ރައީސްއަކަށް ހުސެއިން ސަގީފް އިހުސާން އަދި އެ ކައުންސިލުގެ ނައިބު ރައީސްކަމަށް އިބްރާހިމް މުހައްމަދު އިންތިހާބުވެއްޖެ އެވެ.
ރައީސް ކަމުގެ މަގާމަށް ސަގީފް އިންތިހާބުވީ މީޑިއާ ކައުންސިލް މެންބަރުންގެ މެދުގައި މިއަދު ނެގި ވޯޓުން ކުރި ހޯއްދައިގެންނެވެ. ސަގީފް އާ ވާދަކުރީ މިހާރު ނޫހުގެ ޝަނާ އެވެ.
ޝަނާގެ މައްޗަށް ސަގީފް ކުރި ހޯދީ އެންމެ ވޯޓެއްގެ ތަފާތުންނެވެ. ޝަނާއަށް ލިބުނީ ހަތް ވޯޓެވެ. ސަގީފްއަށް ލިބުނީ އަށް ވޯޓެވެ.
މީޑިއާ ކައުންސިލުގެ އައު ދައުރަށް މެންބަރުން އިންތިހާބު ކުރުމަށް ބޭއްވި ވޯޓަށްފަހު އެ ކައުންސިލުގެ ރައީސް އާއި ނައިބު ރައީސް ހޮވަން ވޯޓުލީ އިއްޔެ އެވެ. ރައީސްއަކު ހޮވަން ދެވަނަ ވޯޓަކަށް ދާން ޖެހުނީ އިއްޔެ ނެގި ވޯޓު ހަތް ވޯޓު ކޮންމެ ކޮޅަކަށް ލިބި އެއްވަރުވުމުންނެވެ.
އިއްޔެ އޮތް ވޯޓުން ކުރި ހޯދައިގެން މީޑިއާ ކައުންސިލުގެ ނައިބު ރައީސްކަމުގެ މަގާމަށް އިންތިހާބުވީ އިބްރާހިމް މުހައްމަދު އެވެ. އޭނާ އެ މަގާމަށް އިންތިހާބުވީ އޭނާއާ ވާދަކުރި ފައުޒީގެ މައްޗަށް ފަސް ވޯޓުން ކުރި ހޯދައިގެންނެވެ.
މީޑިއާ ކައުންސިލް މެންބަރެއްގެ ދައުރަކީ ދެ އަހަރެވެ.
