ވަޒީފާއަށް ބޭނުންވާ ޝަރުތު ހަމަނުވި ނަމަވެސް ވަޒީފާ ދެވޭ ގޮތަށް ގިނަ ދާއިރާތަކަށް ބޭނުންވާ މުވައްޒަފުން ހޯދަން ސަރުކާރުގެ ކަރަންޓު ކުންފުނި، ސްޓެލްކޯ އިން މިދިޔަ ހަފުތާގައި ހުޅުވާލައިފި އެވެ.
ޑިސެމްބަރު 11، ގައި ގެޒެޓުކޮށްފައިވާ އިއުލާނުގައި ސްޓެލްކޯއިން ވަނީ 12 ދާއިރާއަކުން ވަޒީފާއަށް މީހުން ބޭނުންވާ ކަމަށް ބުނެފަ އެވެ. ނަމަވެސް އެއީ ކޮން ވަޒީފާތަކެއް ކަމެއް ވެސް އިއުލާނުގައި ނެތެވެ. އެ އިއުލާނާއެކު އިތުރު އެއްވެސް ލިޔުމެއް ވެސް ގެޒެޓުކޮށްފައެއް ނެތެވެ.
ސްޓެލްކޯއިން މި ވަޒީފާތައް ދެނީ ކޮންޓްރެކްޓު އުސޫލުންނެވެ. މި ވަޒީފާތަކުގެ ޝަރުތައް ކަނޑައަޅާނީ ކުންފުނިން ކަމަށް ބުނެ އެ ތަފުސީލުތައް އިއުލާނުގައި ހިމަނާފައި ނުވާއިރު، މުސާރަވެސް ކަނޑައަޅާނީ ދެ ފަރާތުން މަޝްވަރާކޮށްގެން ކަމަށް ބަޔާންކޮށްފައިވ ެއެވެ.
ސްޓެލްކޯގެ އިއުލާނުގައި އިތުރަށް ބުނެފައިވަނީ ޝަރުތުހަމަވާ ފަރާތެއް ކުރިމަތިނުލާ ހާލަތެއްގައި، ކުރިމަތިލީ ފަރާތްތަކުން ހުށަހެޅި ލިޔުންތަކާއި ތަޖުރިބާ އަދި އިންޓަވިއުއަށް ބެލުމަށްފަހު ޝަރުތު ހަމަނުވާ ފަރާތަކަށް ވެސް ވަޒީފާ ދިނުމުގެ ބާރު ކުންފުންޏަށް ލިބިގެންވާ ކަމަށެވެ.
މި އިއުލާނާ ގުޅޭގޮތުން ސްޓެލްކޯގެ މީޑިއާ ޓީމާ ސުވާލުކުރުމުން ތަފުސީލު ހޯދުމަށް އިތުރު ތަފުސީލު ހޯދުމަށްފަހު ޖަވާބެއް ދޭނެ ކަމަށް ބުންޏެވެ. ނަމަވެސް މި ހަބަރު ޝާއިއުކުރުމާ ހަމައަށް ކުންފުނީގެ ރަސްމީ ބަހެއް ނުލިބެ އެވެ.
އިއުލާނުން ވަޒީފާ ދޫކުރާ އަދަދެއް ވެސް ނޭނގެ އެވެ. މި މަގާމުތަކަށް ކުރިމަތިލުމުގެ ސުންގަޑި ހަމަވަނީ މާދަމާގެ ރަސްމީ ގަޑި ނިމޭއިރެވެ.
ސްޓެލްކޯއިން ގިނަ ވަޒީފާތަކެއް ދޭން ހުޅުވާލިއިރު، ސަރުކާރު ކުންފުނިތައް ބޭނުންކޮށްގެން ވަޒީފާތައް "ބަހަމުން" ގެންދާ ކަމުގެ ތުހުމަތު ބޮޑެވެ. އަދި ކުންފުނިތަކުން ވަޒީފާ ދަމުން މިދަނީ ސަރުކާރުގެ ހަރަދުތައް ކުޑަކުރުމުގެ ގޮތުން ކުންފުނިތަކުގެ ހަރަދުތައް ވެސް ކުޑަކުރާނެ ކަމަށް ސަރުކާރުން ބުނެފައިވާ ދަނޑިވަޅެއްގަ އެވެ.
