އަރިއަތޮޅު ދެކުނު ބުރީގެ ރަށްތަކަށް ކުރައްވާ ދަތުރެއްގައި ރައީސް ޑރ. މުހައްމަދު މުއިއްޒު މިއަދު ފުރާވަޑައިގެންފި އެވެ.
ރައީސް އޮފީހުން ބުނީ ރައީސްގެ ދެ ދުވަހުގެ މި ދަތުރުގައި އެ އަތޮޅުގެ ވެރިރަށް މަހިބަދޫ، ދަނގެތި އަދި އޮމަދޫ އަށް ވަޑައިގަންނަވާނެ ކަމަށެވެ. އަދި، ހުރިހާ ރަށަކަށް ވަޑައިގެނުގެންނެވުނަސް ވީހާވެސް ގިނަ ރަށްތަކެއްގެ ކައުންސިލްތަކާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކާ ބައްދަލުކުރައްވާނެ ކަމަށްވެ އެވެ.
މިއީ މި މަހު ރައީސް އަތޮޅު ތެރެއަށް ކުރައްވާ ދެވަނަ ދަތުރެވެ. އެގޮތުން ރައީސް ވަނީ މި މަހުގެ ފުރަތަމަ ހަފުތާގައި އަރިއަތޮޅު އުތުރުބުރިއަށާއި މާލެ އަތޮޅުގެ ބައެއް ރައްތަކަށް ވަޑައިގެންފަ އެވެ.
ރައީސް އޮފީހުން ބުނި ގޮތުގައި މި ދަތުރުތަކަކީ ރަށްރަށުގެ ރައްޔިތުންގެ ހާލު ބައްލަވައި، އެދޭ ކަންކަން އޮޅުންފިލުއްވައި، ތަރައްގީގެ މަޝްރޫއުތައް ތަރުތީބުކުރާނޭގޮތާއިމެދު މަޝްވަރާކުރެއްވުމެވެ.
މި އަހަރު ކުރީކޮޅު ބޭއްވި ރައްޔިތުންގެ މަޖިލީހުގެ އިންތިހާބާ ދިމާކޮށްވެސް ރައީސް އާއި ސަރުކާރުގެ ވެރިން އަތޮޅުތެރެއަށް ދަތުރުތަކެއް ކުރެއްވި އެވެ. ވެރިކަމަށް އަހަރެއްވީއިރު ރައީސް މުއިއްޒު ވަނީ 185 ރަށެއްގެ ކައުންސިލާ ބައްދަލުކުރައްވާފަ އެވެ. ނަމަވެސް އެ ހުރިހާ ރަށަކަށް ވަޑައެއް ނުގަންނަވަ އެވެ.
މިފަހަރުގެ ދަތުރުގައިވެސް ރައީސް އާއެކު ވަޒީރުންނާއި ސަރުކާރުގެ އިސްވެރިން ބައިވެރިވެވަޑައިގަންނަވާނެ އެވެ.
