ޗާގޯސް ޖަޒީރާއަކީ މޮރިޝަސްގެ ބަޔެއް ކަމަށް ބަލައި ރާއްޖޭގެ އީއީޒެޑުން ބައެއް ގެއްލޭ ގޮތަށް އިންޓަނޭޝަނަލް ޓްރައިބިއުނަލް އޮފް ދަ ސީސް (އިޓްލޮސް)އިން ނިންމި މައްސަލަ އިސްތިއުނާފުކުރަން ކުރާ މަސައްކަތުގެ ތެރެއިން، އދ. ގައި ހުންނަ ރާއްޖޭގެ ދާއިމީ މިޝަނަށް ފޮނުވި އެޓާނީ ޖެނެރަލް އޮފީހުގެ ވަކީލު މަސައްކަތް ފެށީ އޮގަސްޓު މަހު ކަމަށް އެ އޮފީހުން ބުނެފި އެވެ.
އެމެރިކާގެ ނިއުޔޯކުގައި ހުންނަ މިޝަނަށް އޭޖީގެ ވަކީލަކު ފޮނުވިކަން ފުރަތަމަ ހާމަކުރެއްވީ ރައީސް ޑރ. މުހައްމަދު މުއިއްޒެވެ. އެ ގޮތުން، ޖުމްހުރީ ދުވަހުގެ ރަސްމީ ޖަލްސާގައި ވާހަކަދައްކަވަމުން އެމަނިކުފާނު ވިދާޅުވީ، އޭޖީ އޮފީހުގެ ވަކީލު ޔޫއެން މިޝަނަށް ފޮނުވީ މި ސަރުކާރު ފެށުމާއެކު ކަމަށެވެ.
"އެޓާނީ ޖެނެރަލް އޮފީހުގެ މުވައްޒަފެއް ދާއިމީކޮށް ޔޫއެން ގައި ހުންނާނެ. އަޅުގަނޑުމެންގެ ސަރުކާރު އުފެދުނީއްސުރެ ފޮނުވައިގެން، އެތާ ބަހައްޓައިގެން ކުރަންޖެހޭ މަސައްކަތް ވެސް އެދަނީ ކުރަމުން،" ނޮވެމްބަރު 10، ގައި ބޭއްވި ޖަލްސާގައި ރައީސް ވިދާޅުވި އެވެ.
މިއާއެކު މި މައްސަލާގައި ފޮނުވި ވަކީލުގެ ތަފުސީލުތަކާއި އޭނާ މަސައްކަތް ކުރަން ފެށި ތާރީހު ހޯދުމަށް މި ނޫހުން ވާނީ އޭޖީ އޮފީހަށް އާރުޓީއައި ރިކުއެސްޓެއް ހުށަހަޅާފަ އެވެ. މި ހުށަހެޅުމަށް ލިޔުމުން ދިން ޖަވާބުގައި އޭޖީ އޮފީހުން ބުނީ، މި ސަރުކާރު ފެށުމާއެކު ޔޫއެންގައި ހުންނަ ދާއިމީ މިޝަނަށް ވަކީލަކު ފޮނުވުމުގެ މަސައްކަތް ފެށުނު ނަމަވެސް، އެ ވަކީލަށް މަސައްކަތް ފެށުނީ އޮގަސްޓު 1، ގައި ކަމަށެވެ.
"ހަމަޖައްސަންޖެހޭ އެންމެހައި އިދާރީ އިންތިޒާމުތައް ހަމަޖެއްސުމަށްފަހު، އަދި މުވައްޒަފަށް ބޭނުންވާ ޓްރެއިނިން ދިނުމަށްފަހު މި އޮފީހުގައި ވަޒީފާ އަދާކުރަމުންދިޔަ ސްޓޭޓް އެޓާނީއެއްވަނީ އޮގަސްޓު 1، 2024 ގައި ނިއު ޔޯކުގެ މިޝަންގައި މަސައްކަތްކުރައްވަން ފަށްޓަވާފަ،"
ތިންވަނަ ފަރާތެއްގެ ޒާތީ މައުލޫމާތު ކަމަށް ބުނެ އެ ވަކީލުގެ ނަން ސިއްރުކުރި ނަމަވެސް ބައެއް ތަފުސީލުތައް އޭޖީ އޮފީހުން ވަނީ ދީފަ އެވެ. އެގޮތުން ޕެންޝަނަށް ކެނޑުމަށްފަހު އެ ވަކީލަށް ދޭ މުސާރައަކީ 18،685ރ. ކަމަށް އޭޖީ އޮފީހުން ބުންޏެވެ.
އޭނާ އެތަނުގައި ކުރާ މަސައްކަތްތަކުގެ ތެރޭގައި އިޓްލޮސްގެ ނިންމުން ދިރާސާ ކުރުމާއި އދ. އަދި އދ. ގެ ދަށުން އުފައްދާފައިވާ ޖަމިއްޔާތަކުން މިކަމާ ގުޅިގެން ކުރާ މަޝްވަރާތަކުގައި ބައިވެރިވެ، ނިއު ޔޯކުގައި ހުންނަ މިޝަނަށް ލަފާދިނުން ހިމެނޭ ކަމަށްވެސް މި ނޫހަށް ލިޔުމުން ދިން ޖަވާބުގައި ބުނެފައިވެ އެވެ.
ޗާގޯސް މައްސަލާގެ ފަސްފަހަތް
ޗާގޯސްގެ ސިޔާދަތީ ބާރު މޮރިޝަސްއަށް ލިބޭ ކަމަށް ބައިނަލްއަގުވާމީ ކޯޓުން ނިންމި ނިންމުމާއެކު، ޗާގޯސް އާއި ރާއްޖެއާ ދެމެދު އޮތް ކަނޑުގެ އިން ވަކިކުރުމަށް އިޓްލޮސްއަށް ހުށަހެޅި މައްސަލާގައި އެ ކޯޓުން ވެސް ވަނީ އެ އިންޓަނޭޝަނަލް ކޯޓު އޮފް ޖަސްޓިސް ނިންމުން ދަމަހައްޓާފަ އެވެ. އަދި, ރާއްޖެ އާއި ޗާގޯސް ޖަޒީރާއާ ދެމެދުން ފުށޫއަރާ ކަނޑުގެ ސަރަހައްދު އެ ކޯޓުން ބައިކޮށްފައި ވެސް ވެ އެވެ.
އެ މައްސަލާގައި މޮރިޝަސްއާ ދެކޮޅަށް އެންމެ ބޮޑަށް ނެގި ނުކުތާއަކީ ޗާގޯސްގެ ސިޔާދަތީ ބާރު އެ ގައުމަށް ހިނގާކަން ސާފު ނުވާ ކަމަށް ބުނި ބުނުމެވެ. އަދި ސިޔާދަތީ ބާރުގެ މައްސަލަ ފުރަތަމަ ނިންމަން ޖެހޭ ކަމަށްވެސް ރާއްޖެއިން ވަކާލާތު ކުރި އެވެ. ނަމަވެސް ޔޫކޭ-މޮރިޝަސް އެއްބަސްވުމާއެކު އޭރު ރާއްޖެއިން ނެގި ދިފާއުތައް ވަނީ މުޅީންހެން ބާތިލުވެފަ އެވެ.
އެހެން ނަމަވެސް މި ސަރުކާރުން ވެރިކަމަށް އައީ ފުރަތަމަ 100 ދުވަހުގެ ތެރޭގައި އިޓްލޮސްގެ ނިންމުން އިސްތިއުނާފުކުރާނެ ކަމަށް ވައުދުވަމުންނެވެ. މިއަދާ ހަމައަށް ވެރިކަމަށް 320 އަށް ވުރެ ގިނަ ދުވަސް ވެފައިވާއިރު ސަރުކާރުން އަދިވެސް އެކަމުގައި ގޮތެއް ނުނިންމަ އެވެ.
ނަމަވެސް، ޗާގޯސްގެ ސިޔާދަތީ ބާރު މޮރިޝަސްއަށް ދޭން ނިންމުމާއެކު، އެކަމަށް ގޮންޖަހާ ދިވެހި ސަރުކާރުން ވަނީ އިނގިރޭސި ސަރުކާރަށް ސިޓީއެއް ފޮނުވާފަ އެވެ.
ޗާގޯސް ޖަޒީރާ ނުވަތަ ފޯޅަވަހީގެ ސިޔާދަތީ ބާރު ރާއްޖެއަށް ލިބުން މާ ހައްގު ކަމަށް ވިދާޅުވެ، އިނގިރޭސިވިލާތުގެ ސަރުކާރަށް ސިޓީއެއް ފޮނުއްވާފައިވާ ކަމަށް ރައީސް ޑރ. މުހައްމަދު މުއިއްޒު ވިދާޅުވީ ޖުމްހުރީ ދުވަހުގެ ރަސްމީ ޖަލްސާގައި ވާހަކަދައްކަވަމުންނެވެ.
މި ސިޓީގެ ކޮޕީއަކަށާއި އެކުގައި ފޮނުވި ކަމަށް އެމަނިކުފާނު ވިދާޅުވި ލިޔެކިޔުންތަކުގެ ކޮޕީތަކަށް މި ނޫހުން ވާނީ އެދުނު ނަމަވެސް ސަރުކާރުން ވަނީ އެ ސިޓީ އާއި އެކުގައި ފޮނުވި ލިޔުންތައް ސިއްރުކޮށްފަ އެވެ. އެ ނިންމުން މިހާރު ވާނީ މުރާޖައާކުރުމަށް ފޮނުވާފަ އެވެ.
