ރާއްޖެއިން ޗައިނާއަށް ކަނޑައެޅުއްވި ސަފީރު، ޑރ. ފަޒީލް ނަޖީބް، އޭނާގެ ސަފީރުކަމުގެ ފަތްކޮޅު ޗައިނާގެ ރައީސް، ޝީ ޖިންޕިން އަށް މިއަދު އަރުވައިފި އެވެ.
ފަތްކޮޅު އެރުވުމުގެ ރަސްމިއްޔާތު އޮތީ ބެއިޖިންގައި ހުންނަ ގްރޭޓް ހޯލް އޮފް ދަ ޕީޕަލްގައި މިއަދު އޮތް ހާއްސަ ރަސްމިއްޔާތެއްގައި ކަމަށް ފޮރިން މިނިސްޓްރީން ބުންޏެވެ.
ޗައިނާއަށް ކަނޑައަޅުއްވާފައި ހުންނަވާ ސަފީރުގެ މަގާމާ ފަޒީލް ހަވާލުވެވަޑައިގަތުމުން ޝީ ޖިންޕިން ވަނީ އޭނާއަށް ތަހުނިޔާ ވިދާޅުވެފަ އެވެ. އަދި ޗައިނާ އާއި ރާއްޖެ އާ ދެމެދު އޮންނަ ގާތް ގުޅުން އިތުރަށް ބަދަހި ކުރުމުގެ މަސައްކަތުގައި އެމަނިކުފާނުގެ ފުރިހަމަ އެއްބާރުލުން ދެއްވާނެ ކަމުގެ ޔަގީންކަން ޝީ ޖިންޕިން ދެއްވި އެވެ.
މިއަދުގެ ރަސްމިއްޔާތުގައި ފަޒީލް ވަނީ ރާއްޖޭގެ ރައްޔިތުންގެ ފަރާތުންނާއި ރައީސުލްޖުމްހޫރިއްްޔާ ޑރ. މުހައްމަދު މުއިއްޒުގެ ފަރާތްޕުޅުން ޝީ ޖިންޕިންއަށާއި ޗައިނާގެ ރައްޔިތުންނަށް ހެޔޮއެދުމާއި ސަލާމް ރައްދު ކުރައްވައިފަ އެވެ.
ދިވެހިރާއްޖެ އާއި ޗައިނާ ސިޔާސީ ގުޅުން ގާއިމު ކުރީ އޮކްޓޫބަރު 14، 1972 ގަ އެވެ. ފަޒީލް އަކީ އެ ގައުމަށް ރާއްޖެއިން ކަނޑައެޅި ފަސްވަނަ ސަފީރެވެ.
