މެންޗެސްޓާ (ޑިސެމްބަރު 12) - މެންޗެސްޓާ ޔުނައިޓެޑަށް ކުޅެމުން އަންނަ އިނގިރޭސި ފޯވާޑް މާކަސް ރެޝްފޯޑް ވިއްކާލަން އެ ކްލަބުން ތައްޔާރުވަމުން އަންނަ ކަމަށް އިނގިރޭސި މީޑިއާ ރިޕޯޓްތައް ބުނެފި އެވެ.
އުމުރުން ހަތް އަހަރު ފެށިގެން ޔުނައިޓެޑަށް ކުޅެމުން އަންނަ ރެޝްފޯޑް، 27، ގެ ކުޅުން މިދިޔަ އަހަރެއްހާ ދުވަހަށް ބަލާނަމަ ވަރަށް ބޮޑަށް ވަނީ ދަށްވެފަ އެވެ. އެކަމަކު، ޔުނައިޓެޑްގެ ކޯޗުކަމާ ދާދި ފަހުން ހަވާލުވި ޕޯޗުގަލްގެ ރުބެން އަމޮރިމްއާ އެކު، ރެޝްފޯޑްގެ ފޯމު ރަނގަޅުވާނެ ކަމަށް ފުރަތަމަ ބެލެވުނު ނަމަވެސް ފަހަކަަށް އައިސް އަނެއްކާ ވެސް އޭނާގެ ކުޅުން ވަނީ ދަށްވެފަ އެވެ.
އިނގިރޭސި މީޑިއާތަކުން ރިޕޯޓްކުރާގޮތުގައި، ރެޝްފޯޑް، ޔުނައިޓެޑްގައި މަޑުކުރަން ބޭނުންވި ނަމަވެސް، އޭނާ ދޫކޮށްލުމާ މެދު ޔުނައިޓެޑުން ވަނީ މަޝްވަރާތައް ފަށައިފަ އެވެ. އެ ގޮތުން، ކުރިއަށް އޮތް ދެ ޓްރާންސްފާ މާކެޓްގެ ތެރޭގައި، ރެޝްފޯޑް ގަންނަން 40-60 މިލިއަން ޑޮލަރުގެ ބިޑެއް ލިބިއްޖެނަމަ، އޭނާ ވިއްކާލަން ޔުނައިޓެޑުން އޮތީ ތައްޔާރަށެެވެ.
ރެޝްފޯޑް، އޭނާގެ އަސްލު ފޯމުގައި ކުޅެފައިވަނީ، 18 މަސް ކުރިންނެވެ. އެއީ، ޔުނައިޓެޑްގެ ކުރީގެ ކޯޗު އެރިކް ޓެން ހާގްގެ ފުރަތަަމަ ސީޒަނުގަ އެވެ. އެ ފަހަރު ރެޝްފޯޑް 30 ގޯލު ޖެހި އެވެ. އެ އަހަރު، ފްރާންސްގެ ޕީއެސްޖީން ވަނީ ރެޝްފޯޑް ގަންނަން މަޝްވަރާތަކެއް ކޮށްފަ އެވެ. އެކަމަކު، ޔުނައިޓެޑުން ކިޔާ އަގުބޮޑުވުމުން އެ ޑީލުގެ ވާހަކަތަކެއް ކުރިއަށް ނުދިޔަ އެވެ.
ރިޕޯޓްތައް ބުނާގޮތުގައި، މި ސީޒަން ނިމުމުން ރެޝްފޯޑް ހޯދަން ޕީއެސްޖީ އާއި އިޓަލީގެ ކްލަބްތަކުގެ އޮފާ ލިބުމުގެ ފުރުސަތު ބޮޑެވެ.
ޔުނައިޓެެޑުން މިދިޔަ އަހަރުގެ ޖުލައި މަހު ރެޝްފޯޑްގެ ކޮންޓުރެކްޓް އާކުރިއެވެ. އާ ކޮންޓުރެކްޓްގެ މުއްދަތު ހަމަވާނީ 2028 ވަނަ އަހަރުގެ ތެރޭގަ އެވެ.
މިހާތަނަށް ރެޝްފޯޑް، ޔުނައިޓެޑަށް ކުޅެދިން 425 މެޗުން އޭނާ ވަނީ 138 ގޯލު ޖަހައި، 68 ލަނޑު ޖަހަން ފުރުސަތު ތަނަވަސްކޮށްދީފަ އެވެ.
