ޒިއުރިކް (ޑިސެމްބަރު 11) - ފީފާ ވޯލްޑް ކަޕް 2030 އާއި 2034 ވަނަ އަހަރު ހޯސްޓްކުރާނެ ގައުމުތައް ފައިނަލްކޮށްފި އެވެ.
އެ ގޮތުން، ދުނިޔޭގެ މައި ފުޓްބޯޅަ ޖަމިއްޔާ ފީފާ އިން މިއަދު ނިންމާފައިވަނީ، 2030 ވަނަ އަހަރުގެ ވޯލްޑް ކަޕް ހޯސްޓްކުރުމުގެ ފުރުސަތު މޮރޮކޯ، ސްޕެއިން އަދި ޕޯޗުގަލް އަށް ދިނުމުގެ އިތުރުން، 2034 ވަނަ އަހަރުގެ ވޯލްޑް ކަޕް ސައުދީ އަރަބިއްޔާގައި ބޭއްވުމަށް ފުރުސަތު ދިނުމަށެވެ.
މޮރޮކޯ އާއި ސްޕެއިން އަދި ޕޯޗުގަލް އަށް ދިން ވޯލްޑް ކަޕްގެ ބައެއް މެޗުތައް، އުރުގުއޭ، އާޖެންޓީނާ އަދި ޕެރަގުއޭގައި ވެސް ކުޅޭނެ އެވެ. މިއީ، ވޯލްޑް ކަޕް އެންމެ ފުރަތަމަ 1930 ވަނަ އަހަރު ބޭއްވުމަށް 100 އަހަރު ފުރުން ފާހަގަކުރުމުގެ ގޮތުން ފީފާ އިން ނިންމި ނިންމުމެކެވެ. އެ ގޮތުން، އާޖެންޓީނާ އާއި ޕެރަގުއޭ އަދި އުރުގުއޭގައި ކުޅޭނީ 2030 ވަނަ އަހަރުގެ ވޯލްޑް ކަޕްގެ ފުރަތަމަ ތިންް މެޗެވެ.
ފީފާގެ ރައީސް ޖިއާނީ އިންފަންޓީނޯ ވިދާޅުވީ، ތިން ބައްރެއްގައި ތަފާތު ހަ ގައުމެއްގައި ފީފާ ވޯލްޑް ކަޕްގެ މެޗުތައް ކުޅުމަކީ، މި މުބާރާތަށް 100 އަހަރު ފުރުން ފާހަގަކުރުން އެންމެ ރަނގަޅު ގޮތް ކަމުގައިވާނެ ކަމަށެވެ.
"ވޯލްޑް ކަޕަށް 100 އަހަރު ފުރުން ފާހަގަކުރަން މިއީ ތަފާތު ގޮތެއް. ތަފާތު 48 ގައުމަކުން 104 މެޗު ކުޅޭނެ ވޯލްޑް ކަޕެއް ބަލާލުމުގެ ފުރުސަތު ލިބޭނެ،" އިންފަންޓީނޯ ވިދާޅުވި އެވެ.
ފީފާ އިން ނިންމާފައިވަނީ، މޮރޮކޯ އާއި ޕޯޗުގަލް އަދި ސްޕެއިނުން ހޯސްޓްކުރާ ވޯލްޑް ކަޕްގައި މި ތިން ގައުމުގެ މެޗުތައް ވެސް އަމިއްލަ ގައުމުގައި ކުޅެވޭ ގޮތަކަށް ރޭވުމަށެވެ.
ސައުދީ އަރަބިއްޔާ އިން 2034 ގެ ވޯލްޑް ކަޕް ކާމިޔާބުކުރީ ވާދަކުރާނެ އިތުރު ބިޑެއް ވެސް ނެތި އެވެ. ފީފާ އިން ވަނީ ސައުދީ އަރަބިއްޔާގެ ވޯލްޑް ކަޕް ބިޑްގެ އިވެލުއޭޝަން ރިޕޯޓް އާންމުކޮށްފަ އެވެ. އެ ގޮތުން، އެ އިވެލުއޭޝަނުގައި ސައުދީ އަށް ވަނީ 5 އަކުން، 4.2 ލިބިފަ އެވެ. މިއީ މިހާތަނަށް ވޯލްޑް ކަޕް ބިޑަކަށް ލިބުނު އެންމެ ބޮޑު ސްކޯ އެވެ. އެ އިވެލުއޭޝަން ރިޕޯޓްގައި ސައުދީގެ ހިއުމަން ރައިޓްސް ކަަށަވަރުވާ މިންގަނޑަށް ވަނީ އެކަށީގެންވާ މާކުހެއް ލިބިފަ އެވެ.
ޖުމްލަ އެކު، ސައުދީ އަރަބިއްޔާގައި ވޯލްޑް ކަޕް ބާއްވާނީ 15 ސްޓޭޑިއަމްގަ އެވެ. އަށް ސްޓޭޑިއަމެއް ހުންނާނީ ރިޔާދުގަ އެވެ. އޭގެ ތެރެއިން އެއް ދަނޑަށް ގާތްގަނޑަކަށް އެއް ފަހަރާ އެއް ލައްކާ މީހުންނަށް މެޗު ބަލަން ވަދެވޭނެ ކަމަށް ރިޕޯޓްތައް ބުނެ އެވެ.
ސައުދީގައި ވޯލްޑް ކަޕް ކުޅޭނެ 15 ސްޓޭޑިއަމްގެ ތެރެއިން މި ވަގުތު ބޭނުންކުރަނީ، ހަތަރު ސްޓޭޑިއަމް އެވެ. އަށް ދަނޑެއްގެ މަަސައްކަތް ޕްލޭން ކުރެވިފައިވާއިރު، ތިން ދަނޑެއްގެ ކޮންސްޓްރަކްޝަން މަސައްކަތް މިހާރު ވަނީ ފެށިފަ އެވެ. މީގެ ތެރެއިން ބައެއް ދަނޑުތަކުގައި، 2027 ވަނަ އަހަރުގެ އޭޝިއަން ކަޕްގެ މެޗުތައް ކުޅޭނެ އެވެ.
