މަސްވެރިންގެ ދުވަސް މާދަމާ ފާހަގަ ކުރަން ހުޅުމާލެ ކަންނެލި ޖެޓީގައި މަސްއޮޑިތައް ބަނދަރުކޮށްފި އެވެ.
ބޮޑު ކަންނެލި މަސްވެރިންގެ ޔޫނިއަން (ބީކޭއެމްޔޫ) ގެ ރައީސް ހުސެއިން ނަޝީދު "އަދަދު" އަށް ވިދާޅުވީ މާދަމާ ހެނދުނު 09:00 އިން ފެށިގެން ހުޅުމާލެ ކަންނެލި ޖެޓީގައި މަސްވެރިންގެ ދުވަސް ފާހަގަ ކުރަމުން ގެންދާނީ އެ ޔޫނިއަންގެ އަހަރީ އާންމު ޖަލްސާއާ ވެސް އެކީގައި ކަމަށެވެ.
ބީކޭއެމްޔޫގެ އަހަރީ އާންމު ޖަލްސާގައި ހިންގާ ކޮމިޓީ އިންތިހާބު ކުރުމާއި، ހިންގާ ގަވާއިދު އިސްލާހުކޮށް ފާސް ކުރުން ވެސް ކުރިއަށް ގެންދަން ވަނީ ނިންމާފަ އެވެ.
ބީކޭއެމްޔޫގެ އަހަރީ އާންމު ޖަލްސާއަށް ފަހު މި ސަރުކާރުން މަސްވެރިންނަށް ވީ ވައުދުތައް ފުއްދުމަށް ގޮވާލައި ޝުއުރު ފާޅު ކުރުމުގެ ހަރަކާތްތައް ވެސް ކުރިއަށްދާނެ ކަމަށް ވެސް އޭނާ ވިދާޅުވި އެވެ.
"ޝުއޫރުތަކުގެ ތެރޭގައި މި އޮތީ މަސްވެރިންނަށް މި ސަރުކާރުން ވީ ވައުދުތައް ފުއްދުމަށް ގޮވައިލުން، ހަމައެކަނި ބޮޑުކަންނެލި މަސްވެރިންނަށް ވީ ވައުދުތަކެއް ނޫން، ދޮށީގެ މަސްވެރިންނަށް ވީ ވައުދުތައް ވެސް ފުއްދައިދިނުމަށް ގޮވައިލާ ޝުއޫރު ފާޅު ކުރާނެ،" ނަޝީދު ވިދާޅުވި އެވެ.
ބީކޭއެމްޔޫ އިން ވަނީ މީގެ ކުރިން މަސްވެރިންނަށް ވީ ވައުދުތައް ސަރުކާރުން ނުފުއްދާތީ އަޑު އުފުލުމުގެ ގޮތުން ހުޅުމާލެ ޖެޓީން ފުރައިގެން މާލެއަށް އައިސް، މާލޭގެ އެއް ނަންބަރު ފާލަން ކައިރީ އިހުތިޖާޖު ކޮށްފަ އެވެ. އެ އިހުތިޖާޖު ނިންމާލީ މަސްވެރިން ކުރި ބައެއް ޑިމާންޑުތައް ސަރުކާރުން ފުރިހަމަ ކުރުމުންނެވެ.
މަސްވެރިންގެ ދުވަހާ ދިމާކޮށް ރައީސް ޑރ. މުހައްމަދު މުއިއްޒު މިއަދު ވިދާޅުވީ ބޭންކް އޮފް މޯލްޑިވްސް (ބީއެމްއެލް) ގައި އެކައުންޓް އޮންނަ ދޯނިތަކަށް މާދަމާއިން ފެށިގެން 48 ގަޑިއިރު ތެރޭގައި ކިރާ މަހަށް ފައިސާ ދެވޭނެ ކަމަށެވެ.
އެއީ ފިނޭންސް މިނިސްޓްރީ އާއި ބީއެމްއެލް އާއި މިފްކޯ މެދުވެރިވެގެން ހަދާފައިވާ އެރޭންޖުމަންޓެއް ކަމަށް ގާފަރުގައި ވާހަކަ ދައްކަވަމުން ރައީސް ހާމަކުރެއްވި އެވެ. އެގޮތުން, މިއަަދާ ހަމައަށް ދޫނުކޮށް ހުރި 38 މިލިއަން ރުފިޔާ މިހާރު ޖަމާކޮށްފައިވާ ކަމަށް ވެސް ރައީސް ވިދާޅުވި އެވެ.
މަސްވެރިންގެ މުޒާހަރާތަކަށްފަހު ސަރުކާރުން ވަނީ މަހުގެ އަގު 20ރ. އަށް ވުރެ ތިރި ނުކުރާނެ ކަމަށް ރައީސް މުއިއްޒު ވެވަޑައިގެންނެވި ރިޔާސީ ވައުދާ ހިލާފަށް މަހުގެ އަގު ވަރަށް ބޮޑަށް ތިރިކޮށްފަ އެވެ. މިހާރު މިފްކޯއިން މަސް ގަންނަނީ 5ރ. އާއި 16ރ. އާ ދެމެދުގެ ރޭޓުތަކެއްގަ އެވެ.
