ރިޔާސީ އިންތިހާބުގައި ވެވަޑައިގެންނެވި ހުރިހާ ވައުދެއްގެ އަމަލީ މަސައްކަތް ކުރިއަށް އޮތް ދެ އަހަރު ތެރޭގައި ފަށްޓަވާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
އއ. ތޮއްޑޫއަށް މިއަދު ވަޑައިގެން ވާހަކަ ދައްކަވަމުން ރައީސް މުއިއްޒު ވިދާޅުވީ މި އަހަރު ރާއްޖޭގައި ތަރައްގީތައް ކުރިއަށް ނުގެންދެވުނީ އެމްޑީޕީ ސަރުކާރާ ހެދި ކަމަށެވެ. އެގޮތުން މި އަހަރަށް ލަފާކޮށް މިދިޔަ އަހަރު ފާސްކުރި ބަޖެޓުގައި މި ސަރުކާރުން ބޭނުންވި ކަންކަން ހިމަނާފައި ނުވާ ކަމަށް ރައީސް ވިދާޅުވި އެވެ. ނަމަވެސް ކުރިއަށް އޮތް ދެ އަހަރު ދުވަހުގެ ތެރޭގައި އެމަނިކުފާނު ވައުދުވެވަޑައިގެންނެވި ހުރިހާ ކަމެއްގެ އަމަލީ މަސައްކަތް ފަށްޓަވާނެ ކަމަށް ރައީސް ވިދާޅުވި އެވެ.
"އިރާދަކުރެއްވިއްޔާ 2025 އަދި 2026 ވެގެންދާނީ އަޅުގަނޑު ރަށްރަށަށް ގޮސް ރިޔާސީ އިންތިހާބުގައި ވެފައި ހުރި ވައުދުތައް ފުއްދުމަށްޓަކައި އަމަލީ ގޮތުން އެ މަސައްކަތްތައް ހިންގައިދޭނެ އަހަރަށް،" ރައީސް މުއިއްޒު ވިދާޅުވި އެވެ.
"މި އަންނަ އަހަރު ކުރީކޮޅު، ޖެނުއަރީން ފެށިގެން ޑިސެމްބަރާ ހަމައަށް އަދި 2026، މި 24 މަސް، މި ދެ އަހަރުގެ ތެރޭގައި ރާއްޖޭގެ ހުރިހާ ކަންކޮޅެއްގައި ބަހާލެވިގެން ވަކި ތަރުތީބެއްގެ ތެރެއިން އަޅުގަނޑު ވެފައި ހުރި ހުރިހާ ވައުދެއް، އެއީ ބަނދަރު، މަގު، ބިން ހިއްކުން، ސްކޫލް، ހޮސްޕިޓަލް، ކިޔާނެ ކަމެއް ނެތް ކުޅިވަރާ ބެހޭ ކަންކަން، ތަރުތީބެއްގެ ތެރެއިން އިރާދަކުރެއްވިއްޔާ އަމަލީ ގޮތުން އަޅުގަނޑުމެން މަސައްކަތްތައް ފަށައި އަދި އެކި މަޝްރޫއުތައް ނިމެމުން ވެސް ދާނެ، އެހެންވީމާ ތާވަލު ކުރެވިގެން ތަރުތީބެއްގެ ތެރެއިން ރާއްޖޭގެ ތަރައްގީގެ މަޝްރޫއުތައް ކުރިއަށް ގެންދާނަން."
އެމަނިކުފާނު ވިދާޅުވީ އަންނަ އަހަރަށް ލަފާކޮށް މަޖިލީހުން މިހާރު ފާސްކޮށްފައިވާ ބަޖެޓުގައި އެންމެ ބޮޑު އިސްކަމެއް ދީފައިވާނެ އެއް ކަމަކަށް އޮންނާނީ ފެނާއި ނަރުދަމާގެ މަޝްރޫއުތަކާއި މަގު ހެދުމުގެ މަޝްރޫއުތައް ކަމަށެވެ.
"ކުރިއަށް އޮތް އަހަރަށް ލަފާކޮށްފައި އޮތް ބަޖެޓުގައި އެންމެ ބޮޑު އިސްކަމެއް ދޭ އެއް ކަމަކަށް އޮންނާނީ ފެނާއި ނަރުދަމާ އެޅުމާ އެކީގައި މަގު ހެދުން،" ރައީސް ވިދާޅުވި އެވެ.
މިއަދު ވާހަކަ ދައްކަވަމުން ރައީސް ވަނީ ވަނީ ތޮއްޑޫއަށް ވެސް ގިނަ ވައުދުތަކެއް ވެވަޑައިގެންފަ އެވެ. އެގޮތުން އެ ރަށުގެ މަގުތައް ހެދުމުގެ މަޝްރޫއު އާއި ސިއްހީ މަރުކަޒު އިތުރަށް ތަރައްގީ ކުރުމާއި ސްކޫލްގެ ޖާގަ ބޮޑު ކުރުމުގެ އިތުރުން އެ ރަށުގައި ޑޮލަރު އޭޓީއެމެއް ބަހައްޓައިދިނުމަށް ރައީސް ވައުދުވެވަޑައިގެންނެވި އެވެ.
