ފްލޮރެންސް، އިޓަލީ (ޑިސެމްބަރު 1) - އިޓާލިއަން ލީގުގައި މިރޭ އިންޓަ މިލާނާ ދެކޮޅަށް ކުޅެނިކޮށް، ފިއޮރެންޓީނާގެ މިޑްފީލްޑަރު، އެޑޮއާޑޯ ބޯވް، ހޭނެތިގެން ދަނޑުމައްޗަށް ވެއްޓި، ވަގުތުން ހޮސްޕިޓަލަށް ގެންގޮސް ފަރުވާދޭން ޖެހުމުން މެޗު ނުކުޅެ ހުއްޓާލައިފި އެވެ.
މެޗުގެ 16 ވަނަ މިނިޓްގައި، ބޯވް، 22، ދަނޑުމައްޗަށް ވެއްޓުމާ އެކު، އޭނާ އަށް ނޭވާލާން އުނދަގޫވާތީ ދަނޑުމަތީގައި އޮށޯވެގެން އޮތްއިރު، ދެ ޓީމުގެ ކުޅުންތެރިން ވަނީ އަވަަހަށް މެޑިކަލް އޮފިޝަލުން އަރަން އިޝާރާތްކޮށްފަ އެވެ.
ސްޓްރެޗަރަށް ބޯވްލައިގެން އެމްބިއުލަންސްގައި ވަގުތުން ހޮސްޕިޓަލަށް ގެންގޮސް ފަރުވާ ދޭން ފެށުނެވެ. އަދި މިހާރު، ބޯވްގެ ހާލު ރަނގަޅުވަމުން އަންނަ ކަމަށް ފިއޮރެންޓީނާ އޮފިޝަލުން އިޓަލީ މީޑިއާ އަށް މައުލޫމާތު ދެ އެވެ.
އިންޓައާ ދެކޮޅަށް މިރޭ ކުޅުނު މެޗުގެ ތެރެއިން ބޯވް ބޯޅަ ހިފައިގެން.
އިޓާލިއަން ފުޓްބޯޅަ ފެޑެރޭޝަނުން ވަނީ މި މެޗު އިތުރަށް މިރޭ ކުރިއަށް ނުގެންދަން ނިންމައިފަ އެވެ.
އިޓަލީގެ 21 އަހަރުން ދަށުގެ ގައުމީ ޓީމާ ހަމައަށް ހުރިހާ އުމުރުފުރާއެއްގެ ގައުމީ ޓީމަށް ކުޅެފައިވާ ބޯވް، މި ސީޒަނުގައި ފިއޮރެންޓީނާއާ ގުޅުނީ ރޯމާ އިން ލޯން އެއްބަސްވުމެއްގެ ދަށުންނެވެ.
ފިއޮރެންޓީނާއާ ގުޅުމަށް ފަހު ބޯވް ދައްކަމުން އަންނަ ކުޅުމުގެ ސަބަބުން އޭނާގެ އެއްބަސްވުން އާ ކުރަން އެ ކްލަބުން އަންނަނީ ވާހަކަ ދައްކަމުންނެވެ. ފިއޮރެންޓީނާ އަށް ބޯވް ޖަހައިދިން ހަމައެކަނި ގޯލު ކާމިޔާބުކުރީ އޮކްޓޫބަރު މަހު ރޯމާއާ ދެކޮޅަށެވެ.
ތިން ވަނައިގައި އޮތް އިންޓަ އާއި ހަަތަރެއްގައި އޮތް ފިއޮރެންޓީނާ އަށް ވަނީ އެއްވަރަށް ޕޮއިންޓް ލިބިފަ އެވެ.
