ލިވަޕޫލް (ނޮވެމްބަރު 30) - ލިވަޕޫލަށް ކުޅެމުން އަންނަ ފްރާންސްގެ މިޑްފީލްޑަރު، އިބްރާހިމާ ކޮނާޓޭ އަށް ލިބުނު އަނިޔާގެ ސަބަބުން ކުރިއަށް ހުރި މެޗުތައް ގެއްލޭނެ ކަަަމަށް ރިޕޯޓްތައް ބުނެފި އެވެ.
ކޮނާޓޭ، 25، އަށް އަނިޔާވީ، ބުދަ ދުވަހުގެރޭ ޗެމްޕިއަންސް ލީގުގައި ލިވަޕޫލުން އަމިއްލަ ދަނޑުގައި، ރެއާލް މެޑްރިޑް އަތުން 2-0 އިން މޮޅުވި މެޗުގަ އެެވެ. ރެއާލަށް ކުޅޭ ބްރެޒިލްގެ ޒުވާން ފޯވާޑް، އެންޑްރިކް ބޯޅަ ހޯދަން އުޅުމުގެ ތެރޭގައި ކުރި ފައުލަކުން ކޮނާޓޭގެ ފަޔަށް ވަނީ އަނިޔާވެފަ އެވެ.
ރިޕޯޓްތައް ބުނާގޮތުގައި، 2-3 ހަފްތާގެ މުއްދަތެއްގައި ކޮނާޓޭ ކުޅުމާ ދުރުގައި ހުންނަން ޖެހޭނެ އެވެ. ޑިސެމްބަރު މަހު ލިވަޕޫލުން ނުވަ މެޗު ކުޅެން ޖެހޭއިރު، ކޮނާޓޭ އަށް އެންމެ ފުރަތަމަ ގެއްލޭނެ މެޗަކީ، މާދަމާރޭ ލީގުގައި މެންޗެސްޓާ ސިޓީއާ ބައްދަލުކުރާ މެޗެެވެ.
ކޮނާޓޭ ބުނީ، ރަނގަޅު ފޯމެއްގައި ކުޅެމުން އަންނަނިކޮށް އަނިޔާގެ މައްސަލަ ދިމާވުމަކީ މާޔޫސްކަމެއް ނަމަވެސް ޓީމަށް އެހީތެރިވެވެން އޮތް ގޮތަކަށް އެކަން ކުރުމުގެ އިތުރުން، ކުރިއަށް ހުރި ދުވަސްތަކުގައި ރިކަަވަރީ އަށް މަސައްކަތްކޮށް ވަރުގަދަ އަށް އެނބުރި އަންނަން ބޭނުންވާ ކަމަށެވެ.
އާރްބީ ލައިޕްޒިގުން 2021 ވަނަ އަހަރު 40 މިލިއަން ޑޮލަރަށް ލިވަޕޫލަށް ބަދަލުވި ކޮނާޓޭ އަކީ މި ސީޒަނުގައި ލިވަޕޫލާ ހަވާލުވި ނެދަލެންޑްސްގެ ކޯޗު އާނާ ސްލޮޓްގެ އިތުބާރު ހޯދާފައިވާ ކުޅުންތެރިއެކެެވެ. ޕްރިމިއާ ލީގުގައި އެންމެ ރަނގަޅު ޑިފެންސިވް ޕާޓްނާޝިޕެއް މި ސީޒަނުގައި އޮތް ލިވަޕޫލްގެ ގިނަ މެޗުތަކުގައި އެއްކޮށް ކުޅުނީ ކެޕްޓަން، ވާޖިލް ވެން ޑައިކާ އެކު ކޮނާޓޭ އެވެ. އެކަމަކު، ކޮނާޓޭގެ މި އަނިޔާއާ އެކު، ވެން ޑައިކާ އެކުގައި، ދެން ފަހަތަށް ކުޅޭނީ ޖަރަލް ކުއަންސާ ނޫނީ ޖޯ ގޯމޭޒް އެވެ.
ލިވަޕޫލް މި ވަގުތު އޮތީ ޗެމްޕިއަންސް ލީގާއި އިނގިރޭސި ޕްރިމިއާ ލީގުގެ އެއް ވަނައިގަ އެވެ. އަދި ލީގު ކަޕްގެ ކުއާޓާ ފައިނަލުގަ އެވެ.
