ޗައިނާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ވާން ލިޖިން ސަފީރުކަމުގެ ދައުރުހަމަކުރައްވާ އެނބުރި ގައުމަށް ވަޑައިގަންނަވާ ގޮތަށް ހަމަޖެހިއްޖެ އެވެ.
ދިވެހި ފޮރިން މިނިސްޓްރީން މިއަދު ނެރުނު ބަޔާނެއްގައި ބުނީ، ޗައިނާގެ ސަފީރު މިއަދު ފޮރިން މިނިސްޓަރު ޑރ. އަބްދުﷲ ހަލީލުގެ އަރިހަށް ވަދާއީ ޒިޔާރަތެއް ކުރެއްވި ކަމަށެވެ. ނަމަވެސް ލިޖިން އެނބުރި ގައުމަށް ފުރާވަޑައިގަންނަވާ ތާރީހެއް ނޭނގެ އެވެ.
މިއަދުގެ ބައްދަލުވުމުގައި، ވޭތުވެދިޔަ ތިން އަހަރުގެ ތެރޭ ރާއްޖެ-ޗައިނާ ގުޅުން އިތުރަށް ބަދަހިކުރުމަށް ސަފީރު ކުރެއްވި މަސައްކަތަށް މިނިސްޓަރު ހަލީލު ޝުކުރު އަދާކުރެއްވި ކަމަށް ހާރިޖިއްޔާއިން ބުންޏެވެ. އަދި ސަފީރުގެ ފަރާތުން ލިބުނު އެހީތެރިކަަމަށް ދިވެހި ސަރުކާރުގެ ނަމުގައި ޝުކުރު އަދާކުރެއްވި ކަމަށްވެ އެވެ.
ބައްދަލުވުމުގައި ލިޖިންވެސް ވަނީ އޭނާގެ ސަފީރުކަމުގެ ދައުރުގައި ދިވެހިން އަދި ދިވެހި ސަރުކާރުން ދިން އެހީތެރިކަމާއި މެހުމާންދާރީއަށް ޝުކުރުއަދާކުރައްވާފަ އެވެ. އަދި، ކުރިއަށް އޮތްތަނުގައިވެސް ދެ ގައުމުގެ ގުޅުން ބަދަހިކުރުމަށް ގާތުން މަސައްކަތްކުރައްވާނެ ކަމަށް ވިދާޅުވެފައިވެ އެވެ.
މިއަދުގެ ބައްދަލުވުމުގައި، ދެބޭފުޅުން އިތުރަށް ކުރެއްވި މަޝްވަރާގެ ތެރޭގައި ރައީސް ޑރ. މުހައްމަދު މުއިއްޒުގެ ސަރުކާރަށް މިވީ އަހަރެއްހާ ދުވަހުގެ ތެރޭގައި ފެށުނު އަދި ކުރިއަށްދާ މަޝްރޫއުތައް ފާހަގަކުރެއްވި ކަމަށްވެސް ފޮރިން މިނިސްޓްރީން ބުންޏެވެ.
ޗައިނާއިން ކަނޑައަޅާފައި ހުންނަ ސަފީރުގެ މަގާމަށް ލިޖިން އައްޔަން ކުރެއްވި ކަމުގެ ރަސްމީ ފަތްކޮޅު ކުރީގެ ރައީސް އިބްރާހިމް މުހައްމަދު ސޯލިހު އަށް އެރުއްވީ ސެޕްޓެމްބަރު 6، 2021 ގަ އެވެ.
މައި ސަރުކާރުގެ މަޝްވަރާނެތި ހާރިޖީ ނިންމުންތައް ނިންމުމުގެ ބާރާއެކު އައްޔަންކުރި ލީޖިން ވޭތުވެދިޔަ ރާއްޖެ-ޗައިނާ ގުޅުން ދެމެހެއްޓުމުގެ އެންމެ އިސް އެއް މޭސްތިރިޔަށެވެ.
އެގޮތުން މިދިޔަ ސަރުކާރުން ޗައިނާއާ ވާދަވެރި އިންޑިއާއެކު ބޭއްވި ގާތް ގުޅުމާއި މި ސަރުކާރުން ޗައިނާއާއެކު ބާއްވާ ގާތް ގުޅުމުގެ ތެރެއިންވެސް ލީޖިން ވަނީ އެ ގައުމުގެ އަމާޒުތަކަށް ވާސިލްވުމުގައި ގިނަ މަސައްކަތްތަކެއް ކޮށްފަ އެވެ.
އޭނާގެ ބަދަލުގައި ޗައިނާއިން ރާއްޖެއަށް ދެން ކަނޑައަޅާ ސަފީރަކު އަދި ހާމައެއް ނުކުރެ އެވެ.
ޗައިނާގެ އިތުރުން އިންޑިއާއިންވެސް ދަނީ ރާއްޖެއަށް ކަނޑައަޅާފައި ހުންނަވާ ސަފީރު ބަދަލުކުރުމުގެ މަސައްކަތް ފަށާފަ އެވެ. ނޮވެމްބަރު 10، 2021 ގަ އައްޔަންކުރި މުނޫ މަހާވަރުގެ ބަދަލުގައި އިންޑިއާއިން ރާއްޖެއަށް ކަނޑައަޅާ ސަފީރަކީ ޖީ ބަލަސުބްރަމަނިއަން އެވެ. އިންޑިއާ ސަރުކާރުން އެކަން އިއުލާނުކުރީ އިއްޔެ އެވެ.
