އިޒްރޭލްގެ ޕާސްޕޯޓުގައި ރާއްޖެއަށް އެތެރެވުން މަނާކުރަން އިދިކޮޅު އެމްޑީޕީން ރައްޔިތުންގެ މަޖިލީހަށް މީގެ ފަސް މަސްދުވަސް ކުރިން ހުށަހެޅި ބިލާމެދު ގޮތެއް ނިންމުމުގެ ކުރިން ފަލަސްތީނާއި އަރަބި ގައުމުތައް އަދި ދުނިޔޭގެ ބޮޑެތި ގައުމުތަކުގެ ބަސް ވެސް ހޯދަން ޖެހޭ ކަމަށް ވެރިކަންކުރާ ޕީއެންސީގެ ޕީޖީ ލީޑަރު އިބްރާހިމް ފަލާހު މިއަދު ވިދާޅުވެއްޖެ އެވެ.
އެ ބިލުގެ ކޮމިޓީ މަސައްކަތުގެ ތެރެއިން މިއަދު ބޭއްވި 241 ކޮމިޓީގެ ބައްދަލުވުމުގައި ވާހަކަ ދައްކަވަމުން އިނގުރައިދޫ ދާއިރާގެ މެންބަރު ފަލާހު ވިދާޅުވީ، މި މައްސަލަ އަކީ އަވަސް އަރުވާލައިގެން ނިންމޭނެ މައްސަލައެއް ނޫން ކަމަށެވެ. އަދި މި ބިލާ ގުޅިގެން ބޮޑު ދިރާސާއެއް ކުރަން ޖެހޭ ކަމަށް ވެސް ވިދާޅުވި އެވެ.
"އެގޮތުން އަޅުގަނޑަށް ފާހަގަކުރެވޭ ގޮތުގަ ފަލަސްތީނުގެ ބަހެއް. އެ ގައުމުގަވެސް ވެރިން އެބަތިބި ކަމާ ގުޅުންހުރި އިދާރާތައް އެބަހުރި. ރާއްޖެއަށް އިޒްރޭލުގެ ރައްޔިތުން އައުން މަނާކުރުމުން އެބޭފުޅުންނަށް އެ ގައުމަށް މިކަމުގަ ކިހާ މަންފާއެއް ފައިދާއެއް ހުރިތޯ. އެބޭފުޅުންނަށް ލިބޭނެ ހިތްހަމަ ޖެހުމެއް އުފާވެރިކަމެއް އޮތްތޯ،" އޭނާ ވިދާޅުވި އެވެ.
"އަދި، އަރަބި އެހެން ގައުމުތަކާ ދުނިޔޭގެ އެހެން ބޮޑެތި ގައުމުތަކުގެވެސް ކަމާ ގުޅުންހުރި އިދާރާތަކުގެ ލަފަޔާ މަޝްވަރާ މިކަމުގެ ހޯދަން ޖެހޭނެ ކަމަށް އަޅުގަނޑު ގަބޫލުކުރަނީ."
މީގެ އިތުރުން، އިދިކޮޅު އެމްޑީޕީން ހުށަހަޅާފައިވާ މި ބިލަކީ ސިޔާސީ ގޮތުން ފައިދާތަކެއް ހޯދުމަށް ކުރި ކަމެއްގެ ގޮތުގައި ސަރުކާރުން ސިފަކުރާ ކުރުން ފަލާހުވެސް ވަނީ މިއަދު ތަކުރާރުކުރައްވާފަ އެވެ. އަދި އެ ފުރުސަތު ދެވިގެން ނުވާނެ ކަމަށްވެސް އޭނާ ވިދާޅުވި އެވެ.
ނަމަވެސް، އެމްޑީޕީން މި ބިލު ހުށަހަޅާފައިވަނިކޮށް ސަރުކާރުން ވަނީ އިޒްރޭލު ޕާސްޕޯޓު މަނާކުރަން ކެބިނެޓުން ނިންމާފައިވާކަން އިއުލާނުކޮށްފަ އެވެ. ބިލު ކޮމިޓީއަށް ފޮނުވީ މި ނިންމުމަށް 10 ދުވަސް ވެސް ނުވަނީހެވެ.
އެ ބިލުގެ ކޮމިޓީ މަސައްކަތް ފެށީ ބިލު ބަލައިގަނެ ކޮމިޓީއަށް ފޮނުވިތާ ފަސް މަސް ފަހުންނެވެ. އޭރު ނިންމީ އަންނަ ފެބްރުއަރީގެ ނިޔަލަށް ކޮމިޓީ މަސައްކަތް ނިންމުމަށެވެ. އަދި ޑިސެމްބަރުގެ ނިޔަލަށް ކަމާބެހޭ އިދާރާތަކަށް ސިޓީ ފޮނުވާ ހާޒިރުކުރުމަށް ވެސް ނިންމި އެވެ. ނަމަވެސް އެ މަސައްކަތްތައް އަވަސް ކުރުމަށް އިއްޔެ ވަނީ އަލުން ނިންމާފަ އެވެ.
ބިލުގެ މަސައްކަތް ލަސްވުމާ ގުޅިގެން އިދިކޮޅު ޕާޓީ އާއި އާންމުންގެ ގިނަ ބަޔަކު ވެސް އަންނަނީ ސަރުކާރާއި މަޖިލީހުގައި އޮތް ސަރުކާރުގެ މެޖޯރިޓީގެ އިތުރުން ރައީސް ޑރ. މުހައްމަދު މުއިއްޒަށް ފާޑުކިޔަމުންނެވެ. ކޮމިޓީގެ މަސައްކަތް އަންނަ އަހަރާ ހަމައަށް ދިގުދަންމާލުމާއެކު މި ފާޑުކިޔުންތައް ވަނީ އިތުރަށް ބޮޑުވެފަ އެވެ.
ބިލުގެ މަސައްކަތް ލަސްވެފައިވަނިކޮށް، އޮކްޓޯބަރު 16، ގައި މަޖިލީހުގެ ސުޕަ މެޖޯރިޓީ އޮތް ސަރުކާރު ހިންގާ ޕީއެންސީން ވަނީ އެ މަސައްކަތް އަވަސްކުރުމަށް ގޮވާލާ ބަޔާން ނެރެފަ އެވެ. އެ ބަޔާން ނެރުމުން، އެ ބިލު ހުށަހެޅުއްވި މީކާއިލް އަހުމަދު ނަސީމް ވިދާޅުވީ ޕީއެންސީން ބަޔާން ނެރުނީ ރައްޔިތުންނަށް މަލާމާތް ކުރަން ކަމަށެވެ.
