މަސްތުވާތަކެތިން ރާއްޖެ ސަލާމަތް ކުރުމަކީ އެންމެ އިސްކަންދޭ އެއް ކަންތައް ކަމަށް ރައީސް ޑރ. މުހައްމަދު މުއިއްޒު މިރޭ ވިދާޅުވެއްޖެ އެވެ.
ރައީސް މުއިއްޒު "އެކްސް" ގައި ކުރެއްވި ޕޯސްޓެއްގައި ވަނީ ރާއްޖޭގެ ސަލާމަތީ ހިދުމަތްތަކުން މިއަދު 468.6 ކިލޯގެ މަސްތުވާތަކެތި ކަނޑުގެ ސަރަހައްދުން އަތުލައިގަތުމުން އެކަމަށް މަރުހަބާ ވިދާޅުވާ ކަމަށެވެ.
"ދިވެހިރާއްޖެ މަސްތުވާތަކެތިން އެއްކޮށް ސަލާމަތްކުރުމަކީ އަޅުގަނޑުމެން އެއްމެ އިސްކަންދޭ އެއްކަންތައް. ގާނޫނު ތަންފީޒުކުރާ މުއައްސަސާތަކުން މިދާއިރާއިން ކުރަމުން ގެންދާ ބުރަ މަސައްކަތް ފާހަގަކޮށް އެ ފަރާތްތަކަށް ޝުކުރު ދަންނަވަން،" ރައީސް ވިދާޅުވި އެވެ.
ފުލުހުންގެ އިދާރާގައި ބޭއްވި ނޫސްވެރިންގެ ބައްދަލުވުމެއްގައި މި މައްސަލައިގެ ބައެއް ތަފުސީލުތައް ހިއްސާކުރައްވަމުން ޕޮލިސް ކޮމިޝަނަރު އަލީ ސުޖާއު ވިދާޅުވީ، ރޭގެ ދަންވަރުގެ ވަގުތެއްގައި ހދ. މަކުނުދޫ ބޭރުން މި ބޯޓު އަތުލައިގަތީ އެމްއެންޑީއެފްއިން ކަމަށެވެ.
ފުލުހުންނަށް ޑްރަގު ފެނުނީ އެމްއެންޑީއެފްއިން މި ބޯޓު އަތުލައިގަތުމަށް ފަހު ކުޅުދުއްފުށީ ބަނދަރަށް ގެންގޮސް ބަލައިފާސްކުރުމުގެ ތެރެއިންނެވެ. ޝުޖާއު ވިދާޅުވީ މި ބޯޓުން ފެނުނު މަސްތުވާތަކެތީގެ ޕްރިލިމިނަރީ ޓެސްޓު ނަތީޖާތަކުން ދައްކާ ގޮތުގައި އޭގެ ތެރޭގައި ހުރީ 344 ކިލޯގެ ކްރިސްޓަލް މެތާއި 124 ކިލޯގެ ކޮކެއިން ކަމަށެވެ.
އެ އޮޕަރޭޝަނާ ގުޅޭ މައުލޫމާތު ހިއްސާކުރަމުން ސުޖާއު ވިދާޅުވީ "އަށެންގުތަ" ނަމަކަށް ކިޔާ މި ބޯޓުގައި ތިބީ ލަންކާ ފަސް މީހުން ކަމަށެވެ. އަދި މި ތަކެތީގެ މަގުމަތީ އަގު އެއް ބިލިއަން ރުފިޔާއަށް އަރާ ކަމަށް ވެސް އޭނާ ފާހަގަކުރެއްވި އެވެ.
މިއީ މި ފަހުގެ ތާރީހެއްގައި ރާއްޖޭން އެއް ފަހަރާ އެންމެ ގިނައިން އަތުލައިގަތް މަސްތުވާތަކެއްޗެެވެ.
