ވެރިކަން ކުރާ ޕީއެންސީގެ އެތެރޭގެ އިންތިހާބުގެ ވޯޓުލުން ފަށައިފި އެވެ.
މާލެ އާއި އަތޮޅުތެރޭގެ 88 ރަށެއްގައި ވޯޓުލުން ކުރިއަށް ގެންދާ އިންތިހާބުގެ ވޯޓުލުން ކުރިއަށް ދާނީ މިއަދުގެ މެންދުރުފަހު 2:00 އާ ހަމައަށެވެ.
33500 މީހުންނަށް ވޯޓުލުމުގެ ހައްގު ލިބިފައިވާ މި އިންތިހާބުގައި 1984 މަގާމަކަށް މީހުން އައްޔަނު ކުރަން ނިންމާފައިވާ ކަމަށް ޕީއެންސީން ބުންޏެވެ. މިއަދުގެ އިންތިހާބުގައި މާލެ އާއި އަތޮޅު ތެރޭގައި ޖުމުލަ 144 ވޯޓު ފޮށި ބަހައްޓާފައިވެ އެވެ.
ޕީއެންސީގެ އެތެރޭގެ އިންތިހާބު ފުރަތަމަ ބާއްވަން ތާވަލު ކުރީ އޮކްޓޫބަރު 19، ގަ އެވެ. އޭގެފަހުން ނޮވެމްބަރު 9، އަކަށް އިންތިހާބު ފަސްކުރުމަށްފަހު، މިއަދަށް އިންތިހާބު އަނެއްކާވެސް ފަސް ކުރީ އެވެ.
ޕީއެންސީގެ އެތެރޭގެ އިންތިހާބަށް ކުރިމަތިލި ކެންޑިޑޭޓުންގެ ލިސްޓު ނޮވެމްބަރު 13، ގައި އިއުލާނު ކުރިއިރު، ބައެއް ކެންޑިޑޭޓުންގެ ނަން އުނިކޮށް، ކުރިމަތި ނުލާ މީހުންގެ ނަން އިތުރު ކޮށްފައި ހުރުމުން ވަރަށް ބޮޑަށް މައްސަލަ ގޯސްވި އެވެ.
އެ ހިތްހަމަ ނުޖެހުމުގައި ބައެއް ކެންޑިޑޭޓުން ވަނީ އެމީހުންގެ ނަން ވެސް އަނބުރާ ގެންގޮސްފަ އެވެ.
