އެންޓި ކޮރަޕްޝަން ކޮމިޝަނުގެ މުވައްޒަފުންގެ ކްލަބުގެ ނުވަ ލައްކައެއްހާ ރުފިޔާއަށް އެތަނުގެ ޑެޕިއުޓީ ޑިރެކްޓަރު އަދި މީޑިއާ އޮފިޝަލް ހަސަން މަނިކު ހިޔާނާތްތެރިވި މައްސަލައެއް ބަލަން ފަށައިފި އެވެ.
"އަދަދު" އަށް އެނގިފައިވާ ގޮތުގައި އެ މައްސަލަ ފެންމަތިވުމުން ހަސަން ވަނީ މަގާމުން ސަސްޕެންޑުކޮށްފަ އެވެ. އަދި ނޮވެމްބަރު 13، އިން ފެށިގެން އޭނާގެ މައްސަލަ ތަހުގީގު ކުރަމުންދާ ކަމަށް އެނގިފައިވެ އެވެ.
ހަސަންގެ މަނިކުގެ މައްޗަށް ތުހުމަތު ކުރެވެނީ މިދިޔަ އަހަރުން ފެށިގެން އޭސީސީގެ މުވައްޒަފުންގެ ކްލަބުގެ ފައިސާއިން ނުވަ ލައްކައެއްހާ ރުފިޔާ ނަގައި، އެ ފައިސާ ބޭނުން ކުރި ކަމުގެ ތުހުމަތެވެ.
އެ މައްސަލައާ ގުޅިގެން އޭސީސީން އިންޓާނަލް އޮޑިޓެއް ވަނީ ފަށައިފަ އެވެ. އޭސީސީގެ ކްލަބުގެ ފަރާތުން އެ މައްސަލަ ފުލުސް އޮފީހަށް ހުށަހެޅުމުން ފުލުހުން ވެސް އަންނަނީ މައްސަލަ ތަހުގީގު ކުރަމުންނެވެ.
އެކަމާ ގުޅިގެން އޭސީސީގެ ބަހެއް ހޯދަން މި ނޫހުން ތަކުރާރުކޮށް އެ ކޮމިޝަނުގެ މެންބަރުންނަށް ގުޅުމުން ފޯނަށް ޖަވާބުދީފައެއް ނުވެ އެވެ.
އޭސީސީގައި 2007 އިން ފެށިގެން ވަޒީފާ އަދާކުރަމުންދާ ހަސަންމަނިކަކީ އެ ކޮމިޝަންގެ މެންބަރުންގެ ބިއުރޯގެ ހެޑެވެ. އޭނާ ވަނީ އައިޓީ ދާއިރާއިން ޑިޕްލޮމާ ވެސް ހާސިލު ކުރައްވައިފަ އެވެ.
ކޮރަޕްޝަންގެ މައްސަލަތައް ބަލާ އޭސީސީގައި ވެސް ކޮރަޕްޝަންގެ މައްސަލަތަކެއް ހިނގަމުންދާއިރު، އެ ކޮމިޝަނަށް ހުށަހަޅާފައިވާ ގިނަ އަދަދެއްގެ ކޮރަޕްޝަންގެ މައްސަލަތައް އޮތީ ހުއްޓިފަ އެވެ.
