ގާނޫނުއަސާސީގެ ބައެއް މާއްދާތައް އިސްލާހު ކުރާއިރު ރައްޔިތުންގެ ވޯޓަކަށް ދާންޖެހޭނެ ކަމަށް ބުނާ މާއްދާ އިސްލާހު ކުރަން ވެސް ރައްޔިތުންގެ އާންމު ވޯޓެއް ނަގަންޖެހޭ ގޮތަށް ހަދަން ހުށަހަޅައިފި އެވެ.
އެގޮތަށް ބަދަލު ކުރަން ހުށަހަޅާފައި އޮތީ ގާނޫނުއަސާސީގެ ބައެއް މާއްދާތައް ބަދަލު ކުރަން ވެރިކަން ކުރާ ޕީއެންސީން މާދަމާ މަޖިލީހަށް ހުށަހަޅަން ތައްޔާރުކޮށްފައި އޮތް ބިލުގަ އެވެ.
ގާނޫނުއަސާސީގައި މިހާރު ލިޔެފައި އޮތް ގޮތުން ރައްޔިތުންގެ އާންމު ވޯޓަކަށް ދާންޖެހޭނީ ގާނޫނުއަސާސީގެ އަސާސީ ހައްގުތަކުގެ ބާބުގެ މާއްދާތަކާއި ރައްޔިތުންގެ މަޖިލީހުގެ އުމުރު ބަޔާން ކުރާ މާއްދާ އާއި ރިޔާސަތުގެ ދައުރު އަދި ރައީސުލްޖުމްހޫރިއްޔާ އިންތިހާބު ކުރާ ގޮތް ބަޔާން ކުރާ މާއްދާ ބަދަލު ކުރާ ނަމަ އެކަންޏެވެ.
އެ މާއްދާތައް އިސްލާހު ކުރަން ރެފަރެންޑަމަކަށް ދާންޖެހޭނެ ކަމަށް ބުނާ މާއްދާ، ރިފަރެންޑަމަކަށް ނުގޮސް މިހާރު އޮތް ގޮތުން އިސްލާހު ކުރެވޭނެ އެވެ. ނަމަވެސް މާދަމާ ހުށަހަޅާ ބިލު އޮތް ގޮތަށް ފާސްވެއްޖެ ނަމަ އެ މާއްދާ ބަދަލު ކުރެވޭނީ ވެސް އާންމުންގެ ފެންނަ ނުފެންނަ ވޯޓަކުންނެވެ.
ގާނޫނުއަސާސީއަށް ޕީއެންސީން އިސްލާހުތަކެއް ގެންނަން މި މަސައްކަތް ކުރަނީ ރައްޔިތުންގެ މަޖިލީހުގެ މެންބަރަކު ޕާޓީ ބަދަލުކޮށްފި ނަމަ އިސްތިއުފާ ދޭންޖެހޭނެ ކަމަށް ބުނާ މާއްދާ ބާތިލް ކުރަން ހައި ކޯޓަށް ހުށަހަޅާފައި އޮއްވަ އެވެ. މާދަމާ ހުށަހަޅާ ބިލުގެ އެންމެ މުހިންމު މަގުސަދަކީ، ޕާޓީ ބަދަލުކޮށްފި ނަމަ ގޮނޑި ގެއްލޭނެ ކަމަށް ބުނާ މާއްދާތަކެއް އަސާސީއަށް އިތުރު ކުރުމެވެ.
އެގޮތުން، ވަކި ޕާޓީއެއްގެ ޓިކެޓުގައި ހޮވި ޕާޓީ ބަދަލުކޮށްފި ނަމަ، ނުވަތަ ޕާޓީން ވަކިކޮށްފި ނަމަ ނުވަތަ އަމިއްލަ މެންބަރަކު ޕާޓީއަކަށް ސޮއިކޮށްފި ނަމަ މަޖިލީހުގެ ގޮނޑި ގެއްލޭނެ ކަމަށް މާދަމާ ހުށަހަޅާ ބިލުގައި ބަޔާންކޮށްފައިވެ އެވެ.
