ތިމާވެއްޓާ ބެހޭ މިނިސްޓްރީގެ ޑެޕިއުޓީ މިނިސްޓަރު ރާގިބު އަހުމަދު، ސިޔާސީ މުވައްޒަފެއްގެ ގޮތުގައި ހުރެގެން ވެސް ދައުލަތާ ދެކޮޅަށް ވަކާލާތު ކުރެވޭނެ ކަމަށް ކްރިމިނަލް ކޯޓުން ނިންމައިފި އެވެ.
ދައުލަތުން ހިޔާނާތުގެ ދައުވާތަކެއް އުފުލާފައިވާ ހަސަން މަމްދޫހު (ކޭޕާކު މަންޑޭ) ގެ ވަކީލެއްގެ ގޮތުގައި ރާގިބު ވަކާލާތު ކުރާތީ، އެކަމަށް އިއުތިރާޒުކޮށް މައްސަލަ ހުށަހެޅީ ދައުލަތުންނެވެ. ނަމަވެސް ކްރިމިނަލް ކޯޓުން ނިންމީ މަމްދޫހުގެ ވަކީލެއްގެ ގޮތުގައި ރާގިބަށް ވަކާލާތު ނުކުރެވޭނެ ކަމަށް ކަނޑައަޅައި ދިނުމަށް އެދި ދައުލަތުން ކުރި އިއުތިރާޒު ބަލައި ނުގަތުމަށެވެ.
ދައުލަތުން އިއުތިރާޒުކުރީ ސިޔާސީ މަގާމެއްގައި ހުރެގެން ޖިނާއީ މައްސަލައެއްގައި ގާނޫނީ ވަކީލެއްގެ ހައިސިއްޔަތުން ދައުލަތާ ދެކޮޅަށް ވަކާލާތުކުރުމަކީ މަސްލަހަތު ފުށުއަރާ ކަމެއް ކަމަށާއި، މީގެ ކުރިން ހައިކޯޓުން ވެސް އެގޮތަށް ކަނޑައަޅާފައިވާ ކަމަށް ބުނެ އެވެ. ކްރިމިނަލް ކޯޓުގައި ހިނގަމުންދާ މައްސަލައަކީ ވެސް އެ ވަކީލު ޕްރޮސެކިއުޓާ ޖެނެރަލް އޮފީހާ ދެކޮޅަށް ވަކާލާތުކުރާ މައްސަލައެއް ކަމަށްވާތީ، ރާގިބަށް އެ މައްސަލައިގައި މަމްދޫހުގެ ވަކީލެއްގެ ގޮތުގައި ދައުލަތާ ދެކޮޅަށް ވަކާލާތު ނުކުރެވޭނެ ކަމަށް ދައުލަތުން ބުންޏެވެ.
ދައުލަތުން ބުނީ ސިޔާސީ މަގާމުތަކަށް އައްޔަން ކުރާ ނުވަތަ ދައުލަތުން މުސާރަ ދޭ މަގާމެއްގައި ދެމިހުރިހައި ހިނދަކު ދައުލަތާ ގުޅުންހުރި މައްސަލަތަކުގައި ދައުލަތާ ދެކޮޅަށް މަސައްކަތް ކުރުމަކީ އޭނާގެ ވަކީލު ކަމުގެ މަސްލަހަތު ދައުލަތުގެ މަސްލަހަތާ ފުށުއަރާ ހާލަތެއް ކަމަށާއި އެފަދަ މަގާމެއްގައި ހުރި ކަމަށް ބެލެވޭ ފަރާތެއް ބައިވެރިވާތީ އޭނާ ވަކީލެއްގެ ގޮތުގައި ރާގިބު ބަލައިގަތުމަށް ދައުލަތުން އިއުތިރާޒުކުރާ ކަމަށެވެ.
އެ މައްސަލައިގައި ކްރިމިނަލް ކޯޓުން ނިންމީ މަސްލަހަތު ފުށުއަރާ މައްސަލައެއްގައި ވަކީލަކު ވަކާލާތުކުރާނަމަ އެކަން ބަލައި ފިޔަވަޅު އެޅުމަކީ ބާ ކައުންސިލްއަށް ލިބިގެންވާ ބާރެއް ކަމަށެވެ. ކޯޓުން އެމައްސަލަ ބަލައި ފިޔަވަޅު އަޅާނަމަ އެއީ ބާ ކައުންސިލަށް ލިބިގެންވާ ބާރަކަށް ކޯޓުން ވަނުން ކަމަށް ފަނޑިޔާރުގެ ނިންމުމުގައި ބުނެފައިވެ އެވެ.
މީގެ ކުރިން އެހެން މައްސަލައެއްގައި ރާގިބަށް ވަކާލާތުނުކުރެވޭނެ ކަމަށް ހައި ކޯޓުން ނިންމާފައި އޮތް ނަމަވެސް ކްރިމިނަލް ކޯޓުން ނިންމީ، ކުރިން ހައިކޯޓުން ނިންމި ނިންމުމާ މިމައްސަލައިގެ ހަގީގަތްތައް ތަފާތުކަމަށެވެ.
ހައި ކޯޓުގައި ކުރިއަށް ދިޔަ މައްސަލައަކީ ކުޑަކުއްޖަކާމެދު ގަދަކަމުން ބަދުއަހުލާގީ އަމަލު ހިންގި މައްސަލައެކެވެ. އެ މައްސަލައިގައި ބަހުސްކޮށްފައި އޮތީ ކުޑަކުދިންގެ ހައްގުތަކަށް ރައްކާތެރިވުމަށް ދައުލަތުގެ މައްޗަށް އޮތް ޒިންމާ ތަމްސީލުކުރުމުގައި ސިޔާސީ މަގާމުތަކުގައި ތިބޭ މީހުން އަދާކުރާ ދައުރަށް ބަލާއިރު، އެފަދަ މަގާމެއްގައި ހުރި މީހަކު އެ މައްސަލައިގައި ވަކާލާތުކުރުމުން މަސްލަހަތު ފުށުއަރާކަމާމެދުގަ އެވެ.
މަތީ މަރުހަލާގެ ކޯޓުތަކުގެ ނިންމުންތަކަކީ އެއްވެސް އިސްތިސްނާއެއް ނެތި ހުރިހާ ހާލަތުތަކެއްގައި ތަބާވާންޖެހޭ ނިންމުންތަކެއް ނޫން ކަމަށް މީގެ ކުރިން ދިވެހިރާއްޖޭގެ ސުޕްރީމް ކޯޓުން ކަނޑައަޅާފައިވާ ނިންމުމަކާ ހަވާލާ ދީ ކްރިމިނަލް ކޯޓުން ކަނޑައެޅީ ހައިކޯޓުގެ އެ ނިންމުމަކީ 'ޕާ އިންކިއުރިއަމް' ނުވަތަ އަމަލުކުރުން ލާޒިމުވާ ބާވަތުގެ ނިންމުމެއް ނޫން ކަމަށެވެ.
އެގޮތަށް ކަނޑައެޅުމުގައި ކޯޓުން ފާހަގަކޮށްފައި އޮތީ އެ ނިންމުން ގާނޫނީ ފަންނުގެ ގާނޫނުގެ ހަތް ވަނަ މާއްދާ އާއި ޖިނާއީ އިޖުރާއަތުގެ ގަވާއިދުގެ 151 ވަނަ މާއްދާގެ ހ. އާ ފުށުއަރާ ކަމަށް ފާހަގަކުރެއްވުމަށްފަހު އެވެ.
ގާނޫނީ ފަންނުގެ ގާނޫނުގެ ހަތް ވަނަ މާއްދާގައި އޮންނަނީ ވަކީލުންގެ ސުލޫކީ މައްސަލަ ބެލުމުގެ ބާރު ލިބިގެންވަނީ ބާ ކައުންސިލަށް ކަމަށެވެ. އަދި ޖިނާއީ އިޖުރާއަތުގެ ގަވާއިދުގެ 151 ވަނަ މާއްދާގެ ހ. ގައި އޮންނަނީ ވަކީލަކު ސުލޫކީ މިންގަނޑާ ހިލާފުވެއްޖެނަމަ އެ މައްސަލައެއް ބާ ކައުންސިލްއަށް ހުށަހެޅުމުގެ ބާރު ފަނޑިޔާރަށް ލިބިގެންވާ ކަމަށެވެ.
އެ މާއްދާތަކާ ހަވާލާދީ ކޯޓުން ބުނީ ވަކީލުގެ މައްސަލަ ބާ ކައުންސިލްއަށް ހުށަހެޅުމުގެ އިތުރުން އިތުރު ފިޔަވަޅެއް އެޅުމަކީ މައްސަލަ ބަލާ ފަނޑިޔާރަށް ލިބިގެންވާ އިހުތިޔާރެއް ނޫން ކަމަށެވެ.
