ސްރީލަންކާގެ ރައީސް އަނޫރާ ކުމާރާ ޑިސަނަޔަކެގެ ކޯލިޝަނުން ގާނޫނު ހަދާ މަޖިލީހުގެ އިންތިހާބުގެ ގިނަ ގޮނޑިތައް ކާމިޔާބުކޮށް، މަޖިލީހުގެ ފުރިހަމަ ކޮންޓްރޯލް ހޯދައިފި އެވެ.
ސްރީލަންކާގެ އިލެކްޝަން ކޮމިޝަނުން ހާމަކުރި ގޮތުގައި ޑިސެނަޔަކެގެ ނެޝަނަލް ޕީޕަލްސް ޕަވާ (އެންޕީޕީ) އިން ވަނީ ގާނޫނު ހަދާ މަޖިލީހުގެ 225 ގޮނޑީގެ ތެރެއިން 159 ގޮނޑި ކާމިޔާބުކޮށްފަ އެވެ.
އިންތިހާބުގައި އިދިކޮޅު ސަމާގީ ޖަނާ ބަލަވެގަޔާ (އެސްޖޭބީ) އިން 40 ގޮނޑި ކާމިޔާބުކުރި އިރު، ކުރިން ގާނޫނު ހަދާ މަޖިލީހުގައި 145 ގޮނޑި ކާމިޔާބުކުރި މަހިންދަ ރާޖަޕަކްސާގެ އެސްއެލްޕީޕީ ޕާޓީއަށް މިފަހަރު ލިބުނީ އެންމެ ދެ ގޮނޑި އެވެ.
މި ފަހަރު، ކުރީގެ ގިނަ މެންބަރުން ވަނީ ނާކާމިޔާބު ވެފަ އެވެ.
ލަންކާ ބަނގުރޫޓުވިއިރު ގެއްލުނު ފައިސާ ހޯދައި، ކޮރަޕްޝަންގެ މައްސަލަތައް ބެލުމަށް ޑިސެނަޔަކެ ވަނީ ވައުދުވެފަ އެވެ. އަދި ގައުމު މިހާރު އޮތް ހާލަތުން ނަގައި ކޮޅަށް ޖެހުމަކީ ވެސް އޭނާގެ ވައުދެކެވެ.
މިދިޔަ ސެޕްޓެމްބަރު 21، ގައި ބޭއްވި ލަންކާގެ ރިޔާސީ އިންތިހާބު ޑިސެނަޔަކެ ކާމިޔާބުކުރީ 42 ޕަސަންޓު ވޯޓު ހޯއްދަވައިގެންނެވެ.
