ޑޮލަރު މާރުކުރުން ލާޒިމުކުރާތީ ހުރި ޓޫރިޒަމް ދާއިރާގައި ހުރި ކަންބޮޑުވުންތަކާ ގުޅިގެން އެ ދާއިރާގެ ވިޔަފާރިވެރިންނާއެކު ރައްޔިތުންގެ މަޖިލީހުގެ އިގުތިސާދީ ކޮމިޓީން ބައްދަލުވުމެއް ބޭއްވުމަށް ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް އެދިވަޑައިގެންފި އެވެ.
ރައްޔިތުންގެ މަޖިލީހުގެ ރައީސް އަބްދުﷲ އަބްދުއްރަހީމް އަށް އެޑްރެސް ކުރައްވައި، މުހައްމަދު އިބްރާހިމް މިއަދު ފޮނުއްވި ސިޓީގައި ވަނީ ޓޫރިސްޓު ފެސިލިޓީތަކަށް ލިބޭ ޑޮލަރުން ވަކި މިންވަރެއް ރާއްޖޭގެ ބޭންކުތަކަށް މާރުކުރުން ލާޒިމުކުރުމުން ޓޫރިޒަމް ވިޔަފާރީގައި ހަރަކާތްތެރިވާ ވަރަށް ގިނަ ބައެއްގެ ކަންބޮޑުވުން ހިރި ކަމަށެވެ.
"ދިވެހިރާއްޖެއަށް ޒިޔާރަތްކުރާ ޓޫރިސްޓުންގެ ތެރެއިން ރިސޯޓުތަކަށް އަންނަ ކޮންމެ ޓޫރިސްޓަކަށް 500 ޑޮލަރު އަދި ގެސްޓު ހައުސްތަކަށް އަންނަ ކޮންމެ ޓޫރިސްޓަކަށް 25 ޑޮލަރުގެ މަގުން ބޭންކަށް ޑޮލަރު މާރުކުރަން ލާޒިކޮށްފައިވާތީ ޓޫރިޒަމް ސިނާއަތުގައި އެކަމާމެދު ނުހަނު ބޮޑަށް ކަންބޮޑަުވުން އޮތް ކަމަށް ދެކެމެވެ،" އޭނާ ގެ ސިޓީގައިވެ އެވެ.
އެކަމާ ގުޅިގެން މޯލްޑިވްސް އެސޯސިއޭޝަން ޓޫރިޒަމް އިންޑަސްޓްރީ (މަޓީ)ގެ ކަންބޮޑުވުން ވެސް ފާޅުކޮށްފައިވެ އެވެ.
ޑޮލަރު ތާށިކަމުގެ މައްސަލަ ހައްލުކުރުމުގެ ގޮތުން ބޭރު ފައިސާ މާރުކުރުމުގެ ގަވާއިދާއި ބޭރު ފައިސާއާ ބެހޭ ގަވާއިދަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ބަދަލު ގެނައީ ހުށަހެޅި އެއްވެސް ކަންބޮޑުވުމަކަށް އިޖާބަ ނުދީ ކަމަށް ރިސޯޓު ވިޔަފާރިވެރިންގެ ޖަމިއްޔާ، މަޓީން ބުނެފައިވެ އެވެ.
މި ބަދަލުތައް ގެނައީ ޓޫރިޒަމް ދާއިރާގެ މަސްލަހަތުވެރިންނާ މަޝްވަރާ ކުރުމަށް ފަހު ކަމަށް އެމްއެމްއޭއިން ބުނެފައިވެ އެވެ. އެހެން ނަމަވެސް, މަޓީން އޮކްޓޯބަރު 3 ގައި ނެރުނު ބަޔާނެއްގައި ބުނީ އެކަން އެގޮތަށް ހިނގާފައި ނުވާ ކަމަށް ބުނެފައިވެ އެވެ.
މެންބަރު މުހައްމަދު އިބްރާހީމް، މަޖިލީހުގެ ރައީސް އަށް ފޮނުއްވި ސިޓީގައި ވަނީ އެމްއެމްއޭގެ އެ ގަވާއިދަކީ ޓޫރިޒަމް ސިނާއަތުގެ ވިޔަފާރީގެ ހަގީގަތްތަކާ ދުރު ދިވެހިރާއްޖޭގެ މި ވަގުތުގެ އިގުތިސާދީ ހާލަތާ ނުބައްދަލު ގަވާއިދެއް ކަމަށެވެ.
މި ގަވައިދާމެދު ކަންބޮޑުވުން ހުރުމުން ޑޮލަރު މާރު ނުކުރާނެ ކަމަށް ބައެއް ރިސޯޓުތަކުން އެމްއެމްއޭއަށް އަންގާފައިވާ ކަމަށް، ރިސޯޓު ހިންގާ ބައެއް ވެރިން އަދަދު ނޫހަށް ވިދާޅުވި އެވެ.
"ދެންނެވުނު ގަވާއިދާއި އަދި އެ ގަވާއިދާ ގުޅޭ ގޮތުން މިހާތަނަށް ކަން ހިނގާފައިވާ ގޮތް ސާފުކުރުމަށާއި ޓޫރިޒަމް ސިނާއަތުގެ ކަންބޮޑުވުންތައް ރައްޔިތުންގެ މަޖިލީހުން ދެނެގަތުމަށްޓަކައި ޓޫރިޒަމް ސިނާއަތުގެ ހަރަކާތްތެރިވާ ވިޔަފާރިތަކާއި އަދި ވިޔަފާރިވެރިންނާ ބައްދަލުކޮށް، އާންމުނކޮށް ހުޅުވާއިލައިގެން ރައްޔިތުންގެ މަޖިލީހުގެ އިގުތިސޯދީ ކިމިޓީން އެ ފަރާތްތަކުގެ އަޑު އެހުމުގެ ބައްދަލުވުމެއް ވަރަށް އަވަހަށް އިންތިޒާމުކޮށް ދެއްވިމަށް ދެންނެވީ މެވެ،" މުހައްމަދު އިބްރާހިމް ވިދާޅުވި އެވެ.
ރާއްޖޭގެ 173 ރިސޯޓަކުން ޑޮލަރު މާރުކުރަން އެމްއެމްއޭގައި ރެޖިސްޓަރީކޮށްފައިވާ ކަމަށް އެމްއޭއިން ބުނެ އެވެ.
