ވެރިކަން ކުރާ ޕީޕަލްސް ނެޝަނަލް ކޮންގުރެސް ޕާޓީ (ޕީއެންސީ) ގެ އެތެރޭގެ އިންތިހާބަށް ކުރިމަތިލީ ބައެއް ކެންޑިޑޭޓުންގެ ނަންތައް އުނިކޮށް، ކުރިމަތި ނުލާ ބައެއް މީހުންގެ ނަން އިތުރުކޮށް ކެންޑިޑޭޓުންގެ ލިސްޓު ގަޑުބަޑުކޮށްފައިވާ ކަމަށް ބުނެ އެ ޕާޓީގެ މެންބަރުން އެކަމާ ކަންބޮޑުވުން ފާޅުކުރަން ފަށައިފި އެވެ.
"އަދަދު" އަށް އެނގިފައިވާ ގޮތުގައި ޕީއެންސީގެ އެތެރޭގެ އިންތިހާބަށް ކުރިމަތިލި މީހުންގެ ލިސްޓު މިއަދު އިއުލާނު ކުރިއިރު، ބައެއް ދާއިރާތަކަށް ކުރިމަތިލީ ކެންޑިޑޭޓުންގެ ނަންތައް ވަނީ އުނިކޮށްފަ އެވެ. އަދި ބައެއް މީހުން ކުރިމަތިލީ ދާއިރާ ނޫން އެހެން ދާއިރާތަކަށް ބަދަލު ކޮށްފައި ހުރި ކަމަށް ތުހުމަތުކޮށް ޕީއެންސީގެ ބައެއް މެންބަރުން މި ނޫހަށް މައުލޫމާތު ދިނެވެ.
"ވޯޓު ކަރުދާހުން ފާހަގަ ވެއްޓޭގޮތަށް މިއިނީ ހުޅުމާލެ މެދު ދާއިރާގެ ނައިބު [ރައީސް ކަމުން] ހުޅުމާލެ ދެކުނު ރައީސް ކަމަށް ބަދަލުވެފައި، ސަނީހު އަކީ [ހުޅުމާލެ] މެދު ދާއިރާގެ ނައިބު ރައީސް ކަމަށް ލާފައި ހުރި މީހެއް، ދެން މި ދާއިރާގެ ރައީސް ކަމަށް ކުރިމަތިލީ ޝާނީޒު ހާޝިމްގެ ނަމެއް ނެތް ލިސްޓުގައެއް،" ނަން ނުޖެހުމަށް ޝަރުތުކޮށް ވާހަކަދެއްކި ޕީއެންސީ މެންބަރަކު ބުންޏެވެ.
ހުޅުމާލެ ދެކުނު ދާއިރާގެ ރައީސްގެ މަގާމަށް ކުރިމަތިލާފައިވާ ކަމަށް މިއަދު ޕީއެންސީން އާންމު ކުރި ލިސްޓުން ފެންނަން އޮތީ އަހުމަދު ސަނީހު ހަނީފުގެ ނަން އެކަންޏެވެ. ނަމަވެސް މަޖިލިސް އިންތިހާބުގައި ޕީއެންސީގެ ޓިކެޓުގައި އެ ދާއިރާއަށް ވާދަކުރި ޝާނީޒް ހާޝިމް ވެސް އެ ދާއިރާއަށް ކުރިމަތިލި ކަމަށް މި ނޫހަށް މައުލޫމާތު ދިން މީހާ ބުންޏެވެ.
އެ ދާއިރާގެ އިތުރުން މާފަންނު އުތުރު ދާއިރާގެ ރައީސް ކަމަށް ކުރިމަތިލި އިސްމާއިލް އަބްދުއްރަހީމްގެ ނަން ވެސް ވަނީ މިއަދު އިއުލާނު ކުރި ކެންޑިޑޭޓުންގެ ލިސްޓުން އުނިކޮށްފަ އެވެ.
ޕީއެންސީން މިއަދު އާންމުކުރި ލިސްޓުގައި އެ ދާއިރާއަށް ކުރިމަތިލާފައިވާ ކަމަށް ފެންނަން އޮތީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުއާ އާއިލީ ގުޅުން އޮންނަ، ރައީސް އޮފީހުގެ މިނިސްޓަރު، އަލީ އާރިފްގެ ނަން އެކަންޏެވެ.
އޭގެ އިތުރުން ބައެއް އެހެން ދާއިރާތަކަށް ކުރިމަތިލީ މީހުންގެ ނަންތައް ވެސް އުނިކޮށްފައިވާ ކަމަށް މި ނޫހަށް މައުލޫމާތު ދިން ޕީއެންސީގެ މެންބަރުން ބުންޏެވެ.
އެކަމަ ގުޅޭ ގޮތުން ޕީއެންސީގެ މައުލޫމާތު ހޯދުމަށް ޕީއެންސީގެ ސެކްރެޓަރީ ޖެނެރަލް، ޒީނާޒް އަދުނާނަށް ގުޅުމުން ފޯނަށް ޖަވާބެއް ނުދެއްވާތީ އެ ޕާޓީގެ ރަސްމީ ބަހެއް ލިބޭ ގޮތެއް ނުވި އެވެ.
ޕީއެންސީގެ އެތެރޭގެ އިންތިހާބަށް ކުރިމަތިލީ ކެންޑިޑޭޓުންގެ ލިސްޓާއެކު މިއަދު އެ ޕާޓީން ނެރުނު އިއުލާނުގައި ބުނެފައި ވަނީ އެ ލިސްޓުގައި ހުރި ނަންތަކަކީ އިންތިހާބުގައި ވާދަކުރަން ހުށަހެޅު ފަރާތްތަކުގެ ތެރެއިން ޝަރުތު ހަމަވާ ކެންޑިޑޭޓުންގެ ނަންތައް ކަމަށެވެ.
"2024 ނޮވެމްބަރު 23 ވާ ހޮނިހިރު ދުވަހު ބޭއްވުމަށް ހަމަޖައްސާފައިވާ ޕީޕަލްސް ނެޝަނަލް ކޮންގްރެސް (ކޮންގްރެސް ޕާޓީގެ ދާއިރާތަކުގެ އިންތިހާބުުގައި ވާދަކުރަން ހުށަހަޅާފައިވާ ކެންޑިޑޭޓުންގެ ތެރެއިން ޝަރުތުތަކާއި އިޖުރާއަތު ފުރިހަމަވެފައިވާ ފަރާތްތަކުގެ ލިސްޓު އާންމު ކުރަން،" ޕީއެންސީގެ އިއުލާނުގައި ބުނެފައިވެ އެވެ.
ޕީއެންސީގެ އެތެރޭގެ އިންތިހާބުގައި ވާދަކުރަން ނަން ހުށަހެޅި ބައެއް ކެންޑިޑޭޓުންގެ ނަންތައް މިއަދު އާންމު ކުރި އިއުލާނުގައި ނެތް ކަމަށް ބުނެ ކަންބޮޑުވުން ފާޅު ކުރަމުންދާއިރު، އެ އިންތިހާބު ބޭއްވުން ވަނީ ދެ ފަހަރެއްގެ މަތިން ލަސްކޮށްފަ އެވެ.
ޕީއެންސީގެ އެތެރޭގެ އިންތިހާބު އެންމެ ފުރަތަމަ ބާއްވަން ތާވަލު ކުރީ މިދިޔަ އޮކްޓޯބަރު 19، އަށެވެ. ނަމަވެސް އިންތިހާބުގައި ވާދަކުރާ ކެންޑިޑޭޓުން ބޭނުންވާ ކަމަށް ބުނެ ނޮވެމްބަރު 9، އަށް ފަސް ކުރުމަށްފަހު، އިންތިހާބު މިހާރު ބާއްވަން ނިންމާފައިވާ ނޮވެމްބަރު 23، އަށް އިންތިހާބު އަނެއްކާ ވެސް ފަސް ކުރީ އެވެ.
މީގެ ކުރިން ޕީއެންސީގެ މަޖިލިސް ޕްރައިމަރީގައި ވާދަކުރުމަށް ހުށަހެޅި ބައެއް ކެންޑިޑޭޓުންގެ ނަން އުނި ކުރުމުން ކަންބޮޑުވުން އުފެދި އޭގެ ތެރެއިން ބައެއް މީހުން އަމިއްލަ ގޮތުން މަޖިލިސް އިންތިހާބުގައި ވާދަ ވެސް ކުރި އެވެ.
އައްޑޫ މީދޫ ދާއިރާގެ މަޖިލިސް މެންބަރު އަބްދުއްރަހުމާން އަކީ އެފަހަރު ޕާޓީގެ ޓިކެޓު އަތުލުމުން މިނިވަން ކެންޑިޑޭޓެއްގެ ގޮތުގައި ވާދަކޮށް ކާމިޔާބު ކުރި މެންބަރެކެވެ.
